د ایران د ولسمشریزو ټاکنو د څوارلسمې دورې د ترسره کېدو بهیر نن (جمعه د چنګاښ اتمه) د سهار پر ۸ بجو پیل شو، چې ۶۱ میلیونه ۴۵۲ زره ۳۲۱ کسان به په هېواد کې دننه او بهر ګډون وکړي.

ایسنا خبری اژانس راپور ورکړی، چې په نیوزیلینډ کې د ایران سفارت په ګډون د دوه نورو ښارونو ایرانیانو ته هم د رای اچونې له پیل سره سم د ولسمشریزو ټاکنو د رایو صندوقونه کېښودل شوي دي.

په بهر کې ایراني وګړي هم کولی شي د باور وړ پاسپورټ سره د خپلې خوښې نوماند ته رای ورکړي.

له دې مخکې په بهر کې د ایران د ولسمشریزو ټاکنو د ترسره کولو مسوول علیرضا محمودي ویلي وه، چې د ایران د ولسمشرۍ د انتخاباتو لومړی پړاو به په نیوزیلینډ کې ترسره شي.

د ایران د ولسمشرۍ په څوارلسم پړاو ټاکنو کې د دغه هېواد د ولسمشرۍ څوکۍ لپاره مسعود میزکیان، مصطفی پور محمدي، سعید جلیلي او محمد باقر قالیباف سیالي کوي.

ویل کیږي، چې په مزارشریف ښار کې هم د ایران قونسلګرۍ د خپل هېواد وګړو ته د ایران د ولسمشرۍ په ټاکنو کې د رای اچونې لپاره د رایو صندوقونه ایښي دي.

مصر د حج پر مهال د ۵۳۰ حاجیانو د مړه کېدو په غبرګون کې د ۱۶ سیاحتي شرکتونو کاري جوازونه بېرته واخیستل او څارنوالۍ ته وروپېژندل شول.

طبي او امنیتي سرچینو ناورین څېړونکي بنسټ ته ويلي، چې لږ تر لږه ۵۳۰ مصریان د سږني حج د ترسره کولو پر مهال مړه شوي دي.

دغه بنسټ د پنجشنبې پر ورځ د لومړي وزیر مصطفی مدبولي په مشرۍ جوړ شوي کنفرانس ته د نوموړي د څرګندونو له مخې ویلي، چې د ۳۱ مړینې د اوږدې ناروغۍ په پایله کې تائید شوي.

په دې راپور کې پرته له دې، چې د کوم سیاحتي شرکت نوم واخیستل شي؛ وایي، مړه شویو حاجیانو ته د سفري اسانتیاوو په ګډون طبي خدمتونه هم وړاندې شوي ندي.

دغه راز زیاته شوې؛ دې شرکتونو سعودي ته د حج د ویزو پر ځای حاجیان د شخصي لیدنو پر ویزو لیږلي، چې یوازې مکې ته د رسیدو اجازه لري.

د حج په مرسمو کې اسانتیاوې د سعودي چارواکو لخوا هغو کسانو ته نه رامنځته کیږي، چې پر شخصي ویزو یې سفر کړی وي.

دغه راز هغه حاجیان، چې مړه شوي؛ د نیولو یا ایستلو له وېرې یې مکې مکرمې ته د رسېدو لپاره د صحرا لار غوره کړې ده.

مصري چارواکي دا هم وايي، چې دې سفري شرکتونو حاجیانو ته مناسبه استوګنه هم نده چمتو کړې او د لوړې تودوخې له کبله حاجیان له ستړیاوو سره مخ شوي دي.

رویټرز راپور ورکړی، چې مصري چارواکو د راجستر شويو مصري حاجیانو په منځ کې د ۳۱ مړینې مستندې کړي، چې د مړینې لامل یې مزمنې ناروغۍ دي.

په اړوند څرګندونو کې راغلي، چې ډېري مړه شوي کسان غیر راجستر شوي کسان ول.

په دې وروستیو ورځو کې د سعودي عربستان په ښار کې، چې د تودوخې درجه د سانتي‌ګراد له ۵۱ درجو څخه هم لوړه شوې؛ په سلګونه کسان د حج د مراسمو د ادا کولو پر مهال مړه شوي دي.

