د امریکا خزانې وزارت ویلي، امریکا د سې‌شنبې پر ورځ د حماس پر ۶ لوړپوړیو چارواکو بندیزونه ولګول؛ ځکه، چې واشنګټن په غزه کې د اوربند او د یرغمل شویو بندیانو د خلاصون په لټه کې دی او د فلسطیني جنګیالیو پر ضد به نورې هڅې هم تر سره کړي.

د امریکا خزانې وزارت په خبرپاڼه بیان کې راغلي؛ دا بندیزونه په بهر کې د حماس پر استازو، د حماس د پوځي څانګې پر یو لوړپوړي غړي او هغو کسانو لګېدلي، چې حماس تمویلوي او غزې ته د وسلو په قاچاق کې لاس لري.

حماس په یوه خبرپاڼه کې دا بندیزونه غندلي او له امریکا یې غوښتي، چې پخپلې جرمي پالیسۍ بیاکتنه وکړي او د دې ډلې پر وړاندې خپل ړوند تعصب ودروي.

د امریکا د خزانې وزارت ویلي، د حماس د پوځي څانګې د اوږدې مودې غړی عبدالرحمن اسماعیل عبدالرحمن غنيمت، چې اوس په ترکیه کې دی؛ تر بندیزونو لاندې راغلی.

د امریکا خزانې وزارت ویلي، هغه په ​​ګڼو هڅو او بریالۍ ترهګریزو بریدونو کې پر لاس لرلو تورن دی.

حماس ویلي د خزانې وزارت خپور شوی نوملړ د ناسمو څرګندونو او سرچینو پربنسټ راټول شوي، چې هدف یې د دوی د مشرانو ناسمه پېژندنه ده.... په داسې حال کې، چې پر اشغالګرو جنایتکارو مشرانو بندیزونه له پامه غورځول شوي.

امریکا د دوشنبې پر ورځ ترکیې ته د حماس د مشرتابه د کوربتوب په اړه خبرداری ورکړی او څرګندوي؛ واشنګټن زغملی نشي، چې د یوې وسلوالې ډلې مشران دې په آرامه ژوند وکړي.

د حماس پر مشرۍ وسلوالو د ۲۰۲۳ د اوکټوبر پر اوومه د اسرائیلو پر خاوره برید وکړ، چې د اسرائیلو د معلوماتو له مخې یې ۱۲۰۰ کسان ووژل او له ۲۵۰ ډطر یې یرغمل کړل.

دغه راز د فلسطین روغتیايي چارواکو ويلي؛ له تېر کال راپدېخوا په غزه کې د اسرائیلو پر ځمکنیو او هوایي بریدونو له ۴۳۵۰۰ ډېر فلسطینیان وژل شوي، غزه ویجاړه شوه او له دوه میلیون ډېر د غزې اوسیدونکي بې ځایه شوي دي.

د رویټرز د څرګندونو له مخې؛ پوتین اوکراین ته د واشنګټن د اوږده واټن ویشتونکیو توغندیو د کارولو له پرېکړې سره هممهاله د روسیې د اټومي نظریې نوې نسخه تصویب او لاسلیک کړه.

د دغې نظریې له مخې؛ که روسیه د کوم اټومي ځواک پر ملاتړ د توغنديو هدف وګرځي؛ نو مسکو کولی شي اټومي وسلې وکاروي. د روسیې د رسمي اټومي نظریې د بدلولو پرېکړه د نیویارک ټایمز د وروستي راپور په اړه د کرملین د غبرګون ښکارندویي کوي، چې د امریکا د ولسمشر جو بایډن لخوا اوکراین ته د اوږده واټن ویشتونکیو توغندیو د کارولو شین څراغ ښکاره شوی دی.

په دې نوی نظریه کې، چې د روسیې لخوا د اټمی وسلو د احتمالی کارونې ګواښونه وړاندې کوی؛ پر دغه هېواد د ملاتړو توغندیو، بې پیلوټه الوتکو یا نورو الوتکو برید به مسکو د اټمی وسلو کارولو ته اړ کړي.

په دې سند کې دا هم ویل شوي: د یوه هېواد لخوا پر روسیې برید، چې د ائتلاف غړی وي؛ د ټول ائتلاف لخوا د روسیې پر ضد د تېري معنا لري.

د امریکا د ۲۰۲۴ کال د ولسمشرۍ له ټاکنو څو اوونۍ مخکې پوتین د روسیې په اتومي نظریو او اصولو کې د بدلون امر کړی و.

