تازه خبرونه
د هلمند په مارجه ولسوالۍ کې کروند ګر د کوکنارو له دودیز بدیل کښت ناراضه دي
د مارجې ولسوالۍ د ولسوال مرستیال میرزا محمد ترابي ویلي؛ له کرونګرو سره د اصلاح شویو تخمونو مرستې شوې او اوس هم هڅه کوي، چې دې کروندګرو ته نورې ډېرې مرستې ورسوي.
د هلمند ولايت مارجه ولسوالي، چې په وروستيو کلونو کې د کوکنارو د کښت ستر مرکز یادېده؛ اوس په کې د کوکنارو پر ځاى بديل دودیز کښت ته زمینه برابره شوې؛ خو کروندګر یې وايي؛ د کوکنارو له بديل دودیز کښت عايد څخه د خپلې کورنۍ اړیتاوې پوره کولی نشي.
کروندګر له حکومت څخه د کوکنارو د بدیلو کښتونو غوښتنه کوي.
محمد عیسی کروندګر، چې په څلور جریبه ځمکه کې د پنبې او ریحانو کښت کړی د خپل کښت څخه رضایت نه ښیي او څرګندوي: مخکې یې کوکنار کرل، چې له هغې څخه يي زیاتې پیسې پیدا کولي؛ خو اوس خپل لګښتونه هم پوره کولی نشي.
د دې ولسوالۍ یو بل کروندګر محمد اسماعیل وایي؛ د کوکنارو له بندېدو سره یې اقتصاد کمزوری شوی او نشي کولی، چې پر کښتونو شوي لګښتونه پوره کړي.
د مارجې ولسوالۍ د ولسوال مرستیال میرزا محمد ترابي ویلي؛ له کرونګرو سره د اصلاح شویو تخمونو مرستې شوې او اوس هم هڅه کوي، چې دې کروندګرو ته نورې ډېرې مرستې ورسوي.
په مارجه ولسوالۍ کې اوسمهال غنم، جوار، ریحان ، پنبه او ځیره ډېره کرل کیږي. د کروندګرو د څرګندونو له مخې؛ دا دودیز بدیل کښتونه یو هم دومره حاصل نکوي، چې د خپلو کورنیو اړتیاوې پري پوره کړې.
