د ریاست‌الوزراء اقتصادي مرستیال ملا عبدالغني برادر آخوند نن( د وري درېیمه) د کابل ولایت پغمان ولسوالۍ د ارغندۍ ټرانسپورټي ترمینل د چارو د پيل پرانیسته وکړه.

د ریاست الوزراء د اقتصادي مرستیالۍ د خبرپاڼې له مخې:  د ریاست‌الوزراء اقتصادي مرستیال په هېواد کې د ټرانسپورټي بنسټونو د پراختیا په برخه کې د ارغندۍ ټرانسپورټي ترمینل جوړول مهم وبلل او په دې اړه څرګندوي: د ټرانسپورټي بېخبناوو معیاري رغول او پراخول د یو هېواد د اقتصادي ودې، پرمختګ او د داخلي او سیمه‌ییز اتصال لپاره ډېر مهم او بنسټیز ګام ګڼل کېږي.

د نوموړي د څرګندونو له مخې؛ له بده مرغه په هېواد کې د لسیزو جګړو او فساد له کبله دې مهمې برخې ته پام ندی شوی؛ بلکې په دې برخه کې شته بنسټونه د ټیټ کیفیت له کبله تخریب شوي، عامه ملکیتونه د اشخاصو له لوري غصب او د لویو لارو او سړکونو حریمونه کوچني شوي دي.

ملا برادر آخوند د معیاري ټرانسپورټي بېخبنا ارزښت ته په نغوته کې ویلي؛ پر ټرانسپورټي او مواصلاتي بنسټونو پانګونه، د غصب شویو عامه ملکیتونو بېرته استرداد، د سړکونو او لارو د اصلي حریم تشخیصول او رغول د افغانستان اسلامي امارت یو له اساسي او مهمو ملي موخو څخه ګڼل کېږي.

نوموړي ویلي: د ارغندې ټرانسپورټي ترمینل لپاره  ۴۲ مهم تاسیسات جوړېږي.

د یادونې ده، چې د کابل ولایت د ارغندۍ ټرانسپورټي ترمینل په  شاوخوا ۹۰۰ جریبه ځمکه کې د یو میلیارډ او ۲۸۵ میلیون افغانیو پر لګښت جوړېږي، چې چارې به یې د خصوصي سکټور له لوري په دوه کلونو کې بشپړې شي.

د بیات بنسټ چارواکو ويلي، چې د دې مرستې وېش به د روژې د مبارکې میاشتې تر پایه د کابل په ګډون د هېواد په نورو ولایتونو کې اړمنو خلکو ته روان وي.

اړمنې کورنۍ د بیات بنیاد له مرستو څخه خوښ دي او له نورو وسمنو خلکو هم د همکاریو غوښتنه کوي.

د بیات بنیاد لخوا اړمنو او بېوزلو کورنیو ته د روژې مناسبتي مرستې نن د کابل ښار په یو بل کونج کې لسګونو اړمنو کورنیو ته ووېشل شوې.

دا مرستې، چې اوړه، وريجې او غوړي په کې دي؛ د یوې مخکینۍ سروې پر بنسټ اړمنو کسانو ته ووېشل شوې.

دغه راز یو شمېر نورو هغو اړمنو او مستحقو کورنیو، چې دا خوراکي توکي یې ترلاسه کړي خوشحاله دي او له نورو مرستندویه بنسټونو غواړوي، چې په دې سختو شرایطو کې له اړمنو سره مرسته وکړي.

د دې سیمې یو شمېر اوسېدونکي وايي، چې د بیات بنیاد مرستې په داسې حال کې چمتو شوي، چې خلک په حقیقت کې له هر ډول مالي او اقتصادي ستونزو سره مخ دي.

د بیات بنیاد چارواکي هم وايي، چې دا مرستې به د روژې د مبارکې میاشتې تر پایه روانې وي او د کابل په ګډون د هېواد په نورو ولایتونو کې به هم اړمنو کورنیو ته ووېشل شي.

