د ایران مذهبي مشر ایت الله علي خامنه‌یي د شنبې پر ورځ (د کب اتمه) ویلي، چې تهران به د “ځورونې” تر فشار لاندې خبرو ته غاړه کېندي.

هغه دا څرګندونې له هغې یوه ورځ وروسته کړي، چې د امریکا ولسمشر ډونالډ ټرمپ ویلي وه؛ د ایران لوړ پوړي چارواکي ته یې د اټومي تړون په اړه د خبرو اترو لپاره یو لیک لېږلی دی.

ټرمپ د فاکس بیزنس شبکې سره په یوه مرکه کې ویلي: “له ایران سره د معاملې لپاره دوه لارې شتون لري؛ پوځي او توافقي، چې اټومي وسلو ته د تهران د لاسرسي مخه ونیسي.”

خامنه‌یي له لوړ پوړو ایراني چارواکو سره په یوه لیدنه کې ویلي، چې د خبرو اترو په وړاندیز کې د واشنګټن هدف د خپلو غوښتنو تپل دي.

هغه ویلي: “اوس هغه درې اروپايي هېوادونه هم یوه خبرپاڼه خپروي؛ اعلان کوي، ​​چې ایران خپله اټومي ژمنه نده پوره کړې!” په دې خوا کې، یو له دوی څخه پوښتنه کوي: “آیا تاسې عمل وکړ؟” تاسې وایئ، چې ایران پخپله ژمنه عمل ندی کړی. ښه! تاسې خپله ژمنه پوره کړې ده؟ّ! “تاسې له لومړۍ ورځې څخه عمل ندی کړی.”

هغه زیاته کړې: “حکومت، د هغه وخت حکومت یو کال دا وزغمله؛ بیا اسلامي مشورتي شورا ډګر ته راووته. ښه! منم دوی پرېکړه تصویب کړه؛ پرته له دې بله لار نشته. اوس هم همداسې ده؛ اوس هم د زور پر وړاندې، د ځورونې پر وړاندې د خلاصون لار نشته.”

د نوموړي د څرګندونو له مخې؛ د ځینو “ځورونکو حکومتونو” ټینګار په خبرو اترو کې د ستونزو حل کول ندي، بلکې د خپلو غوښتنو د تسلط او تحمیلولو لپاره دي.

که څه هم ټرمپ له تهران سره د معاملې کولو لپاره د لېوالتیا خبره کړې؛ هغه د “ډېر فشار” کمپاین بیا پیل کړی او هغه یې په خپل لومړي پېر کې عملي کړی و، چې ایران له نړیوال اقتصاد څخه ګوښه او د تېلو صادرات یې صفر ته راټیټ کړي.

رویټرز راپور ورکړی، چې د فرانسې، جرمني، ایټالیا او بریټانیا د بهرنیو چارو وزیرانو د شنبې پر ورځ ویلي، چې دوی د غزې د بیارغونې لپاره د عربانو له ملاتړه د برخمنې طرحې ملاتړ کوي، چې لګښت یې ۵۳ میلیارډ ډالر او له دې سیمې څخه د فلسطینیانو د بې ځایه کیدو مخه نیسي.

له غزې ملاتړو وزیرانو په یوه ګډه خبرپاڼه کې ویلي: “دا پلان د غزې د بیارغونې لپاره یوه رښتینې حل لار وړاندې کوي او که پلي شي؛ نو په غزه کې د میشتو فلسطینیانو د ژوندانه په شرایطو کې د چټک او دوامداره ښه‌والي زیری ور کوي.”

دا پلان، چې مصر ترتیب کړی دی؛ د سې‌شنبې پر ورځ د عربي هېوادونو مشرانو تصویب کړ؛ خو د اسرائیلو او د امریکا ولسمشر ډونالډ ټرمپ طرحه، چې د غزې تړانګه پر د “منځني ختیځ رویرا” د بدلولو لید یې وړاندې کړی؛ ردوی.

په راپور کې راغلي: مصر د یوې داسې اداري کمیټې د جوړولو وړاندیز کوي، چې خپلواک او مسلکي فلسطیني ټکنوکراټان رانغاړي، چې د اسرائیل او حماس ترمنځ د غزې د جګړې له پای ته رسېدو وروسته به د غزې اداره پر غاړه واخلي.

دا کمیټه به د فلسطیني ادارې تر څارنې لاندې د لنډمهاله وخت لپاره د بشري مرستو د څارنې او د سیمې د چارو د مدیریت مسوولیت ولري.

څلورو اروپايي هېوادونو د شنبې پر ورځ په یوه خپره شوې خبرپاڼه کې څرګنده کړې، چې دوی ” له عربي نوښت سره کار کولو ته ژمن دي” او له هغه “مهم سیګنال” چې عربي هېوادونوورسره د پراختیا له لارې لېږلی؛ ستاینه کوي.

په دې خبرپاڼه کې راغلي، چې حماس ” باید نوره غزه اداره نکړي او د اسرائیلو لپاره ګواښ هم نه وي” او دا څلور هېوادونه “د فلسطیني ادارې د مرکزي رول او د هغې د اصلاحاتو د اجنډا له پلي کولو ملاتړ کوي.”

په پاکستان کې پر یوه پوځي اډه د چاودنو له کبله لږ تر لږه د ۶ ماشومانو په ګډون ۱۳ ملکي وګړي، پېنځه سرتېري او له امنیتي ځواکونو سره په نښتو کې ۱۶ وسلوال بریدګر وژل شوي او شاوخوا ۳۰ ملکي وګړي ټپیان، چې روغتون ته وړل شوي دي.

له دې برید څو ساعته وروسته د حافظ ګل بهادر پر مشرۍ د تحریک طالبان پاکستان (TTP) سره تړلې جیش الفرسان ډلې د دې بریدونو مسوولیت پر غاړه واخیست.

د چارشنبې پر ورځ د کب پېنځلسمه پاکستانيو رسنیو راپور ورکړ، چې د کب پر څوارلسمه ماښام مهال، وسلوالو د پاکستان د شمال لویدیځ خیبر پښتونخوا ایالت په بنو ښار کې پر یوه پوځي سیمه وسلوال برید وکړ او دوه موټر بمونو ته یې چاودنه ورکړه.

دا برید د چارشنبې پر ماښام د روژه ماتي له مراسمو څو شېبې وروسته وشو، چې په کې دوه ځانمرګو بریدګرو له چاودېدونکو توکو ډک موټرونه د ملکي استوګنځيو مخې ته وچول.

په دې سیمه کې له دې مخکې هم بېلتون غوښتونکې وسلوالې ډلې د نورو عملیاتو ترسره کولو مخینه هم لري.

تېره اوونۍ له ورته بریدونو وروسته د پاکستان امنیتي سرچینو راپور ورکړ، چې د خیبر پښتونخوا پر یوه اډه په برید کې څلور پوځيان ووژل شول.

د سلواغې پر شپږویشتمه د پاکستان په بلوچستان ایالت کې د سړک غاړې بم په چاودنه کې لږ تر لږه ۱۱ کان کېندونکي وژل شوي وه.