د ایران د ولسمشریزو ټاکنو د څوارلسمې دورې د ترسره کېدو بهیر نن (جمعه د چنګاښ اتمه) د سهار پر ۸ بجو پیل شو، چې ۶۱ میلیونه ۴۵۲ زره ۳۲۱ کسان به په هېواد کې دننه او بهر ګډون وکړي.

ایسنا خبری اژانس راپور ورکړی، چې په نیوزیلینډ کې د ایران سفارت په ګډون د دوه نورو ښارونو ایرانیانو ته هم د رای اچونې له پیل سره سم د ولسمشریزو ټاکنو د رایو صندوقونه کېښودل شوي دي.

په بهر کې ایراني وګړي هم کولی شي د باور وړ پاسپورټ سره د خپلې خوښې نوماند ته رای ورکړي.

له دې مخکې په بهر کې د ایران د ولسمشریزو ټاکنو د ترسره کولو مسوول علیرضا محمودي ویلي وه، چې د ایران د ولسمشرۍ د انتخاباتو لومړی پړاو به په نیوزیلینډ کې ترسره شي.

د ایران د ولسمشرۍ په څوارلسم پړاو ټاکنو کې د دغه هېواد د ولسمشرۍ څوکۍ لپاره مسعود میزکیان، مصطفی پور محمدي، سعید جلیلي او محمد باقر قالیباف سیالي کوي.

ویل کیږي، چې په مزارشریف ښار کې هم د ایران قونسلګرۍ د خپل هېواد وګړو ته د ایران د ولسمشرۍ په ټاکنو کې د رای اچونې لپاره د رایو صندوقونه ایښي دي.

د غزې روغتیايي چارواکو او د روغتون سرچینو ویلي، چې اسرائیلي ځواکونو د سې شنبې پر سهار د کډوالو پر کمپ په درې بېلابېلو بریدونو کې د حماس د اسلامي ډلې د مشر اسماعیل هنیه د خور او کورنۍ د غړیو په ګډون لږ تر لږه ۲۴ فلسطینیان وژل شوي دي.

د رویټرز د څرګندونو له مخې؛ د سیمې اوسیدونکيو ويلي، چې د غزې د تړانګې په سویل کې د رفح پر لویدیځو سیمو د شپې په اوږدو کې اسرائیلي ټانکونو هم څو کورونه پر بمونو والوزول.

د روغتیايي سرچینو د څرګندونو له مخې؛ د اسرائیلو دوه الوتکو د غزې د ښار دوه ښوونځي بمبارډ کړل چې په کې لږ تر لږه ۱۴ کسان ووژل شول. دغه راز د غزې په تړانګه کې د مهاجرینو له اته تاریخي کمپونو څخه د شاطي کمپ پر کورونو یو بل برید شوی، چې په کې ۱۰ نور کسان وژل شوي دي.

په شاطي کمپ کې پر نښه شوی کور د حماس ډلې د سیاسي مشر هنیه د کورنۍ و، چې مرکز یې په قطر کې دی. د هنيه د کورنۍ غړیو او روغتيايي سرچينو ويلي، چې د هنيه يوه خور له نورو ۹ خپلوانو سره وژل شوې ده.

د اوکتوبر له برید وروسته اسرائیلي ځواکونو په غزې کې د هنیه درې زامن هم وژلي دي.

حماس په شاطي کمپ کې پر دوه ښوونځیو او کورونو بریدونه «عامه وژنه » یاده کړې ده.

د حماس جنګیالیو او د هغې متحدې ډلې اسلامي جهاد په یوه ګډه خبرپاڼه کې اعلان کړی، چې د دوی غړیو شپه او ورځ د رفح په ختيځ کې پر اسرائيلي ځواکونو توغندي توغولي دي.

په خان یونس کې روغتیايي سرچینو ویلي، چې د دغه ښار په لویدیځ کې د خیمو په یوه کمپ کې د اسرائیلو د ټانکونو په بریدونو کې هم څو کسان ټپیان شوي دي.