دا په داسې حال کې ده، چې د بامیان ولایت لسګونه اړمنې کورنۍ له دې مخکې د بیات بنیاد د روژې له مناسبتي مرستو برخمنې شوې دي. په دې مرستو کې اوړه، غوړي او وريجې شته، چې موخه یې اړمنو خلکو ته وېشل دي.

بیات بنسټ پر عام المنفعه پروژو سربېره روغتیايي پروژو او طبیعي پېښو څخه اغېزمنو کسانو سره مرستې کړي؛ له نږدې دوه لسیزو راپدېخوا په پلازمېنه او ولایتونو کې زرګونو اړمنو کورنیو ته د روژې په مبارکه میاشت کې خوراکي او غیر خوراکي مرستې چمتو کوي.

په زرګونه افغانان د شنبې پر ورځ د تورخم له لارې افغانستان ته له هغې وروسته راستانه شول، چې د پولې تړلو له کبله په پاکستان کې نږدې یوه میاشت بند پاتې ول.

پاکستان د فبرورۍ پر یوویشتمه د سرحدي ځواکونو ترمنځ د نښتو له کبله لار وتړله؛ خو د دواړو خواوو د چارواکو له هغږۍ وروسته د شنبې پر ورځ تورخم دروازه د پلي تګ راتګ کوونکو پر مخ هم پرانیستل شوه.

د پاکستان د کډوالۍ ادارې چارواکو د یکشنبې پر ورځ سیمه‌ییزو رسنیو ته ویلي؛ د شنبې پر ورځ له ۴۰۰۰ څخه زیات افغانان افغانستان ته ستانه شوي، چې ۱۹۰۰ یې معتبر پاسپورټونه درلودل.

ډان ورځپاڼې زیاته کړې، چې ۲۱۵۰ نور کسان هم جبري ایستل شوي دي. دغه راز ۱۱۰۰ پاکستانیان هم خپلو کورونو ته ستانه شوي دي.

راپورونه ښیي، چې د پاکستان چارواکي اړ شول، چې د هر فرد اسناد پر لاسي وګوري؛ ځکه، چې د مارچ پر ۳ او ۴ د پاکستان او افغان ځواکونو ترمنځ د سرحدي نښتو په بهیر کې د آنلاین کډوالۍ سیسټم زیانمن شوی دی.

ډان نیوز دا راپور هم ورکړی، چې د پاکستاني چارواکو د څرګندونو له مخې: یوازې هغه افغانان، چې په پاسپورټونو کې یې د اعتبار وړ ویزې مهر شوې وي؛ پاکستان ته د ننوتلو یا وتلو اجازه به ولري. په داسې حال کې، چې د افغانستان تذکرې لرونکي به په هر قیمت له تېریدو څخه منع شي.

دې محدودیت په سلګونه افغانان په ځانګړي توګه هغه کسان، چې د پولې د بیا پرانیستلو لپاره یې له اوونیو راپدېخوا د تېرېدو تمه لرله؛ مایوسه کړل.

د پولې بیا پرانیستل د دواړو هېوادونو د جرګې د غړو ترمنځ له څو پړاونو خبرو اترو وروسته شوني شول. تېره اوونۍ دوی یوې هوکړې ته ورسېدل او د سې‌شنبې پر ورځ یې لار د سوداګرۍ لپاره پرانیسته.

له هغه وخت راپدېخوا په پوله کې سوداګریز فعالیتونه روان ول.

د ګمرک چارواکو ډان ورځپاڼې ته ویلي؛ په تېرو دوه ورځو کې ۷۴۰ لارۍ، چې د ډبرو سکرو، صابون او وچو میوو بار وې له افغانستان څخه پاکستان ته دننه شوې دي او شاوخوا ۴۵۰ صادراتي موټرونه، چې ۱۳۳ یې د افغانستان ټرانزیټ سوداګریز توکي لیږدول؛ افغانستان ته ننوتل.