تازه خبرونه
د پاکستان دفاع وزیرد یوه پلاوي پر مشرۍ کابل ته راغلی

د افغانستان اسلامي امارت د ریاست الوزرا اقتصادي مرستیال ملا عبدالغني برادر آخوند د پاکستان د دفاع وزیر خواجه محمد آصف پر مشرۍ له لوړپوړي پلاوي سره وکتل.
د افغانستان اسلامي امارت اقتصادي مرستیالۍ څرګنده کړې؛ ملا برادر د پاکستان د دفاع وزیر پر مشرۍ له لوړپوړي پلاوي سره پر دوه اړخیزو اړیکو، سوداګرۍ، سیمهییز اتصال او اقتصادي همکاریو بحث او خبرې وکړې.
ملا عبدالغني برادر د خپلو خبرو پر مهال ویلي؛ افغانستان او پاکستان باید له یو بل سره غوره سوداګریزې – اقتصادي اړیکې ولري او د سیاسي او امنیتي مسایلو ښکار نشي.
دغه راز ملا برادر د هغو افغانانو پر خلاصون هم ټینګار کړی،، چې اوسمهال د پاکستان په زندانونو کې بندیان دي.
هغه ویلي؛ په تورخم او سپين بولدک کې باید د ټولو مسافرو لپاره لازم سهولتونه برابر او د عاجلو ناروغانو تګ راتګ ته ځانګړې اسانتیاوې رامنځته شي.
پاکستاني لوري په دې اړه د آسانتیاوو د رامنځته کولو ډاډ څرګند کړ او څرګندوي، چې اړوند وزارتونه او مؤظفې کمیتې به پرې کار وکړي.
دا سفر د تورخم پولې له تړل کېدو څلور ورځې وروسته ترسره شوی.
د افغانستان اسلامي امارت چارواکو د یکشنبې پر ورځ تورخم، چې له پاکستان سره یوه له مهمو سوداګریزو لاره ده؛ وتړله او اسلامآباد یې له ژمنو پر سرغړونې تورن کړ.
د تورخم چارواکي وايي، د تورخم لار د سوداګرۍ او تګ راتګ پر مخ تړل شوې ده.
د تورخم کمیسار مولوي محمد صدیق ويلي، پاکستان پخپلو ژمنو عمل ندی کړی؛ نو، ځکه یې دروازه تړلې ده. هغه د افغانستان خلکو ته سپارښتنه کړې، چې تر بلې خبرتیا پورې دې په ختیځ ننګرهار ولایت کې سرحدي پولو ته له تګ څخه ډډه وکړي.
مولوي محمد صدیق وایي: پاکستاني لوري خپلې ژمنې پوره نهکړې او د افغانستان اسلامي امارت د مشرانو پر سپارښتنه دغه لویه لار وتړله.
ویل کیږي، چې له پاکستاني لوري سره د لارې د پرانستلو په اړه خبرې روانې دي.
تازه خبرونه
د معاشونو د نورم او اجراء په اړه خپاره شوي لیستونه او اوازې ناسمې دي
د ماليې وزارت په خبرپاڼه کې راغلي؛ د تېرو څو ورځو راپدېخوا په یو شمېر رسنيو او ټولنیزو پاڼو کې، چې د امارتي ادارو د معاشونو د نورم د بدلون په اړه کوم لیستونه او اوازې خپرېږي؛ مطلق ناسم دي.

د افغانستان ماليې وزارت د معاشونو د نورم او اجراء په اړه په يوه خبرپاڼه کې ویلي، چې د معاشونو د نورمونو د بدلون په تړاو خپرې شوې اوازې او ليستونه ناسم او درواغ دي.
د ماليې وزارت په خبرپاڼه کې راغلي؛ د تېرو څو ورځو راپدېخوا په یو شمېر رسنيو او ټولنیزو پاڼو کې، چې د امارتي ادارو د معاشونو د نورم د بدلون په اړه کوم لیستونه او اوازې خپرېږي؛ مطلق ناسم دي.
ماليې وزارت په همدې اوونۍ کې د معاشاتو د اجراء خبر هم ورکړی او زياتوي:« دا وزارت هېوادوالو ته ډاډ ورکوي، چې د امارتي ادارو معاشات به په دې اوونۍ کې د پخوا په څېر اجراء شي».
دا په داسې حال کې ده، چې د حکومت مامورینو د سلواغې او کب میاشتو معاشونه ندي اخیستي.
تازه خبرونه
د بهرنیو چارو وزارت د غزې پر تړانګه د اسرائیلو تازه بریدونه وغندل
د دې وزارت د خپرې شوې خبرپاڼې له مخې: “د صهیونستي یرغلګرو دا وحشیانه عمل نه یوازې له بشري حقونو او نړیوالو قوانینو سرغړونه ده، بلکې د انسانیت له بنسټیزو ارزښتونو سره هم ښکاره تضاد لري”.

