نړۍ
د اندونیزیا پولیسو له افغانستان څخه قاچاق شوي دوه نیم ټنه نشه یي توکي نیولي
د انډونیزیا پولیسو ویلي؛ دوی د مخدره توکو یوه ډله قاچاق وړونکي، چې له افغانستان څخه یې دوه نیم ټنه مټ آمفټامین یا شیشه دې هېواد ته قاچاق کړې نیولي دي.
د دغو نشه یي توکو ارزښت ۸۲ میلیونه ډالر اټکل شوی دی.
د انډونیزیا پولیسو د دې هېواد په سوماترا ټاپو او د پلازمېنې جکارتا په آچه ولایت کې د نشه يي توکو د قاچاق وړونکیو پرضد یو لړ عملیات پیل کړي.
پولیسو ويلي، چې د عملیاتو په لړ کې یو شکمن قاچاقبر وژل شوی او ۱۷ نور د یو نایجریایي په ګډون نیول شوي دي.
پولیسو ویلي، چې یوشمېر نشه یي توکي د کښتۍ د خوراکي توکو په کانټینرونو او وچه کې ځای پر ځای شوي وه.
پولیسو د چار شنبې پر ورځ په یوه خبري کنفرانس کې دا توکي نندارې ته وړاندې کړل.
پولیسو ويلي؛ یو شمیر شکمن کسان دمخه د مخدره توکو پر جرمونو په بند کې دي او ځینې یې پر مرګ هم محکوم شوي دي؛ خو هغه پدې اړه جزئیات ورنکړل، چې دا خلک له زندانه څنګه ښکېل پاتې شوي دي.
دا هېواد اوس په سویل ختیځه آسیا کې د نړیوال قاچاق کوونکیو لپاره د ټرانزیت پر یو پراخ مرکز بدل شوی دی.
اندونیزیا د مخدره توکو پروړاندې یو سخت قانون لري. د دې میاشتې په لومړیو کې د ایرانيانو او پاکستانیانو په ګډون یوه ډله اندونیزیا ته د ۴۰۰ کیلوګرامه شیشې د قاچاق پر تور پر مرګ محکومه شوه.
اندونیزیا په ۲۰۱۵ کال کې د مخدره توکو د قاچاق پر تور څو خپل او بهرني اتباع هم اعدام کړي دي.
نړۍ
شمالي کوریا یو بالسټیک توغندی وتوغاوه
د رویټرز د څرګندونو له مخې؛ د سویلي کوریا پوځ په ډاګه کړې، چې څو لنډ واټن ویشتونکي بالسټیک توغندي د ټاپو وزمې ختیځ لوري ته وتوغول شول.
د جاپان ساحلي ګارد هم ویلي، چې شمالي کوریا دوه توغندي توغولي دي. دا په تېرو دوه میاشتو کې لومړی ځل دی، چې پیونګ یانګ بالسټیک توغندی توغوي.
شمالي کوریا وروستی ځل د مرغومي پر څلیریشتمه د سوپرسونیک منځني واټن ویشتونکي توغندي ازموینه ترسره کړه.
د شمالي کوریا د بالسټیک توغندي ازموینه په داسې حال کې ترسره کیږي، چې د امریکا بهرنیو چارو وزیر انټوني بلینکن د سویلي کوریا د ولسمشر یون سوک یول پر کوربهتوب د “ډیموکراسۍ په غونډه” کې د ګډون لپاره سیول ته تللی دی.
په وروستیو اوونیو کې د شمالي کوریا پوځ د دودیزو وسلو پر کارولو پوځي روزنیزې هڅې ترسره کړې، چې د شمالي کوریا مشر کیم جونګ اون یې د ډېرو څارنه هم وکړه.
د شمالي کوریا د ځواک دا ننداره په داسې حال کې کیږي، چې امریکا او جنوبي کوریا هم په دې وروستیو کې ۱۰ ورځنۍ ګډې پوځي روزنیزې هڅې ترسره کړي دي.
سیول هم په ډاګه کړې، چې له امریکا سره په دغو کلنیو ګډو روزنیزو هڅو کې یې له سمندري ځواکونو، برید ګرو چورلکو او د ځمکې او اوبو جنګي موټر کارولي دي.
د جنوبي کوریا د چارواکو د څرګندونو له مخې؛ دغه هېواد هم له شمالي کوریا سره نږدې د دغه هېواد د لویدیځو ټاپوګانو د دفاعي پیاوړتیا لپاره ، چې په ۲۰۱۰ ز. کال کې پرې پیونګ یانګ بمبارد کړی و؛ خپل ځواکونه زیات کړي دي.
نړۍ
د آیسلینډ اورشېندنې یو ځل بیا سرراپورته کړ
د آیسلینډ د هواپېژندنې ادارې څرګنده کړې، چې د شنبې پر ورځ په تېرو درې میاشتو کې د څلورم ځل لپاره د اورشېندنې له کبله لوګي او روښانه نارنجي لاوا د ځمکې سطحې ته راپورته شوه.
د رویټرز د څرګندونو له مخې؛ د ساحلي ساتونکيو له چورلکې څخه اخیستل شوې ویډیو ښیي، چې د ځمکې له یوه اوږده درزه راپورته شوې لاوا هر لوري ته خپریږي.
د آیسلینډ د هواپېژندنې ادارې په خبرپاڼه کې اټکل شوی؛ د دې اورشېندنې سطحه دوه اعشاریه ۹ کیلومټره اوږدوالی لري، چې د دې وروستيۍ اورشیندنې کچه د فبرورۍ د هغې کچې ته رسېدلې ده.