د ملګروملتونو د فلسطیني کډوالو ادارې ویلي، چې په غزه کې د قاچاق کوونکیو ډلو له رامنځته کیدو سره په غزه کې ګډوډي رامنځته شوې او دغه کار د مرستو په رسولو کې ستونزې دېروي.

د لوږې نړیوال څارونکيو د سې شنبې پر ورځ ویلي، چې په غزه کې د قحطۍ لوړ خطر شتون لري؛ ځکه، چې جګړه روانه ده او بشري مرستو ته لاسرسی هم محدود دی.

حماس ويلي؛ هر هوکړه باید جګړه پای ته ورسوي؛ خو اسرائيل وايي، چې يوازې د جګړې پر لنډمهالي ودرولو هوکړه کوي؛ ځکه، چې غواړي حماس له منځه يوسي. حماس د امریکا په ګډون د یو شمېر هېوادونو له‌خوا ترهګره ډله اعلان شوې ده.

اړوند خبرونه: 

په رفح کې پر اسرائيلي بريدونو لسګونه فلسطينيانو ووژل شول

د اسرائیلو نسل وژنه باید ژر تر ژره ودرول شي- افغانستان

مصر د حج پر مهال د ۵۳۰ حاجیانو د مړه کېدو په غبرګون کې د ۱۶ سیاحتي شرکتونو کاري جوازونه بېرته واخیستل او څارنوالۍ ته وروپېژندل شول.

طبي او امنیتي سرچینو ناورین څېړونکي بنسټ ته ويلي، چې لږ تر لږه ۵۳۰ مصریان د سږني حج د ترسره کولو پر مهال مړه شوي دي.

دغه بنسټ د پنجشنبې پر ورځ د لومړي وزیر مصطفی مدبولي په مشرۍ جوړ شوي کنفرانس ته د نوموړي د څرګندونو له مخې ویلي، چې د ۳۱ مړینې د اوږدې ناروغۍ په پایله کې تائید شوي.

په دې راپور کې پرته له دې، چې د کوم سیاحتي شرکت نوم واخیستل شي؛ وایي، مړه شویو حاجیانو ته د سفري اسانتیاوو په ګډون طبي خدمتونه هم وړاندې شوي ندي.

دغه راز زیاته شوې؛ دې شرکتونو سعودي ته د حج د ویزو پر ځای حاجیان د شخصي لیدنو پر ویزو لیږلي، چې یوازې مکې ته د رسیدو اجازه لري.

د حج په مرسمو کې اسانتیاوې د سعودي چارواکو لخوا هغو کسانو ته نه رامنځته کیږي، چې پر شخصي ویزو یې سفر کړی وي.

دغه راز هغه حاجیان، چې مړه شوي؛ د نیولو یا ایستلو له وېرې یې مکې مکرمې ته د رسېدو لپاره د صحرا لار غوره کړې ده.

مصري چارواکي دا هم وايي، چې دې سفري شرکتونو حاجیانو ته مناسبه استوګنه هم نده چمتو کړې او د لوړې تودوخې له کبله حاجیان له ستړیاوو سره مخ شوي دي.

رویټرز راپور ورکړی، چې مصري چارواکو د راجستر شويو مصري حاجیانو په منځ کې د ۳۱ مړینې مستندې کړي، چې د مړینې لامل یې مزمنې ناروغۍ دي.

په اړوند څرګندونو کې راغلي، چې ډېري مړه شوي کسان غیر راجستر شوي کسان ول.

په دې وروستیو ورځو کې د سعودي عربستان په ښار کې، چې د تودوخې درجه د سانتي‌ګراد له ۵۱ درجو څخه هم لوړه شوې؛ په سلګونه کسان د حج د مراسمو د ادا کولو پر مهال مړه شوي دي.

اړوند خبرون:

د افغان حاجیانو لومړی کاروان کابل ته راستون شو

د تونس ولسمشر د مذهبي چارو وزیر له دندې ګوښه کړ