یوه لوړپوړي لبناني چارواکي رویټرز خبري سرچینې ته ویلي، چې د لبنان حکومت او حزب الله له اسرائیلو سره د اوربند لپاره د امریکا له وړاندیز سره موافقه کړې؛ خو د منځپانګې په اړه ځینې وړاندیزونه لري.

هغه د امریکا دغه وړاندیز د جګړې د پای ته رسولو لپاره تر ټولو اړینه هڅه یاده کړې ده.

اسرائیلو تر اوسه د دې خبر په اړه کوم غبرګون ندی ښودلی.

پر لبنان د اسرائیلي پوځ پراخ بریدونه روان دي او تر اوسه دغه جګړه په لبنان کې د څو زره کسانو د وژل کېدو او د بیروت له جنوب او شاوخوا سیمو څخه د شاوخوا یو نیم میلیون خلکو د بې ځایه کېدو لامل شوې هم ده.

د لبنان پارلمان د مشر نبيه بري مرستیال علي حسن خلیل ویلي، هېواد یې په لبنان کې د امریکا سفیر ته خپل لیکلي ځواب وړاندې کړی دی. همدا راز د سپینې ماڼۍ سفیر آموس هوکشتاین هم د خبرو اترو د دوام لپاره بیروت ته تللی دی.

آموس هوکشتاین د اسرائیل او لبنان ترمنځ یو امریکایی منځګړی دی. هغه يهودي دی او د قدس په ښار کې زېږېدلی دی. له دې مخکې د آموس هوکشتاین پر منځګړیتوب لبنان او اسرائیلو د سمندري سرحدونو د ټاکلو لپاره بریالي غیر مستقیم مذاکرات ترسره کړل. دا خبرې اترې د دې لامل شوې، چې د اسرائیلو او لبنان تر منځ سمندري پولې وټاکل شي.

له دې مخکې د لبنان حزب الله منلې وه، چې د شیعه ډلې او د لبنان د پارلمان مشر نبيه بري به د حزب الله پر استازیتوب خبرې اترې کوي.

خلیل رویټرز ته ویلي: لبنان خپل نظرونه په بیروت کې د امریکا سفیر ته په یوه یاددښت کې وړاندې کړي دي.

هغه د جزئياتو له ورکولو ډډه کړې؛ خو څرګندوي: ټول هغه نظرونه، چې مونږ وړاندې کړي؛ د ملګرو ملتونو د امنيت شورا د ١٧٠١ نمبر پرېکړه ليک له ټولو جزئياتو سره سمون خوري.

د امنیت شورا ۱۷۰۱ پرېکړه لیک په ۲۰۰۶ کال کې د لبنان د حزب الله او اسرائیلو تر منځ پخوانۍ جګړه پای ته ورسوله.

په دې پرېکړه لیک کې ټینګار شوی، چې حزب الله باید د لبنان او اسرائیلو په سرحدي سیمه کې تر لیطاني سینده (جنوبي لبنان) پورې پوځي حضور ونلري. دا په دې معنی ده، چې د لبنان او اسرائیلو تر منځ له پولې څخه ۳۰ کیلومټره واټن دی.

خلیل د اسرائیلو او لبنان ترمنځ د اوربند لپاره د امریکا لخوا وړاندیز شوي پلان ته په نغوته کې ویلي، چې د دې نوښت بریالیتوب اوس له اسرائیلو سره تړاو لري. که اسرائيل د حل لار نه غواړي؛ نو سل ستونزې رامنځته کولی شي.

رویټرز لیکي، چې اسرائیلو مخکې ویلي وه، چې له اسرائیلو سره د لبنان په پولو کې د حزب الله نظامي ځواکونو او د حزب الله د وسلو د شتون له کبله د ۱۷۰۱ پرېکړه په سمه توګه پلي شوې نده.

لبنان هم پر اسرائیل تور لګوي، چې د دغه هېواد په فضا کې ناقانونه الوتنې کوي.

د لبنان د پارلمان مشر خلیل دستیار زیاته کړې: اسرائیل هڅه کوي، چې خبرې اترې د اور لاندې راولي او پر مونږ فشار راوړي.

هغه په ​​بیروت او د هغې پر جنوبي سیمو (ضاحیه) د اسرائیلو د بریدونو زیاتوالي ته نغوته وکړه، چې د حزب الله د فعالیتونو مرکز دی.

  د لبنان له حزب الله وروسته امل غورځنګ د لبنان تر ټولو مهمه شیعه ډله ده.  که څه هم د حزب الله د پراخو فعالیتونو کچه له امل سره د پرتلې وړ نده..