د پاکستان په پېښور ښار کې د افغانستان جنرال قونسل حافظ محب الله شاکر ويلي؛ اسلامي امارت چمتو دی، چې د راستنېدونکو افغانانو ستونزو ته پاملرنه وکړي.

د پاکستاني رسنیو د څرګندونو له مخې؛ محب الله شاکر د چارشنبې پر ورځ د افغانستان په قونسلګرۍ کې د یوې رسنیزې ناستې پر مهال ویلي؛ “دوی [کډوال] اندېښمن دي، چې دلته [په پاکستان کې] له ۴۵ کلونو ژوند کولو وروسته به په افغانستان کې له ستونزو سره مخ شي؛ خو اجازه راکړئ ډاډ ورکړم، چې څه به ورته پېښ نشي.”

هغه دا هم ویلي: له ۱۲ کمیټو څخه جوړ یو کمیسیون، چې څه نا څه د ټولو دولتي ادارو استازي په کې غړيتوب لري؛ له پاکستان څخه د راستنېدونکو د ټولو مسلو د حل لپاره جوړ شوی دی.

هغه ویلي: “دوی [کډوال] یوازې هغه وخت له ستونزو سره مخ کېدل، چې په افغانستان کې روسان یا امریکایان واکمن وای؛ خو اوس دا کار نه کیږي، ځکه  مونږ [افغانان] هلته واکمن یوو.” هیلو ته د رسېدو سفر پیل شوی؛ سوله حاکمه ده او هیڅ ستونزې نشته.”

د افغانستان جنرال قونسل ویلي؛ هغه کډوال، چې په افغانستان کې د اوسېدو ځای نلري هغه به په جوړو شویو کمپونو کې استوګن شي.

هغه زیاته کړې، چې د حکومت تر څنګ خيريه بنسټونو هم د کورونو جوړولو او له راستنېدونکو سره د مرستې لپاره چمتووالی ښودلی دی.

د هغو افغانانو په اړه، چې له لسیزو راپدېخوا په پاکستان کې ژوند کوي او د خپلو املاکو او شتمنیو تر څنګ یې سوداګري هم کړې؛ پاکستان ته راغلی افغان پلاوی به د دوی د ستونزو د حل په اړه بحث او خبرې وکړي.

دا په داسې حال کې دهو چې د صنایعو او سوداګرۍ وزارت د چارسمبالي پر مشرۍ پلاوي په پاکستان کې د میشتو افغان سوداګرو او کډوالو سره په یوه ناسته کې ویلي، چې په افغانستان کې د کډوالو د رضاکارانه راستنېدو، بیا مېشتېدنې او د ژوند شرایطو ښه کولو لپاره پراخ اقدامات ترسره شوي دي.

د صنایعو او سوداګرۍ وزارت چارسمبالی(سرپرست) نورالدین عزیزي اسلام‌آباد ته په خپل سفر کې ویلي، چې اسلامي امارت بېرته راستنېدونکو سوداګرو ته اسانتیاوې برابروي. هغه د مالیې او ګمرکي معافیتونو اعلان هم وکړ.

د صنایعو او سوداګرۍ وزارت د خبرپاڼې له مخې؛ عزیزي په پاکستان کې د میشتو افغان سوداګرو او کډوالو سره په یوه ناسته کې ویلي، چې په افغانستان کې د کډوالو د رضاکارانه راستنېدو، بیا مېشتېدنې او د ژوند شرایطو ښه کولو لپاره پراخې کړنې ترسره شوې دي.

هغه د کډوالو د ستونزو د حل لپاره د عالي کمیسیون جوړولو، د راستنېدونکو سوداګرو او صنعتکارانو د تنظیم او اسانتیاوو برابرولو لپاره د ځانګړي کمپ د پیل اعلان وکړ او د مالیې او ګمرکي معافیتونو په اړه یې هم خبرې وکړې.

د صنایعو او سوداګرۍ وزارت چارسمبالي د افغان کډوالو د جبري ایستلو په بهیر کې د مناسبو حل لارو موندلو لپاره د دوه اړخیزو خبرو اترو پر اړتیا ټینګار کړی او د ملګرو ملتونو د کډوالو عالي کمیشنرۍ د معیارونو پر بنسټ یې د کډوالو د رضاکارانه راستنېدو غوښتنه وکړه، چې په کې خوندي، باعزته او خپلې خوښې راستنېدل رانغاړي.

هغه د افغان کډوالو له کوربتوب، راستنېدو او بیا ادغام د بهیر د ملاتړ لپاره د افغان حکومت، نړیوالو مرستندویانو او سیمه‌ییزو شریکانو سره د مشورې او همغږۍ پر اړتیا ټینګار کړی دی.

نوموړی تېره ورځ( چارشنبه) د یوه پلاوي پر مشرۍ د پاکستان پلازمېنې اسلام‌آباد ته رسېدلی دی.

د یادونې ده، چې پاکستان په دې وروستیو کې د افغان کډوالو د جبري ایستلو دوه‌یم پړاو چټک کړی دی.

په کابل کې د پاکستان ځانګړي استازي محمد صادق د افغانستان او پاکستان د همغږۍ ګډې کمېټې د پلاوي پر مشرۍ د بهرنیو چارو وزارت له چارسمبالي( سرپرست) امیر خان متقي سره ولیدل.

د بهرنیو چارو وزارت د عامه اړیکو مشر ضیا احمد تکل په یوه خبرپاڼه کې لیکلي، چې امیر خان متقي د دې غونډې په بهیر کې د کابل او اسلام‌آباد ترمنځ د اړیکو په ځانګړي توګه د افغان کډوالو د جبري ایستلو په اړه، خپله ژوره اندېښنه څرګنده کړه.

امیرخان متقي ټینګار کړی، چې دواړه هېوادونه باید خپلې ستونزې د متقابل باور په فضا کې د خبرو اترو له لارې حل کړي او له هر هغه عمل یا څرګندونو څخه ډډه وکړي، چې د خلکو د کرکې لامل کیږي یا د خلکو احساسات راپاروي.

د پاکستان ځانګړي استازي دا هم ویلي، چې افغانستان او پاکستان ژورې اړیکې لري او دا اړینه ده، چې ستونزې وارزول شي، چې څنګه حل شي.

هغه زیاته کړې، چې په نږدې راتلونکي کې به د پاکستان د لومړي وزیر مرستیال او د بهرنیو چارو وزیر محمد اسحاق ډار کابل ته سفر وکړي او هیله من شو، چې دا سفر به د دواړو خواوو لپاره مثبتې پایلې ولري.