د شنبې پر ورځ (د مرغومي اتمه) د ایران د هرمزګان ولایت د بندر لنګه د پوځي استخباراتو مشر مجتبی شهیدي تختي په یوه ځانمرګي برید کې ووژل شو او یو پولیس ټپي شوی دی.

د ايراني رسنیو د څرګندونو له مخې؛ يو ځانمرګي بريد كوونكي د بندر لنګه د پوليسو سټېشن مخې ته ځان والوزولو او په دې پېښه كې مجتبی شهيدي تختي لومړی ژوبل بیا یې وروسته په روغتون كښې سا ورکړه.

د بندر لنګه امنيه قومندان فواد مرادزاده تسنيم خبري سرچینې ته ويلي: " نن ماښام امنيه قومندانۍ ته څېرمه يوه امنيتي پېښه رامنځته شوې ده."

د بندر لنګه والي دې ته په نغوته کې ویلي، چې له پېښې وروسته په سمدستي توګه امنيتي ځواکونه د پېښې سيمې ته واستول شول. په دې ځانمرګي بريد کې بريد کوونکى هم وژل شوى دى.

د تسنیم د خبر له مخې؛ ځانمرګي بریدګر د ریموټ کنټرول پر کارولو د پولیسو د دوه افسرانو د تګ - راتګ په لاره کې ځان ته چاودنه ورکړې ده.

د راپورونو له مخې؛ د ایران د انصارالفرقان اهل سنت وسله والې ډلې په یوه خبرپاڼه کې د دې برید مسوولیت پر غاړه اخیستی او څرګندوي، چې دې برید مهم استخباراتي کسان پر نښه کذي دي. 

یوه مسافر وړونکې الوتکه، چې له آذربایجان څخه روسیې ته روانه وه؛ په قزاقستان کې راولوېده او ګڼ شمېر مسافر یې وژل شوي دي.

د قزاقستان چارواکو ویلي؛ یوه امبرایر مسافر وړونکې الوتکه، چې له ۶۷ مسافرو او ۵ کارکوونکیو سره له آذربایجان جمهوریت څخه روسیې ته الوتنه کوله د چارشنبې پر ورځ ( د مرغومي پېنځمه) د قزاقستان د اق‌تاو ښار ته نږدې پر ځمکه ولګېده. د لومړنيو راپورونه له مخې ۲۷ کسان یې ژغورل شوي دي.

په ټولنیزو رسنیو کې یوه ویډیو ښیي؛ د آذربایجان د هوايي شرکت یوه الوتکه د اور لګېدنې په حال کې ده، چې له ځمکې سره له لګېدو وروسته ترې سرې لمبې او تور لوګی پورته کیږي.

د قزاقستان د بېړنیو حالاتو ادارې د خبرپاڼې له مخې؛ اور وژونکیو اور مړ کړی او د پېښې ژوندي پاتې شوي کسان په نږدې روغتون کې تر درملنې لاندې دي.

دې ادارې په دې پېښه کې د ۴۲ کسانو له وژل کېدو خبر ورکړی دی.

د آذربایجان هوايي شرکت هم اعلان کړی، چې امبرایر - ۱۹۰ ډوله الوتکه د آذربایجان له پلازمېنې باکو څخه د روسیې د چیچن جمهوریت پلازمېنې ګروزني ته روانه وه؛ خو د قزاقستان له اق‌تاو څخه درې کیلومټره لرې یې بېړنۍ ناسته وکړه.

د روسیې خبري سرچینو راپور ورکړی، چې الوتکه د ګروزني په ښار کې د سختې غبار او دوړې له کبله لار بذله کړې وه.

د روسیې د انټرفاکس خبري سرچینې د راپور له مخې؛ د قزاقستان چارواکو اعلان وکړ، چې دوی د تخنیکي خرابۍ په ګډون د الوتکې د غورځیدو د احتمالي لاملونو په اړه څېړنې پیل کړې دي.

د روسیې د هوايي چلند د څار ادارې د خبرپاڼې له مخې؛ لومړني معلومات ښيي، چې پیلوټ د یوې مرغۍ له لګېدو وروسته د بېړنۍ ناستې پرېکړه کړې ده.

د روسیې ریانو خبري سرچینې راپور ورکړی، چې د الوتکې له غورځېدو وروسته د آذربایجان ولسمشر الهام علی‌یوف د چارشنبې پر ورځ په روسیه کې له یوې غونډې څخه خپل هېواد ته راستون شو.

د سپینې ماڼۍ د ملي امنیت سلاکار جیک سالیوان څرګنده کړې، چې ایران ښايي په سیمه کې له پرله‌پسې ماتې د اټمي وسلو پر پراختیا راوڅرخیږي.

رویټرز خبري سرچینې د یکشنبې پر ورځ ( د مرغومي دوه‌یمه) خبر ورکړ، چې د بایډن اداره پدې اړه اندېښمنه ​​ده.

د راپور له مخې؛ سپینه ماڼۍ غواړي، چې دا اندېښنه د امریکا له منتخب ولسمشر ډونالډ ټرمپ ته هم وړاندې کړي.

په راپور کې راغلي، چې د ایران د نیابتي ډلو پر وړاندې د اسرائیلو له پراخو بریدونو او د بشارالاسد د حکومت له نسکورېدو وروسته دې هېواد نه یوازې خپل سیمه‌ییز نفوذ له لاسه ورکړی، بلکې له پرله‌پسې ناکامیو سره هم مخ شوی دی.

د سپینې ماڼۍ د ملي امنیت سلاکار سیانان ته ویلي، چې پر ایراني تاسیساتو د اسرائیلو بریدونو د توغندیو د کارخونو په ګډون د دې هېواد هوايي دفاعي سیسټم او دودیز پوځي توان کم کړی دی.

سالیوان ټینګار کړی: دا د حیرانتیا خبره نده، چې په ایران کې د اټومي وسلو لرلو ته د لیوالتیا غږ اورېدل کیږي.

هغه يادونه کړې، چې ايران وايي: اټومي پروګرام يې سوله‌ييز دى؛ خو له بنديزونو سره - سره يې د يورانيمو غني کول پراخه کړي دي.

د سپینې ماڼۍ د ملي امنیت شورا سلاکار ویلي؛ دا خطر شته، چې ایران به د اټومي وسلو د نه جوړولو په اړه خپله ژمنه ودروي.

هغه منلې، چې په دې اړه د امریکا له نوي حکومت سره خبرې کوي او په دې اړه یې له تل‌ابیب سره هم خبرې کړې دي.

نړیوالې تمې او سترګې د نوي کال د جنورۍ پر شلمه هغې ورځې ته اوړي، چې ټرمپ سپینې ماڼۍ ته ننوځي.

ویل کیږي، چې هغه د بایډن د حکومت پر پرتله د تهران پر وړاندې سخت دریځ لري.