تازه خبرونه
سراج الدین حقاني د پولیسو د فراغت په مراسمو کې ځان رسنیو ته څرګند کړ
د کورنیو چارو وزارت چارسمبالی سراج الدین حقاني د اسلامي امارت له واکمنۍ شپږ میاشتې وروسته رسنیو ته په دې هیله راڅرګند شو، چې نور په هېواد کې د بې باورۍ ټغر ټول شي.
سراج الدین حقاني، چې د پولیسو د یوشمېر افسرانو د فراغت په مراسمو کې یې ګډون کړی و؛ له امنیتي ځواکونو وغوښتل، چې د کور پر کور د تلاشۍ په وخت کې خلک و نه ځوروي، بلکې له ستونزې سره د مخامخ کېډو په صورت کې له سیمه ییزو عالمانو مرسته وغواړي.
هغه زیاته کړې؛ ملت دې له امنیتي ځواکونو سره د امنیت په تامینولو کې اوږه پر اوږه همکاري وکړي، په چاڼیزو عملیاتو او د تلاشۍ پر مهال دې امنیتي کسان له خلکو سره نېک چلند وکړي.
نوموړي امنیتي ځواکونو ته د کور په کور تلاشۍ په اړه ويلي، خلک مه ځوروئ او که له کومې ستونزې سره مخ کېږئ؛ نو له سیمه ییزو دیني عالمانو مرسته وغواړي.
د کورنیو چارو وزارت دا لوړپوړی چاروکی نړیوالو ته هم د پخلاینې پیغام لري او وايي؛ افغانستان به له دې وروسته د نورې نړۍ پر وړاندې د ګواښ ځای نه وي او هغو هېوادونو، چې پخوا یې پر جګړه لګښت کړی؛ اوس کولی شي د افغانستان په بیارغونه کې خپلې پیسې ولګوي.
د لومړي وزیر دوه یم مرستیال عبدالسلام حنفي هم د درې سوه پنځوس زریز امنیتي او دفاعي ځواک د جوړولو خبره کوي او وايي، دا پوځ به پر بهرنیو مرستو تکیه نه وي.
نن د پولیسو اکاډمۍ څلور سوه اویا ښځینه او نرینه افسرانو له زدکړو وروسته د فراغت سندونه هم ترلاسه کړل.
د یادونې وړ ده، چې یادو افسرانو د دې بنسټ په جنايي، لوجستیکي او سرحدي څانګو کې څلورکلنې زدکړې پای ته ورسولې او تمه ده، چې له خپل مسلک سره سم په دولتي اداروکې وګمارل شي.