چارواکو د اوونیو لپاره د آیسلینډ پلازمېنې ریکیاویک سویلي لوري ته په ریکیانس ټاپو وزمه کې له اورشېندنې خبرداری ورکړی و.
د نورډیک د اورشېندنې مرکز مشر ریکه پډرسن ویلي؛ په رښتیا هم د دې تمه کېده.
هغه زیاته کړې: البته د اورشېندنې د بشپړ وخت وړاندویېنه نشي کیدی؛ خو د ځمکې سطحې ته یې د لومړني حرکت نښې یوازې شاوخوا ۱۵ دقیقې مخکې رامنځته شوې.
د یادې سرچینې د څرګندونو له مخې؛ داسې ښکاري، چې لاوا سویل لوري ته چټکه غځیږي او د کب نیولو ښار رینډاویک پر لور راروانه ده. دا هغه ځای دی، چې له تېرې اورشیندنې څخه د شاوخوا ۴۰۰۰ اوسیدونکیو لږ شمېر یې بېرته راستانه شوي وه.
له ښار څخه د وتلو عملیات بیا پیل شوي او چارواکو په ښار کې بېړنی حالت اعلان کړی دی.
آیسلینډ د امریکا د کنټاکي ایالت پر کچه له ۳۰ څخه ډېر فعال اورشېندنې لري او په شمالي اروپا کې د ګرځندویانو یو مهم ځای ګرځیدلی دی.
په ۲۰۱۰ ز. کال کې د سویلي آیسلینډ له اورشېندنې څخه خړې ورېځې د اروپا پر لویو برخو خپرې شوې؛ شاوخوا ۱۰۰ زره الوتنې یې وځنډولې او په سلګونه آیسلینډیان یې د خپلو کورونو پرېښودو ته اړ کړل.
نړۍ
د غزې پر یوه مرستندویه مرکز د اسرائیلو په هوايي برید کې ۲۷ کسانو ته مرګ و ژوبله اوښتې
د فلسطین روغتیايي چارواکو د چارشنبې پر ورځ ( د کب درویشتمه ) ویلي، چې د غزې په جنوبي ښار رفح کې د خوراکي توکو د وېش پر یوه مرکز پر اسرائیلي هوايي برید پېنځه کسان وژل شوي د غزې شمالي برخې ته، چې له قحطۍ سره مخ ده؛ د مرستو بندولو ګواښ هم شوی دی.
په پېښه کې د آنروا ( د فلسطیني بې ځایه شویو لپاره د مرستو رسونې او کار موندنې بنسټ ) یو کارکوونکی وژل شوی دی.
د آنروا مشر فیلیپ لازارینی ویلي؛ زمونږ د غزې د تړانګې د مرستو د وېش پر یوه مرکز په داسې حال کې هوایي برید وشو، چې د خوراکي توکو رسول پر ختمیدو دي، لوږه پراخه ده او ځینې سیمې لهه قحطۍ سره مخ شوې دي.
ملګرو ملتونو خبرداری ورکړی؛ په غزه کې لږ تر لږه ۵۷۶ زره کسان، چې د وګړیو څلورمه برخه جوړوي، د قحطۍ په څنډه کې دي.
د سې شنبې پ ورځ ملګرو ملتونو په درې اوونیو کې د لومړي ځل لپاره شمالي غزې ته د خوراکي توکو رسولو لپاره نوې ځمکنۍ لار وکاروله.
د اسرائیلو د حکومت ویاند تال هینریچ د چارشنبې پر ورځ خبریالانو ته ویلي: مونږ د غزې شمالي ته د ډېرو مرستو رسولو هڅې کړې دي.
آنروا بنسټ د اسرائیلو دا ادعا رد کړې او وایي، چې اسرائیل د فلسطینیانو د فشار لپاره له قحطۍ څخه کار اخلي.
د اسرائیلو لومړي وزیر بنیامین نتنیاهو د چارشنبې پر ورځ ویلي؛ هغه هوډ لري، چې د آنروا پرځای، چئ له حماس سره د اړیکو ادعا پرې شوې؛ د مرستو د وېش لپاره د ملګرو ملتونو ټولنه ځای پر ځای کړي
په داسې حال کې ده، چې د غزې جګړه شپږمې میاشتې ته داخلیږي، چې ورسره نه یوازې مرګ و ژوبله پراخه شوې، بلکې تر څنګ یې د مرستو رسولو غوښتنه هم ورځ تر بلې ډېریږي.
-
لوبی5 days ago
راشدخان د ایرلینډ پروړاندې د ۲۰ آوریزو نړیوالو سیالیو لوبډلمشر شو
-
تازه خبرونه2 days ago
د هند د یوه پوهنتون په لیلیه کې پر لمونځ کوونکیو برید شوی
-
تازه خبرونه1 day ago
په نوي تعلیمي کال کې دې د نجونو ښوونځي او پوهنتونونه پرانیستل شي – حامد کرزی
-
نړۍ2 days ago
د آیسلینډ اورشېندنې یو ځل بیا سرراپورته کړ
-
تازه خبرونه2 days ago
په بدخشان کې د سرو زرو کان د نړېدو له کبله دوه کارګر مړه شوي
-
نړۍ1 day ago
شمالي کوریا یو بالسټیک توغندی وتوغاوه
-
تازه خبرونه6 hours ago
امریکا په افغانستان کې له هوايي بریدونو وروسته له پاکستان څخه د زغم غوښتنه وګړه
-
لوبی8 hours ago
د افغانستان کرکټ ملي لوبډله د ۲۰ اوریز لوبلړ ګټونکې شوه