د ملي ازموینو ادارې د یکشنبې پر ورځ (د غویی اوومه) په یوه خبري کنفرانس کې د ۱۴۰۴ کال د کانکور ازموینې نېټه او جزئیات اعلان کړل.

د دې ادارې چارواکو ویلي، چې د سږ کال کانکور ازموینه به د غبرګولي پر اوومه پیل شي او د چنګاښ  تر شلمې پورې به روان وي.

د دې ادارې د چارواکو د څرګندونو له مخې؛ سږ کال به د کانکور ازموینه په پېنځه پړاوونو کې ترسره شي.

د ازموینو اداره وايي، چې د سږ کال د کانکور ازموینې لپاره ښه چمتووالی نیول شوی او د موجوده نصاب پر بنسټ، د پوهنې وزارت په پښتو، فارسي، عربي او انګلیسي ژبو کې نوي او معیاري پوښتنې جوړې کړې دي.

د ورکړ شویو جزئیاتو له مخې؛ لومړۍ پړاو به د غبرګولي پر اوومه، اتمه او نهمه ترسره او دوه‌یم پړاو به د همدې میاشتې پر اتهءویشتمه، نهه‌ویشتمه او دېرشمه ترسره شي.

ویل کیږي، چې د کانکور ازموینې درېیم پړاو به په تخار، جوزجان، بادغیس، کندوز، سرپل، هرات، بلخ، فاریاب، سمنګان او بدخشان ولایتونو کې ترسره او څلورم پړاو به په کابل کې ترسره شي.

د ازموینو ادارې ویلي؛ پېنځم پړاو، چې د چنګاښ پر شلمه به په کابل ولایت کې ترسره شي؛ په ځانګړي توګه د دیني مدرسو، ځانګړو ښوونځیو (څوارلسم پاس)، ولایتي غیر حاضر، بهرنیو فارغانو او د شپې ښوونځیو لپاره دی.

اسلامي امارت له نن پوره ۴۷ کلونه مخکې د ۱۳۵۷ لمريز لېږدیز کال د غویی(ثور) اوومه او ورپسې د افغانستان پرحریم د شوروي اتحاد تېری غندي او د غویی اتمه بیا د هېواد د آزادۍ تاریخي ورځ بولي.

د غویی د اوومې او اتمې تاريخي ورځو په اړه افغانستان اسلامي امارت په نننۍ( د غویی اوومه) خپره شوې خبرپاڼه کې څرګندوي: «د ثور پر اوومه شوروي اتحاد د لښکرو لخوا د وخت د حکومت پرضد نظامي کودتا وشوه او د يو مسلمان ملت پر حريم د تېري لپاره زمینه مساعده شوه.»

د اسلامي امارت د خبرپاڼې له مخې؛ «دا کار د دې لپاره وشو، چې د افغانستان خاوره خپله مستعمره او خلک يې د ځان غلامان وګرځوي او خپله مفکوره پرې تحميل کړي؛ خو د افغانستان آزادي غوښتونکو مسلمانانو پر تش لاس د شلمې پېړۍ د شوروي استعمار خوب رښتيا کېدو ته پرې نښود؛ په ميړانه يې پوره (۱۴) کاله مبارزه وکړه او بالاخره يې د ۱۳۷۱ لمريز لېږدیز کال د غویی پر اتمه خپله آزادي او استقلال تر لاسه کړ.»

د خبر پاڼې له مخې: هغه مهال د افغانستان مظلوم او ځورېدلي خلک خوښ ول، چې د خپل څوارلس کلنې مبارزې د ثمره يې تر لاسه کړه او نور به په وطن کې د آزادۍ، آرامۍ او د خپلې خوښې شرعي نظام تر سيوري لاندې ژوند ته پرېښودل شي؛ خو «څو جاه طلبو او د قدرت تږيو يې يو ځل بيا سپېڅلي آرمانونه د تنظیمي جګړو او خپلمنځي اختلافاتو په اور کې لولپه کړل» او د افغانستان د خلکو سترې هيلې او د سوچه شرعي نظام د راتګ او استحکام اميدونه خاورې شول.

ویل کیږي، چې اوس اسلامي امارت د خپل هېواد د خپلواکۍ د اعادې، وحدت او اتفاق راوستلو، د هرج و مرج له منځه وړلو او شرعي نظام د نفاذ لپاره رامنځتهشوی او خپلهدف ته رسیدلی دی. اوس د دې وخت دې، چې له دې شرعي نظام څخه کلکه ساتنه وشي او د یو باثباته او د اسلامي نظام د لرونکي افغانستان د دوام او قوام لپاره ټول افغانان سره یو موټی او متعهد واوسئ.

پولیسو د یکشنبې پر ورځ ویلي، چې یو موټر چلوونکی د کاناډا په لویدیځ ښار کې د ونکوور د سړک غاړې پر فلیپیني ننداریزو مراسمو خپل موټر وروړ او یو شمېر کسانو ته یې مرګ او ژوبله واړوله.

پولیسو په ایکس پاڼه کې د موټر چلوونکی له نیولو خبر ورکړی دی.

یوه عیني شاهد ویلي، چې پر ګڼه ګوڼه له ورختلو مخکې یې په دې ننداریزه سیمه کې یو تور موټر په بې نظمه حالت کې ولیده.

د وینکوور سان ورځپاڼې ویلي، چې زرګونه خلک په سیمه کې ول.