د ریاست الوزرا سیاسي مرستیال ویلي، لکه څنګه، چې اسلامي امارت له فساد او نورو ستونزو سره په مبارزه کې بریالی شوی د فقر د کمولو لپاره یې هم هڅې پیل کړي او په راتلونکو کلونو کې به د افغانستان ملي اقتصاد پیاوړی شي.

د ریاست الوزرا سياسي مرستيال په پکتيکا ولايت کې د يوې مدرسې د فراغت په مراسمو کې ويلي، چې اوس د مدرسو او پوهنتونونو فضا پوره خوندي ده او په کې د ناسمو افکارو د خپرېدو مخه نیول شوې ده.

مولوي عبدالکبیر زیاته کړې، چې په هېواد کې وسلوال مخالفان له منځه تللي او اسلامي امارت د تېر حکومت په څېر وخت نه ضایع کوي، بلکې د هېواد پرمختګ ته جدي پاملرنه کوي، په ځانګړي توګه په لرې پرتو ولایتونو کې، چې پرمختیايي پروژې په کې کمې پلي شوې دي.

نوموړی اقتصادي او امنیتي مسایلو ته هم نغوته کوي او وایي، چې په راتلونکیو کلونو کې به د هېواد ملي اقتصاد پیاوړی شي.

دغه راز مولوي عبدالکبیر د پکتیکا ولایت له سیمه‌ییزو چارواکو سره د کتنې پر مهال ویلي، چې دوی د هېواد د ټولو سیمو د پرمختګ لپاره له تبعیض پرته کار کوي.

سیاسي شنونکي ویس ناصري ویلي؛ اسلامي امارت د سیاسي او اقتصادي پرمختګ لپاره یوه جامع او متوازن پروګرام ته اړتیا لري، چې د داخلي اړتیاوو او له نړیوالو سره د تعامل پر بنسټ ولاړ وي.

د ریاست الوزرا سیاسي مرستیال ویلي، چې اسلامي امارت د پخوا پر پرتله پیاوړی شوی او دا مهال له ګڼو هېوادونو سره سیاسي او اقتصادي اړیکې لري.

د ملګرو ملتونو دې ادارې د ۲۰۲۵ کال د بودجې په غوښتنه کې ویلي؛ ۸ اعشاریه ۲ میلیارډ ډالرو ته اړتیا لري، چې ۴۹۹ میلیون او ۸۰۰ زره ډالره به پر افغانستان ولګول شي.

د مهاجرت نړیوالې ټولنې زیاته کړې؛ د دوی تمرکز د سوریې او اوکراین د وګړو ترڅنګ پر افغانانو هم دی. اسلامي امارت دا هم ويلي، چې د افغان کډوالو ته د لاسرسي لپاره نړیوالو مرستو ته اړتیا ده.

د کډوالۍ نړیوالې ټولنې د راپور په یوه برخه کې راغلي: " آی او ام  دې بودجې ته اړتیا لري او غواړي خپلې مرستې په بېلابېلو سکټورونو کې ناورین ځپلیو او بې ځایه شویو خلکو ته ورسوي. هغه خلک، چې په اوکراین کې د جګړې له کبله تښتي یا په ترکیه کې د سوریې کډوال او د منځنۍ آسیا څخه افغانان د لویدیځ بالکان هېوادونو ته د مهاجرت په لاره کې پراته دي. دا اداره ژمنه ده، چې د ښځو او کوچنیانو لپاره اړین خوندیتوب او ملاتړ چمتو کړي."

د کډوالو په چارو کې د ملګرو ملتونو د عالي کمیشنرۍ د څرګندونو له مخې، افغان کډوال په نړۍ کې له سوريايي او اوکرایني کډوالو وروسته درېیم لوی بې‌ځایه شوی نفوس دی.

د راپورونو له مخې؛ په ټوله نړۍ کې شاوخوا ۱۰ اعشاریه ۹ میلیون افغانان د جګړو، تاوتریخوالي او فقر له کبله بې ځایه شوي دي.

د اسلامي امارت ویاند ذبیح الله مجاهد وايي، چې په نړۍ کې د افغانستان د خلکو بې ځایه کیدا ځوروونکې ده او د افغان کډوالو لپاره د رښتینې او عملي مرستې غوښتنه کوي.

د کارپوهانو ویلي؛ د افغانستان ځوانان او خلک داسې وضعیت غواړي، چې کډوالۍ ته اړ نشي. داسې انګیرل کیږي، چې مناسب کاري شرایط، د اقتصادي وضعیت ښه‌والی او په حکومتولۍ او ټولنه کې د ټولو ظرفیتونو کارول کولی شي مهاجرت کم کړي.

د سپینې ماڼۍ د ملي امنیت سلاکار جیک سالیوان څرګنده کړې، چې ایران ښايي په سیمه کې له پرله‌پسې ماتې د اټمي وسلو پر پراختیا راوڅرخیږي.

رویټرز خبري سرچینې د یکشنبې پر ورځ ( د مرغومي دوه‌یمه) خبر ورکړ، چې د بایډن اداره پدې اړه اندېښمنه ​​ده.

د راپور له مخې؛ سپینه ماڼۍ غواړي، چې دا اندېښنه د امریکا له منتخب ولسمشر ډونالډ ټرمپ ته هم وړاندې کړي.

په راپور کې راغلي، چې د ایران د نیابتي ډلو پر وړاندې د اسرائیلو له پراخو بریدونو او د بشارالاسد د حکومت له نسکورېدو وروسته دې هېواد نه یوازې خپل سیمه‌ییز نفوذ له لاسه ورکړی، بلکې له پرله‌پسې ناکامیو سره هم مخ شوی دی.

د سپینې ماڼۍ د ملي امنیت سلاکار سیانان ته ویلي، چې پر ایراني تاسیساتو د اسرائیلو بریدونو د توغندیو د کارخونو په ګډون د دې هېواد هوايي دفاعي سیسټم او دودیز پوځي توان کم کړی دی.

سالیوان ټینګار کړی: دا د حیرانتیا خبره نده، چې په ایران کې د اټومي وسلو لرلو ته د لیوالتیا غږ اورېدل کیږي.

هغه يادونه کړې، چې ايران وايي: اټومي پروګرام يې سوله‌ييز دى؛ خو له بنديزونو سره - سره يې د يورانيمو غني کول پراخه کړي دي.

د سپینې ماڼۍ د ملي امنیت شورا سلاکار ویلي؛ دا خطر شته، چې ایران به د اټومي وسلو د نه جوړولو په اړه خپله ژمنه ودروي.

هغه منلې، چې په دې اړه د امریکا له نوي حکومت سره خبرې کوي او په دې اړه یې له تل‌ابیب سره هم خبرې کړې دي.

نړیوالې تمې او سترګې د نوي کال د جنورۍ پر شلمه هغې ورځې ته اوړي، چې ټرمپ سپینې ماڼۍ ته ننوځي.

ویل کیږي، چې هغه د بایډن د حکومت پر پرتله د تهران پر وړاندې سخت دریځ لري.