تازه خبرونه
د پاکستان نوی حکومت دې له اسلامي امارت سره د اړیکو ټینګولو لپاره رغنده ګامونه پورته کړي
د بهرنيو چارو وزارت چارسمبالی اميرخان متقی په کابل کې د پاکستان له سفير عبيدالرحمن نظاماني سره په کتنه کې ويلي، چې د پاکستان نوى حکومت دې له اسلامي امارت سره د اړيکو د پياوړتيا لپاره رغنده ګامونه واخلي.
د بهرنیو چارو وزارت د ویاند مرستیال ضیا احمد ویلي، چې په دې لیدنه کې د واړه لورو د افغانستان او پاکستان پر سیاسي او اقتصادي موضوعاتو خبرې کړې دي.
متقي ویلي: د سېمې هېوادونه ورځ تر بلې له افغانستان سره د مثبت تعامل د پراخېدا خوا ته تلونکي دي؛ سیمې درک کړې، چې د افغانستان ثبات د سیمې د ابتکاراتو او هر اړخیز پرمختګ لپاره مثبت رول لوبولای شي.
نوموړي زیاته کړې، چې د پاکستان نوی منتخب حکومت به د یوې مثبتې پالیسې له مخې د اړیکو په پیاوړتیا کې رغنده ګامونه پورته کړي.
د بهرنیو چارو وزارت د خبرپاڼې له مخې؛ نظاماني ویلي: چې د افغانستان او پاکستان اړیکې ډېرې ارزښتناکې دي او نوی منتخب حکومت د اړیکو د پراختیا لیدلوری لري او د شته ستونزو د لهمنځه وړلو په برخه کې به ګډ کار وکړي.
ویل کیږي، چې دواړه لوریو د ډیورنډ پر کرښه د مسافرو، ناروغانو او سوداګریز تګ راتګ په اړه د اسانتیاوو پر رامنځته کولو هم ټینګار څرګند کړ.