د بهرنیو چارو وزارت ویلي؛«د اسرائیلي اشغالګر رژیم په تازه بریدونو کې، چې له کبله یي له ۳۰۰ ډېر بې گناه فلسطینیان د میرمنو او ماشومان په ګډون “شهیدان” او ټپیان کړل» پر کلکو ټکو غندي.
د دې وزارت د خپرې شوې خبرپاڼې له مخې: “د صهیونستي یرغلګرو دا وحشیانه عمل نه یوازې له بشري حقونو او نړیوالو قوانینو سرغړونه ده، بلکې د انسانیت له بنسټیزو ارزښتونو سره هم ښکاره تضاد لري”.
دغه راز بهرنیو چارو وزارت یو ځل بیا له ذیدخله هېوادونو وغوښتل، چې د فلسطین له مظلومو خلکو خپل ملاتړ څرګند کړي او د اشغال د پای ته رسولو لپاره عملي او پرېکنده ګامونه واخلي.
اسلامي امارت ویلي، چې دوی “د فلسطینیانو حقه مبارزه او مشروع مقاومت د هغو یو ثابت حق ګڼي او ملاتړ یې کوي.”
تازه خبرونه
له افغانستان څخه د امریکا د وتلو په پرېکړه او پلي کولو کې ټول ښکېل کسان مسوول دي ـ شان پارنیل
د وزارت ویاند د جو بایډن په مشرۍ د امریکا د پخوانۍ ادارې پر ستراتیژۍ نیوکه وکړه او وایي؛ ټول هغه کسان، چې له افغانستان څخه د امریکا د وتلو په پرېکړه او پلي کولو کې ښکېل دي باید مسوول وګڼل شي.

د امریکا دفاع وزارت ويلي، چې په ۲۰۲۱ کال کې له افغانستان څخه د امریکايي ځواکونو وتل “نامسؤلانه” او شرموونکي وه.
د وزارت ویاند د جو بایډن په مشرۍ د امریکا د پخوانۍ ادارې پر ستراتیژۍ نیوکه وکړه او وایي؛ ټول هغه کسان، چې له افغانستان څخه د امریکا د وتلو په پرېکړه او پلي کولو کې ښکېل دي باید مسوول وګڼل شي.
د امریکا د دفاع وزارت ویاند په خپل لومړني مطبوعاتي کنفرانس کې له افغانستان څخه د امریکا د وتلو پر ستراتیژۍ نیوکه وکړه او اسلامي امارت ته یې د افغانستان تسلیمېدل ستونزمن وبلل.هغه د امریکا د ګډوډ وتلو مسوولانو ته د حساب ورکولو پر اړتیا ټینګار وکړ.
د امریکا د دفاع وزارت ویاند شان پارنیل وايي: “زما هېواد په افغانستان کې د ۲۰ کلونو لپاره په جګړه کې و او ما د خپل ژوند یوه لویه برخه هلته تېره کړه.” زمونږ سرتېرو هلته ډېر ښه ماموریت ترسره کړ؛ خو زما لپاره دا ډېره سخته وه، چې د طالبانو (اسلامي امارت) ته د افغانستان د تسلیمېدو صحنې ووینم. د ټرمپ اداره به هرې جګړې ته د ننوتلو، ګټلو او وتلو لپاره یوه روښانه ستراتیژي ولري.”
له دې مخکې د ټرمپ ادارې نورو چارواکو له افغانستان څخه د امریکايي ځواکونو د وتلو پر څرنګوالي نیوکه کړې وه او د حساب ورکولو پر اړتیا یې ټینګار کړی و.
دغه راز د امریکا بهرنیو چارو وزارت ویاند اعلان کړی، چې په افغانستان کې د پخوانیو امریکایي سرتېرو د همکارانو لیږد او بیا میشتېدنه د هېواد د پالیسۍ یوه برخه ده.
د بهرنیو چارو وزارت ویاند ټامي بروس ویلي: “مونږ د دې اشخاصو د لېږدولو لپاره ترتیبات نیولي دي. د امکان تر حده مونږ د ډېرو هغو خلکو د بېرته ستنولو هڅه کړې، چې په شخړو کې ښکېل ول. په ځانګړي توګه هغه کسان، چې له مونږ سره یې همکاري کړې او تل زمونږ د پالیسۍ برخه وه. دا بهیر له پخواني حکومت څخه روان دی او مونږ اوس هم پدې کار کوو.”
سپینې ماڼۍ ته د ټرمپ له راستنېدو سره سم له افغانستان څخه د پخوانیو امریکایي سرتېرو د ایستلو بهیر هم په ناڅرګندتیا کې ډوب شوی دی. په زرګونه خلک اوس په افغانستان، پاکستان، قطر او د سیمې په نورو هېوادونو کې بې برخلیکه ژوند کوي. داسې رپوټونه هم شته چې ښايي پر افغان اتباعو امریکا ته پر سفر بندیز ولګول شي.
-
سوداگري2 days ago
په ۱۴۰۳ کال کې د ۲۹۲ میلیون ډالرو پر ارزښت د هوايي دهلیزونو له لارې سوداګري شوې
-
تازه خبرونه14 hours ago
له افغانستان څخه د امریکا د وتلو په پرېکړه او پلي کولو کې ټول ښکېل کسان مسوول دي ـ شان پارنیل
-
تازه خبرونه15 hours ago
د تورخم دروازې د بیا پرانیستلو او اوربند لپاره د جرګې خبرې پرښه نیت پای ته ورسېدې
-
تازه خبرونه3 days ago
د ټرمپ حکومت د امریکا غږ کارکوونکي جبري رخصتۍ ته اړ کړل
-
تازه خبرونه3 days ago
امریکا په یمن کې د ۳۱ حوثیانو پر وژلو د هوايي بریدونو لړۍ پیل کړه
-
سیمه ییز خبرونه2 days ago
د پاکستان په جنوب لویدیځ کې ځانمرګي برید ۳۶ کسانو ته مرګ او ژوبله اړولې
-
نړۍ2 days ago
د امریکا او روسیې ولسمشران به روانه اوونۍ د اوکراین پر جګړې خبرې وکړي
-
څار3 days ago
څار: د تاجکستان او قرغزستان ترمنځ د سرحدي حدودو په اړه تړون