د افغانستان لپاره د چین ځانګړي استازي یو شیایو یونګ د بهرنیو چارو وزارت له چارسمبالي امیر خان متقي سره د افغانستان او چین پر دوه اړخیزو اړیکو، اقتصادي همکاریو او سیمه ییزو چارو خبرې وکړې.

د بهرنیو چارو وزارت د ویاند مرستیال ضیا احمد تکل د خپرې شوې خبرپاڼې له مخې؛ د بهرنیو چارو چارسمبالي وزیر د چین ولسي جمهوریت سره د افغانستان اسلامي امارت اړیکې مثبتې یادې کړې او د دواړو هېوادونو ترمنځ یې په سوداګریزه برخه کې پرمختګونه د ستاینې وړ وبلل.

دغه راز د چین ځانګړي استازي هم د دواړو هېوادونه ترمنځ په دوه اړخیزو اړیکو کې پرمختګونه مثبت وګڼل او وایي، چې هېواد یې د افغانانو ارزښتونو او غوراویو ته درناوی لري.

نوموړي ټینګار کړی، چې د افغانستان د ګاونډ هېوادونو د بهرنیو چارو وزیرانو په راتلونکې ناسته کې به د افغانستان د بهرنیو چارو چارسمبالی وزیر ګډون وکړي.

د مهاجرینو او راستنېدونکیو چارو وزارت د خپرې شوې خبرپاڼې له مخې؛ د دې وزارت چارسمبالي خلیل الرحمن حقاني په اېران کې د افغانستان اسلامي امارت له سفیر  فضل محمد حقاني سره د خپل کار په دفتر کې وکتل.

فضل محمد حقاني په دې ناسته کې چارسمبالي وزیر ته د افغان مهاجرینو د انساني قاچاق، د راستانه شویو کسانو د هويت، د افغان مهاجرینو د پېژندنې، د افغان مهاجرینو د آتشو، د مهاجرینو په اړه د اېران له حکومت سره د هوکړو، پالیسۍ او د مهاجرینو شمېر او ستونزې وړاندې کړې.

خلیل الرحمن حقاني سفیر او ور سره مل پلاوي ته د یادو ستونزو د حل په برخه کې ډاډ څرګند کړ ، چې یادو ستونزو ته به لاسرسی ومومو او افغانان په باعزته توګه خپل هېواد ته راستانه کړو.

خلیل الرحمن حقاني د اېران له حکومت څخه وغوښتل، چې د افغان مهاجرینو د مالونو د ضبط او له آزار، اذیت او ځورونې لاس واخلي.

ویل کیږي، چې حقاني د وزارت او په اېران کې د اسلامي امارت سفارت پر همغږۍ او پوره همکارۍ ټینګار  څرګند کړ.

د افغانستان په چارو کې د روسیې د ولسمشر ځانګړي استازي ضمیر کابلوف په کابل کې د بهرنیو چارو له چارسمبالي وزیر سره په لیدنه کې ویلي، چې په نږدې راتلونکي کې د روسیې یو لوړ پوړی پلاوی کابل ته راځي او د دغه هېواد له چارواکو سره د همکارۍ پر پراختیا خبرې کوي.

د بهرنیو چارو وزارت د خبرپاڼې له مخې؛ په دې کتنه کې د افغانستان او روسیې ترمنځ د دوه اړخیزو اړیکو په ځانګړي توګه پر اقتصادي همکاریو، پانګونې او ټرانزیټ خبرې وشوې.

د بهرنيو چارو وزارت چارسمبالي د اسلامي امارت او روسيې ترمنځ اړيکې مهمې یادې کړې او ټينګار يې وکړ، چې د دواړو هېوادونو ترمنځ باید د اقتصادي او سوداګريزو همکاريو په ګډون اړيکې پراخه شي.

امیرخان متقي د افغانستان او روسیې تر منځ د لوړ پوړیو پلاویو تبادله مهمه وبلله او زیاتوي، چې په تېر کال کې د اسلامي امارت ګڼ چارواکي د ناستو لپاره روسیې ته بلل شوي دي.

دغه راز د روسيې ځانګړي استازي ويلي، چې هېواد يې غواړي له افغانستان سره په اقتصادي او سوداګريزو برخو کې خپلې اړيکې پراخې کړي.

ضمیر کابلوف زیاته کړې؛ په نږدې راتلونکي کې د روسیې یو لوړ پوړی پلاوی کابل ته راځي او د اسلامي امارت له چارواکو سره به د همکاریو پر پراختیا خبرې وکړي.