تازه خبرونه
د افغانستان د سولې په بهیر کې د م.م فشار راوړلو ته اړتیا ده
په افغانستان کې د تاوتریخوالي له ډېرېدو سره د افغانستان د بشري حقونو خپلواک کمیسیون نن (دوشنبه د لړم ۲۷) د ملګرو ملتونو له امنیت شورا څخه په افغانستان کې د جګړې پر دواړو خواوو د فشار راوړلو غوښتنه کړې، چې تاوتریخوالی کم کړي.
دا په داسې حال کې ده، چې د کندوز ولایت په دشت ارچي ولسوالۍ کې د امنیتي ځواکونو او طالبانو تر منځ درندې نښتې روانې دي او طالبان د ولسوالۍ د نیولو هڅې کوي. تر دې دمه په دې نښتو کې درې امنیتي سرتېري او اته طالبان وژل شوي دي.
د افغانستان د بشري حقونو کمیسیون مرستیال نعیم نظري ویلي: د سولې خبرو د غزولو او د تاوتریخوالي د کمولو لپاره دې د ملګرو ملتونو تر مشرۍ لاندې د یوه جوړښت لخوا تضمین واخیستل شي.
د ملي پخلاینې عالي شورا مشر عبدالله عبدالله ويلي، په دې اړه د حکومت د خپلمنځي خبرو د پلاوي لخوا طالبانو ته نوې وړاندیزونه شوي، چې د سولې خبرو په اړه په ټپه ولاړ حالت مات کړي.
هغه زیاته کړې؛ د اړوند بهیر په اوسني حالت کې یو د یو آسانچاري هڅې ته اړتیا ده، چې منځګړیتوب وکړي.
امنیتي چارواکي هم مني، چې په هېواد کې تاوتریخوالی ډېر شوی دی.
د کورنیو چارو وزارت چارسمبالي مسعود اندرابي ویلي: طالبانو د سولې لپاره رامنځته شوی فرصت له لاسه وکړی جګړه یې روانه ساتلې ده.
د افغانستان د بشري حقونو کمیسیون د وروستيو معلوماتو له مخې؛ د ۲۰۲۰ کال له پیله تر دې دمه په افغانستان کې له ۷۶۰۰ څخه ډېرو کسانو ته مرګ و ژوبله اوښتې ده.
