د پاکستان د شمال لویدیځ په مذهبي تاوتریخوالي کې لږ تر لږه ۱۸ کسان وژل شوي او ۳۰ نور ټپیان دي.

د رویټرز د څرګندونو له مخې؛ د خیبر پښتونخوا وزیر اعلی سیکرټر ندیم اسلم چوهدري ویلي؛ په قبایلي ضلع کې د وژنو وروستی پړاو د جمعې پر شپه هغه مهال پیل شو، چې وسلوالو د دې ولسوالۍ پر یوه کلي برید وکړ.

دغه ایالتي چارواکي زياته کړې: د تېرې شپې دا وژنه په پاراچنار سيمه کې د وسلوالو د بريد په غچ کې رامنځته شوې، چې له کبله يې لسګونه کسانو ته مرګ او ژوبله هم واوښته. په دغه ځوابي برید کې د پټرولو پمپ ته چاودنه هم ورکړ شوې، چې په کې عامه شتمنیو ته هم زیان اوښتی دی.

چوهدري ويلي؛ لوړ پوړي دولتي چارواکي به د دواړو غاړو له قومي مشرانو سره خبرې وکړي، چې روانې شخړې ورسره پای ته ورسیږي.

دا په داسې حال کې ده، چې له تېرې پنجشنبې راپدېخوا ۵۸ کسان وژل شوي دي. تېره اوونۍ په پاړه چنار کې د شیعه‌ګانو پر یوه بس د برید له کبله د یوې ښځې او یوه ماشوم په ګډون ۴۰ کسان وژل شوي دي.

هندي رسنیو د یکشنبې پر ورځ ( د لړم اووه‌ویشتمه) څرګنده کړې، چې هیواد یې  د هایپرسونیک توغندي بریالۍ ازموینه وکړه.

د رویټرز د څرګندونو له مخې؛ د هند حکومت په خپره شوې خبرپاڼه کې ټینګار کړی، چې د دې توغندي ازموینه بریالۍ وه  او دا د دولتي دفاعي څېړنې او پراختیا ټولنې او صنعتي ونډوالو لخوا د هند د وسلوالو ځواکونو لپاره ډیزاین شوی دی، چې تر ۱۵۰۰ کیلومټرو پوري د خپلې خولۍ د لېږدولو وړتیا لري.

د هند د حکومت د خبرپاڼې له مخې، د دغه هېواد پوځ د اوډیشا په سواحلو کې د عبدالکلام په ټاپو کې د اوږد واټن هایپرسونیک توغندی ازموینه کړې ده.

د رویټرز په وینا، د دې راکټ بریالۍ ازموینه دا په ډاګه کوي؛ هند د پوځي پرمختګ په برخه کې یو مهم پړاو ته رسیدلی او اوس د هغو هېوادونو په کوچنۍ ډله کې دی، چې دا ډول پرمختللې ټکنالوژي لري.

اوس مهال په ځینو هېوادونو لکه هند کې له غږ د چټکو وسلو د ترلاسه کولو لپاره نړیوالې هڅې روانې دي او هڅه کوي، چې د چین، روسیې او امریکا په څېر هېوادونو ته نږدې شي.

د ایران بهرنیو چارو وزیر عباس عراقچي په ملګرو ملتونو کې د دې هېواد له سفیر سره د ایلان ماسک د لیدلو په اړه د امریکايي رسنیو راپورونه رد کړل.

هغه د شنبې پر ماښام (د لړم شپږویشتمه ) په يوه پروګرام کې ویلي، چې له ایلان ماسک سره هیڅ یوه ایراني چارواکي لیدلي ندي او دا موضوع یې د امریکایانو خبر جوړول یادکړي دي.

په ملګرو ملتونو کې د ایران اسلامی جمهوریت له استازی سعید ایرواني سره د ایلان ماسک د کتنې خبر لومړی نیویارک ټایمز خپور کړ او څرګنده یې کړه، چې دواړو لوریو د تهران او واشنګټن ترمنځ د کړکېچ کمولو پر لارو چارو خبرې کړې دي.

عراقچي زیاته کړې: یقیناً د اسلامي جمهوریت هیڅ یو سفارت او دفتر به له همغږۍ پرته دا ډول غونډې ترسره نکړي.

څو ساعته مخکې د ایران دولتي خبري سرچینې ایرنا لیکلي وه، چې د ایران بهرنیو چارو وزارت ویاند اسماعیل بقایي نه یوازې دا ناست رد کړې، بلکې د امریکایي رسنیو د دې پوښښ په اړه یې حیرانتیا هم څرګنده کړې ده.

دا تردیدونه په ملګرو ملتونو کې د ایران له سفیر امیر سعید ایرواني سره د ایلان ماسک د کتنې د خبرونو له پراخ پوښښ وروسته خپاره شوي دي.

د دې ناستې خبر لومړی د پنجشنبې پر ورځ (د لړم پر څلیریشتمه ) نیویارک ټایمز د ځینو ایراني چارواکو پر حواله خپور کړ، چې د دواړو لوریو د خبرو تمرکز د ایران او امریکا ترمنځ د کړکېچ د کمولو پر څرنګوالي و.