تازه خبرونه
د پاکستان پولیسو د بلوڅ جنګیاليو ۶ کسیزه ډله نیولي
د پاکستان پولیسو ویلي، چې د بلوڅ جنګیاليو شپږ غړي، چې له افغانستان څخه اداره او د هند د استخباراتو لخوا تمویلیږي نیولي دي.
دان خبري سرچینې د کراچۍ د پولیسو د یوه لوړ پوړي چارواکي فدا حسین جنواري له خولې په ډاګه کړې، چې دغو کسانو د پاکستان په کراچۍ ښار کې د “تروریستي” برید پلان درلود.
هغه زیاته کړې، چې شکمن کسان د بلوڅ راګي آجاوي سنګر نومی د یوې منع شوې ډلې اړوند غړی دي.
جنواري ویللي: دا ډله له افغانستان څخه اداره کیږي او د هندوستان د استخباراتو لخوا تمویلیږي.
د پاکستان پولیسو زیاته کړې، چې له دې کسانو څخه شپږ بمونه، پېنځه لاسي بمونه، درې کلاشنکوفونه او یو شمېر مهمات نیول شوي دي.
تورنو کسانو په لومړنیو څېړنو کې منلې، چې دوی د ” پراخ تروریستي” برید د تر سره کولو نیت کړې و.
د پولیسو د چارواکو له خولې څرګنده شوې، چې دوی په بلوچستان کې د اردو، سرحدي کاروانونو او پرسونل کاروانونو په مرګونو بریدونو کې لاس درلود.
جنواري ټینګار کړی، چې شکمنو کسانو د هندي استخباراتو له ادارې څخه د روزنې، تمویل او ملاتړ پر ترلاسه کولو هم اعتراف کړی دی.