اړوند خبرون:

د افغان حاجیانو لومړی کاروان کابل ته راستون شو

د تونس ولسمشر د مذهبي چارو وزیر له دندې ګوښه کړ

رسنیو ويلي، په سعودي عربستان کې د حج د مراسمو پر مهال د سختې تودوخې له کبله سلګونه حاجیان مړه شوي دي.

د فرانسې خبري سرچینې په یوه راپور کې د ډیپلوماټانو د څرګندونو له مخې څرګنده کړې، چې لږ تر لږه ۵۵۰ کسان د حج پر مهال مړه شوي دي.

دغه خبری آژانس د دوه عرب ډیپلوماټانو د څرګندونو له مخې خبر ورکړی؛ په مړه شویو کسانو کې ۳۲۳ مصریان دی، چې زیاتره یې د تودوخې له کبله مړه شوي دي.

رویټرز بریالی شوی ندی، چې دا شمېر تائید کړي.

په تېرو کلونو کې د حج د مراسمو پر مهال ګڼې ګوڼې، اور لګېدنې او نورو پېښو سلګونه کسان مړه کړي دي.

د سعودي دولتي ټلویزیون ویلي، د دوشنبې پر ورځ د مکې په مسجدالحرام کې د تودوخې درجه له ۵۱ سانتي ګراد لوړه شوه.

په سعودي عربستان کې د سختې تودوخې له کبله د مړو شویو حاجیانو شمېره پورته شو.

د رویټرز خبري اژانس د راپور له مخې، د تونس خبري اژانس “افریق پرس” د سې شنبې پر ورځ اعلان وکړ، چې د حج د مراسمو پر مهال د تونس ۳۵ وګړي مړه شوي دي. د دوی د کورنیو غړیو په ټولنیزو رسنیو کې ویلي، چې ډېري مړینې د سختې تودوخې له کبله رامنځته شوې دي.

د اردن بهرنیو چارو وزارت اعلان کړی، چې د سې شنبې پر ورځ یې د اردن حاجیانو ته د ۴۱ کسانو د تدفین جوازونه صادر کړل. له دې مخکې دغه وزارت ویلي وه، چې د حج د مراسمو پر مهال د تودوخې له کبله لږ تر لږه شپږ اردني وګړي مړه شوي دي.

ایراني خبري آژانسونو د سې شنبې پر ورځ اعلان وکړ، چې ۱۱ ایرانیان د زیارت پر مهال مړه شوي او ۲۴ نور په روغتون کې بستر دي.

د سینیګال خبري اژانس هم د دوشنبې پر ورځ ویلي وه، چې د دغه هېواد درې اتباع د حج پر مهال مړه شوي دي.

د انډونیزیا د روغتیا وزارت ویلي: د سې شنبې پر ورځ ۱۴۴ انډونیزیایی وګړي د حج پر مهال مړه شوي. په د ې څرګندونو کې راغلي ندي، چې آیا دغه مرګ د تودوخې له کبله و او که د ناروغیو له پر لامل.

د سعودي د روغتیا وزارت یوه چارواکي د دوشنبې پر ورځ رویټرز ته د مړینې د راپورونو له مخې ویلي، چې چارواکو د تودوخې د لوړې درجې په لړ کې د مسلمان حاجیانو په منځ کې هیڅ غیر معمولي مړینې لیدل شوې ندي.

هغه زياته کړې، چې دغه وزارت تر اوسه د ٢٧٠٠ هغو حاجيانو درملنه کړې، چې د ګرمۍ له کبله پر ناروغيو اخته ول.

رویټرز راپور ورکړی؛ حاجیان له لمر څخه د ځان ساتلو لپاره چترۍ کاروي او سعودي چارواکو حاجیانو ته خبرداری ورکړی، چې د سهار له ۱۱ بجو څخه د ماسپښین تر ۳ بجو پورې په تودو ساعتونو کې بهر ته له تګ څخه ډډه وکړي.

د سعودي عربستان د احصائې عمومي ریاست خبر ورکړی، چې سږ کال به له یو اعشاریه ۸ میلیون څخه زیات حاجیان د حج په مراسمو کې ګډون وکړي.