تازه خبرونه
د طالبانو مرکچي ډلې ځینې غړي د خبرو لپاره تر اوسه قطر ته ندي ستانه شوي
د طالبانو اړوند سرچینو ویلي، چې د مرکچي ډلې ځینې غړي د خپلو کورنیو له غړیو سره لیدنې لري او تر دوه ورځو به دوحې ته ستانه شي.
په قطر کې د افغانانو تر منځ د سولې د خبرو له دوه یم پړاو پیلېدو او د کاري کمېټو له څو ناستو سره په یوه وخت سرچینو ویلي، چې د طالبانو سیاسي مرستیال ملا عبدالغني برادر او د طالبانو د مرکچي پلاوي مشر عبدالحکیم حقاني قطر ته ستانه شوي ندي.
په قطر کې د طالبانو د سیاسي دفتر ویاند محمد نعیم وایي؛ پر موضوعګانو خبرې پیل شوي او مخ پر وړاندې روان یو. بیا هم په دې اړه کومه ستونزه نلرو او چمتو یو.
د طالبانو مسوولین په دوحه کې د افغانانو د لومړي پړاو خبرو له پای ته رسېدو وروسته د لیندۍ پر ۲۴ له قطر تللي وه، چې ځینې یې اوس هم قطر ته ندي تللي.
سرچینو ویلي، چې د طالبانو دا غړي د خپلو کورنیو له غړیو سره ګوري او تر دوه ورځو به قطر ته ولاړ شي.
د طالبانو پخواني غړي سید اکبر آغا ویلي: یو شمېر يې، چې ځانګړي کارونه لري، د همدې دلیل له مخې پاتې دي؛ خو داسې څه، چې پاکستان غوښتي وي فکر نه کوم، چې حقیقت ولري.
د افغانستان جمهوریت پلوی پلاوی د طالبانو په شمېر کې کمی نه مني او یوازې وایي، چې د طالبانو د کاري کمېټې اووه غړي په قطر کې دي سره پر خبرو اخته ده.
د افغانستان جمهوریت پلوي مرکچي پلاوي ځینې غړي وایي، چې تر اوسه د دواړو لوریو د مرکچیانو تر منځ عمومي ناستې ندي پیل او په همدې خاطر دوی د طالبانو د استازیو پر حضور او یا نه حضور خبر ندي.
د جمهوریت پلوي مرکچي پلاوي غړی غلام فاروق مجروح وایي: د اجندا پر جوړښت او راټولولو کار روان دی او هیله من یو، چې راروانه اوونۍ د اجندا پر جزئیاتو کار پیل کړو.
ځینې پدې باور دي، چې که د طالبانو د مرکچي ډلې مشران دوحې ته نه وي ستانه شوي؛ خبرې نورې هم اوږدې کېدی شي.
تازه خبرونه
ایران او پاکستان د افغانستان په اړه ګډه اعلامیه خپره کړه
ایران او پاکستان په یوه ګډه اعلامیه کې د یو سولهییز، متحد، خپلواک او له ترهګرۍ او نشهیي توکو قاچاق څخه د پاک افغانستان په اړه پخپلو ژمنو ټینګار څرګند کړی دی.
دواړو لوریو د ترهګریزو ډلو شتوالي ته په افغانستان کې نغوته کړې، چې سیمې او نړۍ ته امنیتي ګواښ دی؛ نو پر وړاندې یې پر مبارزه، همکارۍ او متحدې جبهې جوړولو ټینګار کړی دی.
دوی دغه راز د سیمې د امنیت او ثبات د ډاډمنولو لپاره د سیمهییزې او نړیوالې همغږۍ د اړتیاوو پر اهمیت خبرې کړې دي.
دواړه لوري د افغانستان حاکمیت او ځمکنۍ بشپړتیا ته د احترام کولو تر څنګ څرګندوي؛ د دې هېواد ټولې خواوې باید په بنسټیزو پرېکړو کې ونډه ولري، چې په هېواد کې د سولې او ثبات لامل شي.
تازه خبرونه
له ۱۰۰۰ ډېر افغان مهاجرین له پاکستان څخه جبري وایستل شول
د مهاجرینو چارو وزارت ویلي، چې د غویي پر څلورمه د سپین بولدک له فرضي کرښې څخه ۱۰۰۱ افغان مهاجرین پر جبري بڼه خپل هېواد ته راستانه شول.
د کندهار سپین بولدک سرحدي آمریت د راپور له مخې؛ ۱۹۱ کورنۍ، چې ۹۹۸ کسان دي او درې کسان نور، چې له بنده ازاد شوي؛ په جبري توګه له پاکستان څخه هېواد ته راستانه شول.
د مهاجرینو چارو وزارت د څرګندونو له مخې؛ د مهاجرینو چارو له ریاست سره له نوم لیکنې وروسته د نورو مرستو لپاره د ملګرو ملتونو عالي کمېشنرۍ، د مهاجرت او د خوړو نړیوالې ټولنې دفترونو ته ور وپېژندل شول.
دغه راز له ۱۸ کلونو کم عمره دوه کسان، چې بندیان ول د مرستې لپاره OMPO موسسې ته ور پېژندل شوي.
ویل کیږي، چې له هرې کورنۍ سره د حکومت له لوري لس – لس زره افغانۍ نغدي مرسته هم شوې ده.
تازه خبرونه
د ټرانسپورټ او هوايي چلند وزارت چارسمبالي د ازبکستان په شپږ اړخیزه غونډه کې ګډون وکړ
د ټرانسپورټ او هوايي چلند وزارت چارسمبالي حميدالله اخوندزاده پرون (سې شنبه د غویی څلورمه) د يوه پلاوي پر مشرۍ ازبکستان ته سفر کړی او د دې هېواد پر کوبتوب یې د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ په شپږ اړخيزه غونډه کې ګډون وکړ.
د افغانستان پلاوي په دې کتنه کې د نورو هېوادونو له استازیو سره د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ د شپږ اړخيز دهليز له لارې د راکړې ورکړې د پراختيا په اړه خبرې وکړې.
د ټرانسپورټ او هوايي چلند وزارت ويلي، چې د دې غونډې په څنډه کې د دغه وزارت چارسمبالي د روسیې او بلاروس د ټرانسپورټ له مرستیالانو سره هم وکتل.
دغه راز د ټرانسپورت او هوايي چلند وزارت چارسمبالي د روسيې او بېلاروس د ټرانسپورټ وزارتونو له مرستيالانو سره د افغانستان او روسيې، افغانستان او بېلاروس ترمنځ د ټرانزيټي لارو د پراختيا او د ټرانسپورټي اسانتياوو د برابرولو په اړه خبرې وکړې.
ویل کیږي، چې د ټرانسپورټ او هوايي چلند وزارت چارسمبالي د افغانستان په چارو کې د ازبکستان د ولسمشر ځانګړي استازي او د ټرانسپورټ له وزیر سره دوه اړخیزې ناستې کړي او د دواړو هېوادونو ترمنځ یې د ټرانزیټ پر پراختیا بحث او خبرې کړې دي.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
سیمه ییز خبرونه2 days ago
د ایران ولسمشر پر درې ورځني سفر پاکستان ته ولاړ
-
تازه خبرونه2 days ago
راشد خان د افغان بیسیم سوداګریز سفیر شو