د سومالیا د موګادیشو په یوه هوتل کې لږ تر لږه ۱۲ کسان ووژل شول

په سومالیا کې امنیتي چارواکو ويلي، د پلازمېنې موګادېشو پر یوه هوټل د الشباب وسلوالې ډلې په برید کې لږ تر لږه ۱۲ کسان وژل شوي دي.

پولیس وايي، وسلوالو لومړی د هوتل په دروازه کې دوې چاودنې وکړې او هوتل ته له ننوتو وروسته یې ډزې پیل کړې.

ویل کېږي، چې د پولیسو له لوري له دې هوتله لسګونه کسان په خوندي توګه ایستل شوي دي.

یوه ځايي چارواکي محمد عبدالقادر په دې اړه ويلي: امنیتي ځواکونه د هغو ترهګرو د له منځه وړلو هڅې کوي، چې د هوتل ودانۍ په یوه خونه کې ځای پر ځای شوي دي.

ډېری ملکي خلک له هوتله ایستل شوي؛ خو لږ تر لږه د اته ملکي کسانو وژل کېدل تائید شوي دي.

له دې مخکې د الشباب ډلې ته منسوبې یوې اوبپاڼې ادعا کړې، چې یو شمېر وسلوال یې حیات هوتل ته ننوتي او پرلپسې ډزې کوي.

دا هوتل د سومالیا فدرالي حکومت چارواکو د لیدنې، کتنې لپاره مهم ځای دی. مخکې د سومالیا امین امبولانس خدماتو ادارې مشر عبدالقادر عبدالرحمان رویترز خبري آژانس ته ویلي وه، نهه کسان په دې پېښه کې ټپیان شوي او له هوتله بهر ایستل شوي دي.

پر خواله رسنیو داسې ناتائید شوې کلیپونه خپاره شوي، چې له هوتله پورته شوي لوګي ښيي او ډزو غږونه په کې اورېدل کېږي.

رویترز راپور ورکړی،  چې د هوتل لویې برخې د جګړې له امله ویجاړې شوې دي.

الشباب ډله، چې د القاعده وسلوالو یو څانګه ده، له اوږدې مودې راپدیخوا له سومالیا فدرالي حکومت سره په جګړه کې ښکېله ده.

د سویلي او مرکزي سومالیا په ډېرو برخو کې دا ډله فعاله ده او هغو سیمو ته په نفوذ کولو کې هم بریالۍ شوې، چې د موګادیشو حکومت په کنټرول کې دي.

په دا وروستیو اوونیو کې د ایتوپیا او سومالیا د پولې په اړوند سیمو کې هم داسې بریدونه شوي، چې دې ډلې ته منسوبې بلل کېږي او دې چارې د الشباب نوې ستراتیژۍ په اړه اندېښنې راپورته کړې دي.

د SITE Intelligence Group، چې د جهادي ډلو بیانونه څاري د یوې ژباړې له مخې، د القاعدې سره تړلې الشباب ډلې د برید مسوولیت منلی دی.

الشباب له لسو کلونو راپدیخوا د سومالیا د حکومت د نسکورولو لپاره جګړه کوي.

رویترز راپور ورکړی، چې دوی غواړي د اسلامي قانون د سخت تفسیر پر بنسټ خپله واکمني جوړه کړي.