افغانستان د متحدو عربي اماراتو په شارجه کې له بنګله دېش سره د درې یو ورځنیو لوبو وروستۍ لوبه د ۵ ویکټو پر توپیر وګټله.

د دې لوبلړ پچه بنګله‌ دېش وګټله او لومړی یې د توپ‌وهنې پرېکړه وکړه.

د بنګله‌دېش لوبډلې په ۵۰ اوورونو کې د ۸ لوبغاړو پر سوځېدو ۲۴۴ منډې وکړې او افغان لوبډلې ته یې د ۲۴۵ منډو هدف وټاکه.

افغان لوبډلې د لوبې په ۴۹ اوور کې ټاکلی هدف پوره کړ.

په افغان لوبډله کې د رحمان الله ګوربز ۱۰۱ او عظمت الله عمرزي ۷۰ منډې برخلیک ټاکونکې وې. دې دواړو لوبغاړو له محمد نبي سره هم زړه‌راکښونکې ملګرتیا وکړه او افغان ملي لوبډله یې بریالۍ کړه؛ عمرزی د دې لوبې غوره لوبغاړی یاد شو او ګوربز خپله اتمه سلیزه جوړه کړه.

د دغو لوبو د لړۍ لومړۍ سیالي افغانستان په ۹۲ منډو ګټلې؛ خو دوه‌يمه يې بيا د ۶۸ منډو پر توپير بايللې وه.

په لومړۍ لوبه کې افغانستان د پچې له ګټلو سره لومړی توپوهنه کړې وه او بنګله دېش ته يې د ۲۳۷ منډو هدف ټاکلی و، چې بنګله دېش یې پر پوره کولو بریالی نشو. په دې لوبه کې الله محمد غضنفر د شپږو لوبغاړو پر سوځېدو غوره لوبغاړی نومول شوی دی.

په دوه‌يمه لوبه کې بیا بنګله دېش ۲۵۳ هدف وټاکه، چې افغانستان يې په پوره کولو بريالی نشو.

د افغانستان او بنګله دېش کرکټ ملي لوبډلو تر اوسه ټولې ۱۸ یو ورځنۍ لوبې کړي، چې ۱۱ یې بنګله دېش او اووه افغانستان ګټلې دي.

د افغانستان او بنګله‌دېش کرکټ ملي لوبډلې نن ( دوشنبه د لړم یوویشتمه / د نومبر یوولسمه ) د درې یو ورځنیو سیالیو د لوبلړ وروستۍ لوبه کوي.

د افغانستان کرکټ بورډ ويلي، چې، دغه سیالي به د کابل پر وخت ماسپښین ۲:۳۰ د عربي متحده اماراتو د شارجې په لوبغالي کې پیل شي.

دواړو لوبډلو یوه - یوه سیالي ګټلې او مساوي روان دي.

د درې یو ورځني لوبلړ په لومړۍ لوبه کې افغانستان د ۹۲ منډو پر توپیر او بنګله‌دېش په دوه‌یمه لوبه کې د ۶۸ منډو پر توپیر لوبې ګټلې دي او نن به د لوبلړ ګټونکې لوبډله معلومه شي.

ټاکل شوې، چې له دې لوبلړ وروسته به افغانستان د نورو لوبلړیو د لوبېدا لپاره زمبابوې ته سفر وکړي.

د افغانستان کرکټ ملي لوبډلې په دوه‌یمه یوه ورځنۍ لوبه کې د بنګله دېش پر وړاندې د ۶۸ منډو پر ټوپیر ماتې وخوړه.

دا لوبه د شنبې پر ورځ ( د لړم  نولسمه) د متحده عربي اماراتو په شارجه ښار کې د افغانستان پر کوربتوب ترسره شوې ده.

د دغه لوبلړ لومړۍ لوبه افغانستان ګټلې او اوس دواړه لوبډلې ۱-۱ مساوي دي.

د دواړو لوبډلو ترمنځ درېیمه لوبه به دوه ورځې وروسته د متحده عربي اماراتو په شارجه لوبغالي کې ترسره شي.

په پرونۍ لوبه کې (شنبه د لړم نولسمه) بنګله دېش پچه وګټله او لومړی یې د توپ‌وهنې پرېکړه وکړه. دغې لوبډلې په ټاکلو پنځوس اورونو کې د اووه لوبغاړو پر سوځېدو ۲۵۲ منډې جوړې کړې.

د بنګله دېش لپاره د دې لوبډلې لوبډلمشر نجم‌الحسین شانټو وکړې تر ټولو زیاتې ۷۶ منډې وکړې.

د افغانستان په توپ‌اچوونکیو کې ننګیالی خروټی د خپلو ملګرو پر پرتله ښه وځلید او درې ویکټې یې واخیستې.

په دوه‌یمه پاڼۍ کې د افغانستان لوبډلې توپ‌وهنه وکړه او هیڅ یو لوبغاړی ونه توانید، چې پر ویکټو اخیستو راوڅرخیږي.

د افغانستان له لوري رحمان الله ګربز یوازې دوه منډې وکړې او ژر له لوبې ویستل شو.

یوازې رحمت شاه زرمتي د ۵۲ منډو پر جوړولو تر نورو ښه و او نور لوبغاړي په دې لوبه کې ښه نه‌ول.

افغانستان په ۴۳.۳ اورونو کې خپل ټول لوبغاړي له لاسه ورکړل او یوازې ۱۸۴ منډې یې جوړې کړې.

ټاکل شوې دواړه لوبډلې د دوشنبې پر ورځ (د لړم یوویشتمه) د درې، پنځوس اوریزو لوبو په وروستۍ لوبه کې له یو بل سره مخ شي. د دې لوبې ګټونکې لوبډله به د لوبلړ ګټونکې وي.