عمران خان پخپل پیغام کې ټینګار کړی، چې: «د سړکیز خوځښت لپاره چمتو شئ؛ ټول خلک باید د خپلو حقونو د ترلاسه کولو لپاره راپورته شي.»

هغه ویلي؛ د دې غوښتنې موخه د قانون حاکمیت، عدالت او د هغه څه پر وړاندې مبارزه ده، چې ده ورته «سیاسي او له مخکې ټاکل شوې پرېکړې» ویلې ده.

د پاکستان پخواني لومړي وزیر په ایکس پاڼه کې لیکلي: وروستۍ پرېکړه، چې د ده پر ضد صادره شوې؛ د سیاسي فشارونو د لړۍ یوه برخه او د قانوني اصولو او د دفاع له فرصت ورکولو پرته صادرې شوې ده.

د هغه پر اند، د دې وضعیت دوام به د پاکستان عدلي او قضایي نظام له جدي مشروعیتي بحران سره مخ کړي.

عمران خان همدارنګه له حقوقي ټولنې، وکیلانو او د اساسي قانون له مدافع بنسټونو غوښتي، چې د ولس تر څنګ ودرېږي او د قانون حاکمیت د بېرته خوندي کولو لپاره فعاله ونډه واخلي.

هغه ټینګار کړی، چې له عدالت او خپلواک قضایي نظام پرته نه سیاسي ثبات شونی دی او نه اقتصادي پرمختګ.

پخواني لومړي وزیر د خپل پیغام په بله برخه کې څرګنده کړې، چې د ده نیوکه د پاکستان د پوځ پر ادارې نده، بلکې د یوه مشخص کس پر وړاندې ده.

نوموړي زیاته کړې: «پوځ زما او د پاکستان د خلکو ملکیت دی. زما نیوکه پر عاصم منیر ده.لکه څنګه، چې په تېر کې ډیکټاټوران تر نیوکې لاندې نیول کېدل.»

د هغه د څرګندونو له مخې: هغه څه، چې پر ده په زندان کې تېرېږي؛ د پوځي چارواکو پر امر ترسره کېږي.

عمران خان اوسنی وضعیت د ۲۰۰۷ کال له پېښو سره پرتله کړې او خبرداری ورکوي، چې د قانون حاکمیت کمزوري کول به د پاکستان د راتلونکې لپاره جدي پایلې ولري.

عمران خان هغه قاضیان، چې د فشارونو پر وړاندې ولاړ دي «ملي اتلان» بللي او هغه نور، چې د ده پر وینا «بې له پوښتنې امرونه عملي کوي» د پرویز مشرف د پوځي واکمنۍ د دورې قاضیانو ته ورته دي.

هغه همدارنګه له حقوقي ټولنې او « د وکیلانوانصاف ټولنې» غوښتي، چې د قانون حاکمیت د بیا ساتلو او د اساسي قانون د خوندیتابه لپاره پوره او فعاله ونډه واخلي.

نوموړي دا ټینګار هم کړی، چې له عادلانه قضایي نظام پرته نه اقتصادي پرمختګ شونی دی او نه د ټولنې اخلاقي وده.

د عمران خان خبرپاڼه په داسې حال کې خپرېږي، چې د پاکستان سیاسي او قضایي وضعیت نور هم له پراخو ترینګلتیاوو سره مخ شوی او د دغه هېواد د پخواني لومړي وزیر د محاکمې په اړه کورني او نړیوال غبرګونونه هم راپارېدلي دي.

رویټرز راپور ورکړی، چې د پاکستان پوځ مشر جنرال آصف منیر د واشنګټن غوښتنې، چې د غزې د ثبات په ځواک کې دې برخه واخلي؛ په کور دننه له یوې سترې نوې ننګونې سره مخ کړی دی.

د خبري سرچینو د څرګندونو له مخې؛ ټاکل شوې، چې منیر په راتلونکو اوونیو کې له تېرو ۶ میاشتو راپدېخوا د ولسمشر ډونالډ ټرمپ سره د درېیم ځل لیدنې لپاره واشنګټن ته سفر وکړي.

د دغې لیدنې بنسټیزه موضوع به د غزې په ځواکونو کې د پاکستان د پوځ ګډون او د جګړه ځپلې سیمې د بیارغونې او اقتصادي جوړونې لپاره د ټرمپ د ۲۰ ماده‌یي طرحې پلي کول وي.

