د اسرائیلو دفاع وزیر د سې شنبې پر ورځ( د لړم پېنځلسمه ) په غزه کې له پرله‌پسې ناکامیو وروسته له خپلې دندې لرې شو.

اسرائیل د لومړي وزیر دفتر د سې شنبه په ماښام اعلان وکړ، چې بنیامین نتنیاهو د دې هېواد د دفاع وزیر یواو ګالانټ له دندې ګوښه کړ.

دې دفتر زیاته کړې، چې د دې هېواد د جګړو د مدیریت پر سر د نتنیاهو او ګالانټ ترمنځ ډېر اختلافونه ول.

د اسرائیلو د لومړي وزیر بنیامین نتنیاهو دفتر اعلان کړی، چې د اسرائیلو د دفاع وزیر یواف ګالانټ پر ځای یسرائیل کاټز د نوي دفاع وزیر په توګه ټاکل شوی دی.

یواو ګالانټ د اسرائیلو له دفاع وزارت څخه له ګوښه کېدو وروسته په اېکس کې لیکلي: د اسرائیل د امنیت ټینګښت زما د ژوند ماموریت او وي به.

د راپورونو له مخې؛ د نتنیاهو د حکومت یو شمېر مخالفان د دې پرېکړې پر ضد د اعتراض لپاره د دغه ښار سړکونو ته راوتلي او په بیت‌‎المقدس کې د لومړي وزیر د استوګنې لار د پولیسو ل‎خوا تړل شوې ده.

دا په داسې حال کې ده، چې اسرائیل د ایران د یوه بل شوني برید لپاره چمتوالی نیسي.

امريکايي رسنيو خبر ورکړ، چې د امريکا د ولسمشرۍ په ټاکنو کې د رای اچونې بهير پيل شوى دى.

د راپورونو له مخې، د ۵۰ ایالتونو په ۲۵ هغو کې د رای اچونو ځایونه پرانیستل شوي او په نورو کې به هم پرانیستل  شي.

په واشنګټن ډي سي، فلوریډا، ایلینویز، جورجیا، آلاباما، ډیلاویر، مریلنډ، میساچوسټس، پنسلوانیا او میسوري کې د رای ورکولو مرکزونه لا دمخه پرانیستل شوي دي.

د نظرپوښتنو له مخې، د جورجیا، اریزونا، نیواډا، میشیګان، شمالي کارولینا، پنسلوانیا او ویسکانسن په اووه ایالتونو کې به د ټاکنو بریا پرېکنده وي.

که ډونالډ ټرمپ وګټي؛ نو د دوه‌یم ځل لپاره به سپینې ماڼۍ ته ننوځي.

که کامالا هریس یې وګټي؛ نو د امریکا په تاریخ کې به لومړۍ ښځینه ولسمشره شي.

د امریکا د ولسمشریزو ټاکنو لپاره رای اچونه په داسې حال کې پیل شوې، چې د جمهوري غوښتونکیو نوماند ډونالډ ټرمپ او ډیموکراټې نوماندې کامالا هریس ترمنځ سیالي روانه ده.

نن سې‌شنبه( د لړم پېنځلسمه ) د امریکا یو شمېر خلک په ولسمشریزو ټاکنو کې د رای اچونې لپاره د رایو هغو مرکزنو ته ځي، د جمهوري غوښتونکیو له ګوند څخه ډونالډ ټرمپ او له ډیموکراټ ګوند څخه کامالا هریس یې سیالي پر غاړه اخیستې ده.

نظرپوښتنې ښیي، چې دواړه نوماندان له یو بل سره سختې سیالۍ ته ولاړ دی.

تر پرون (دوشنبې د لوم څوارلسمه) شاوخوا ۷۸ میلیون امریکایانو د ټاکنو له ورځې مخکې رای ورکړه، چې د ۲۰۲۰ ز. کال د ټاکنو د ټولو اچول شویو رایو نږدې نیمايي دي.

د امریکا ډېر ایالتونه خلکو ته اجازه ورکوي، چې د ټاکنو پر ورځ د راې اچولو مرکزونو ته پر ورتګ سربېره کولی شي د پُست او برښنالیک له لارې هم خپلې رایې ولېږي.

د NBC وروستۍ نظرپوښتنه ښیي، چې هریس او ټرمپ د رایو له مخې سره برابر دي.

دواړو نوماندانو له ټاکنو یوه ورځ مخکې د شمالي او ختیځو ایالتونو په ګډون د امریکا په یو شمېر مهمو ایالتونو کې خپل ټاکنیز کمپاینونه روان وساتل.

کامالا هریس د دوشنبې پر ورځ د پنسلوانیا ایالت په الینټاون، پیټسبورګ او فلاډلفیا ښارونو کې خپل کمپاین روان وساته.

سیال یې ډونالډ ټرمپ هم د دوشنبې پر ورځ په شمالي کارولینا کې خپل کمپاین پیل کړ او بیا پنسلوانیا او میشیګان ته ولاړ.

که ټرمپ بریالی شي؛ هغه به د امریکا لومړنی ولسمشر وي، چې د ولسمشرۍ له لومړۍ دورې وروسته د دوه‌یم پړاو ټاکنې بایلي او په درېیم پړاو ټاکنو کې بریالی کیږي.

که هغه ګټونکی شي؛ نو دا شونې ده، چې په محکمو کې د هغه پر وړاندې دوسیې به باطلې کړي.

دغه راز که د ولسمشر اوسنۍ مرستیاله کامالا هریس د نن ورځې ټاکنې وګټي؛ نو هغه به د امریکا په تاریخ کې لومړنۍ ښځه وي، چې ولسمشره ټاکل کیږي.

د دوه ګوندي پالیسۍ مرکز د څرګندونو له مخې؛ د امریکا د روان کال په ټاکنو کې شاوخوا ۲۴۴ میلیون خلک د رایې ورکولو وړ دي.

د امریکا په ختیځ کې د رای ورکولو مرکزونه نن په سیمه‌ییز وخت د سهار له شپږ بجو پرانیستل کیږي او په ځینو سیمو کې به د چارشنبې د ورځې تر ۱ بجو پورې د رای اچونې بهیر روان وي.

دا په داسې حال کې ده، چې د بېلابېلو هېوادونو حکومتونه او خلک د امریکا د ټاکنو او د هغو د پایلو د څارلو هڅې کوي.