د پوهنې وزارت ویلي، چې د پاکستان پوځي رژیم له ټولو اسلامي، انساني او بشري اصولو ښکاره سرغړونه وکړه او ډېورنډ فرضي کرښې ته نږدې یې د پکتیکا د برمل ولسوالۍ د مٙرغې کلي پر فاروقیه مدرسه او د ننګرهار بهسود ولسوالۍ د ګردي کڅ پر کور او نورو سیمو وحشيانه بریدونه وکړل.

 د دې وزارت ویاند ویلي: په دې بریدونو کې د فاروقیې مدرسې یو طالب العلم زخمي او د بهسود ولسوالۍ اړوند ٨  د ښوونځیو زده‌کوونکي، چې پېنځه هلکان او درې نجونې وې شهیدان شوي او همدارنګه لسګونه نور بې‌ګناه افغانان، ماشومان او سپین‌ږیري، سپين سرې شهیدان او ټپیان شوي دي.

د پوهنې وزارت ویاند زیاته کړې؛ د پاکستاني پوځي رژیم په هوایي بریدونو کې تعلیمي مرکز وېجاړ او د قرآن کریم نسخې او نور دیني کتابونه وسوځېدل.

دا نه بښونکې وحشیانه کړنې ښيي، چې د پاکستان پوځي رژیم دښمني یوازې د افغانانو له ژوند سره نه، بلکې د افغانانو له دین، زده‌کړې، ښوونیزو مرکزونو او فرهنګي بنسټونو سره هم ده.

په ملګرو ملتونو کې د افغانستان چارسمبالی(سرپرست) دایمي استازي نصیر احمد فایق ويلي: د پاکستان د وروستیو هوايي بریدونو په اړه یې، چې په کې ملکي ځاني زیانونه رامنځته شوي؛ امنیت شورا ته شکایت سپارلی دی.

هغه په ​​ایکس پاڼه کې لیکلي: “مونږ د دې سرغړونو د سمدستي پلټنې او بندولو، حساب ورکولو، د ځمکني بشپړتیا درناوي، د ملګرو ملتونو منشور او له نړیوالو قوانینو د بشپړ اطاعت غوښتنه کوو.”

هغه له امنیت شورا څخه غوښتنه کړې، چې دا موضوع د یوې جدي نړیوالې مسلې په توګه وڅېړي او پاکستان دې د نړیوالو قوانینو رعایت کولو ته اړ کړي.

د پاکستان پوځي رژیم د شنبې پر شپه په ننګرهار او پکتیکا ولایتونو کې هوایي بریدونه وکړل، چې په کې د ښځو، ماشومانو او رده‌کوونکو په ګډون لسګونه ملکي وګړي شهیدان او ټپیان شول.

د ترکمنستان ملي مشر قربانقلي بردي محمدوف ويلي، چې نړیوال شرکتونه د امریکایي هغو په ګډون کولی شي د ترکمنستان- افغانستان- پاکستان- هند (ټاپي) ګاز نل‌لیکې پروژې سره یوځای شي.

نوموړي له العربیه سره په مرکه کې څرګنده کړې؛ د ټاپي پروژه باید د افغانستان، پاکستان او هند ترمنځ د اوږدمهالي تاوتریخوالي مخه ونیسي، چې په دې وروستیو کې د مرګونو نښتو شاهدان دي.

هغه زیاته کړې: « دا پروژه، چې د امریکا په ګډون له نړیوال ملاتړ څخه برخمنه ده؛ د سویلي آسیا هېوادونو د مخ پر ودې انرژۍ اړتیاوو د پوره کولو لپاره خورا ستره وړتیا لري. دا په آسیا-اوقیانوسیه سیمه، نږدې ختیځ او منځني ختیځ کې د مخ پر ودې بازارونو ته د لاسرسي لپاره د امید وړ لارې هم پرانیزي».

بردي محمدوف زیاته کړې: « ټاپي پروژه د سیاسي ثبات او اقتصادي سوکالۍ لپاره هم خورا مهمه ده او د پانګونې لوړ جذابیت لري».

ترکمنستان پلان لري، چې د نل‌لیکې لومړۍ برخه د ۲۰۲۶ کال تر پایه به د هرات ښار ته ورسیږي؛ بشپړه کړي. تر دې دمه د دې پروژې د جنوب لوري ته د غځولو پلان ندی اعلان شوی.