د ټرمپ طرحه له مسلمانو هېوادونو غواړي، چې د غزې د تېرېدا پېر او بیارغونې په بهیر کې د حماس وسلوالې ډلې بې وسلې کړي؛ خو ډېری هېوادونه په شخړه کې د لاسوهنې او د فلسطین پلوه ټولنو له‌خوا د منفي غبرګون په اړه اندېښمن شوي دي.

جنرال منیر له ولسمشر ټرمپ سره نږدې اړیکې جوړې کړې، چې له کلونو بې‌باورۍ وروسته د واشنګټن او اسلام‌آباد ترمنځ د باور رغول رامنځته کړي.

کارپوهانو ويلي، چې پاکستان تر فشار لاندې دی، چې خپله پوځي وړتیا وښيي او د امنیتي پانګوونې او مرستو لپاره د امریکا ملاتړ خوندي کړي.

منیر په دې وروستیو کې د دفاعي ځواکونو د ستر درستیز په توګه وټاکل شو او د هوايي او سمندري ځواکونو د رهبرۍ مسوولیت هم لري.

دغو نویو قانوني اصلاحاتو هغه د تل لپاره قانوني معافیته او د پرېکړې کولو له نامحدود واک څخه برخمن کړی دی.

شنونکو خبرداری ورکړی، چې په یاد ماموریت کې د پاکستان هر ډول پوځي ښکېلتیا ښایي له سیاسي تورونو او عامه فشار سره مخ شي.

کارپوهانو ويلي: جنرال منیر له استثنایي شرایطو سره مخ دی، چې ستر خطرونه به ولري؛ خو هغه باید د خپلو پرېکړو له کورنیو او سیمه‌ییزو پایلو خبر وي.

د پاکستان پوځ، بهرنیو چارو او استخباراتو وزارتونو د رویټرز پوښتنو ته له ځواب ویلو ډډه کړې او سپینې ماڼۍ هم په دې اړه د تبصرې غوښتنې ته ځواب ورنکړ.

د پاکستان بهرنیو چارو وزیر اسحاق ډار تېره میاشت ویلي وه، چې اسلام‌آباد کولی شي د سوله‌ساتو سرتېرو د لېږلو په اړه غور وکړي؛ خو د حماس بې وسلې کول “زمونږ دنده نده.”

په هرحال بنستيز خطر په کور دننه کې دی؛ اسلامي ګوندونه او په پاکستان کې ځینې سیاسي ډلې ښایي غزې ته د سرتېرو له لېږلو سره مخالفت وکړي او پراخه لاریونونه ترسره شي.

دوه امریکایي سرتېري او یو ملکي ژباړونکی د شنبې پر ورځ د داعش ډلې له‌خوا په یوه برید کې ووژل شول. دا برید هغه وخت ترسره شو، چې یو وسلوال کس په پالمیرا ښار کې د امریکایي او سوري ځواکونو پر کاروان برید وکړ.

د امریکا مرکزي قومندانۍ (CENTCOM) ویلي، چې په دې پېښه کې درې نور سرتېري هم ټپیان شوي او بریدګر د همکارو ځواکونو له‌خوا وژل شوی دی.

امریکایي چارواکو ویلي؛ د لومړنيو ارزونو له مخې؛ شونې ده، چې د برید تر شا د داعش ډلې لاس وي. که څه هم دې ډلې تر اوسه د دې برید مسوولیت ندی منلی.

د سوریې چارواکو ویلي، چې بریدګر د سوریې د امنیتي ځواکونو غړی و؛ خو د مشرتابه رول یې نه‌درلود. د امریکا ولسمشر ډونالډ ټرمپ دا برید “وحشتناک” وباله او د “ډېر سخت غچ” ژمنه یې وکړه.

په سوریه کې د امریکا پر مشرۍ ائتلاف له وروستیو میاشتو راپدېخوا د داعش د شکمنو غړو پر وړاندې هوایي بریدونه او ځمکني عملیات ترسره کړي، چې ډېر یې د سوریې د امنیتي ځواکونو په ګډون تر سره شوي دي.

سوریې تېره میاشت هم په ټول هېواد کې عملیات ترسره کړل، چې له ۷۰ ډېر کسان له دې ډلې سره د اړیکو په شک ونیول شول.

امریکا د سوریې په شمال ختیځ کې د کردانو پر مشرۍ له ځواکونو سره د مرستې لپاره د یوې لسیزې هڅې د یوې برخې په توګه پوځي شتون لري.