تازه خبرونه
د ايټاليا د بېړۍ د ډوبېدو په پېښه کې ۸۰ افغانان مړه شوي
د افغانستان اسلامي امارت د سې شنبې پر شپه په ډاګه کړه، چې د یکشنبې پر ورځ د ایتالیا په جنوبي ساحل کې د بېړۍ د ډوبیدو له کبله د ښځو او ماشومانو په ګډون ۸۰ افغانان مهاجر مړه شوي دي.
ژغورونکیو ویلي؛ تر دې دمه د کلابریا د ختیځ ساحل دمه ځای ( ستیکاتو دی کترو) ته په نږدې سمندر کې د لرګیو کښتۍ د ډوبیدو له کبله لږ تر لږه ۶۴ کسان مړه شوي دي.
رویترز راپور ورکړی، چې ۸۰ کسان ژغورل شوي؛ خو ګومان کیږي، چې ډېر نور ورک وي.
د افغانستان بهرنیو چارو وزارت په ډاګه کړې: له خواشینۍ سره مو دا خبر ترلاسه کړ؛ د ښځو او ماشومانو په ګډون ۸۰ افغان مهاجر، چې له ترکیې څخه ایتالیا ته په یوه لرګينه کښتۍ کې روان ول د ایتالیا په جنوبي سمندرګي کې ډوب او مړه شوي دي.
په خبرپاڼه کې راغلي: د افغانستان اسلامي امارت د شهیدانو لپاره د مغفرت او د ټپیانو کورنیو او خپلوانو ته د جمیل صبر او زغم دعا کوي او یو ځل بیا له ټولو هېوادوالو غواړي، چې د ناقانونه مهاجرت له لارې بهرنیو هېوادونو ته له تګه ډډه وکړي.
دا کښتۍ تېره اوونۍ د ترکیې له لویدیځ ازمیر بندره روانه شوې وه.
