تازه خبرونه
خلیلزاد د اسلام آباد سفر تر سره کړ
د افغانستان د سولې لپاره د امریکا د بهرنیو چارو وزارت استازي په خپل یوه تویت کې څرګنده کړې، چې د اسلام آباد سفر یې تر سره شو.
د افغانستان د سولې لپاره د امریکا ځانګړي استازي په دوحه کې لنډه دمه وکړه او د هغه هېواد له لومړي وزیر او بهرنیو چارو وزیر سره یې د افغانستان د سولې بهیر په اړه خبرې وکړې.
د افغانستان د سولې لپاره د امریکا د بهرنیو چارو وزارت استازي زلمي خلیلزاد زیاته کړې، چې په دې سفر کې یې له عمران خان سره په لیدنه کې د نوموړي د واشنګتن پر سفر او د ده پر وروستیو هڅو بحث او خبرې کړې دي.
دغه راز ښاغلي خلیلزاد اسلام آباد ته په خپل څلور ورځي سفر کې د پاکستان د بهرنیو چارو له وزیر شاه محمود قریشي او لوی درستیز جاوید باجوه سره هم په لیدنه کې د افغانستان د سولې او په دې اړه د دوی پرهڅو هم خبرې کړې دي.
همدارنګه په پاکستان کې د امریکا سفارت په ډاګه کړې، چې زلمي خلیلزاد له پاکستانیو چارواکو سره په خبرو کې ټینګار کړی، چې د افغانستان سوله د دواړو حکومتونو باوري تضمین ته اړتیا لري او د دواړو خاوره باید د یو او بل پر ضد ونه کارول شي.
په اسلام آباد کې د امریکا سفارت د خبرپاڼې له مخې؛ د افغانانو تر منځ د سولې په بهیر کې دغه تضمینونه د سیمې اقتصادي یووالی او پراختیا هم رامنځته کولی شي.
پاکستاني رسنیو ویلي، چې خلیلزاد له پاکستانيو چارواکو غوښتي، چې طالبان د افغانانو خپلمنځي خبرو اترو ته حاضر کړي.
د پاکستان د بهرنیو چارو وزیر د افغانانو خپلمنځي خبرې اترې تلپاتې سولې ته د رسیدو یوانۍ لار بولي او په خپل یوه تویت کې له خلیلزاد سره لیدنه رغنده ګڼلې ده.
هغه له خلیلزاد سره د لیدنې په اړه څرګنده کړې، چې د افغانستان د سولې اوپخلاینې په تړاو مو ګټور بحث درلود، پاکستان د افغانستان د سولې بهیر په تړاو ملاتړ ته ژمن دی.
په اسلام آباد کې د افغانستان، پاکستان او چین ځینو کارپوهانو او سیاسي څېرو هم په یوې ناسته کې د افغانستان د سولې په بهیر کې د دې درې واړو هېوادونو پر همکاریو ټینګار کړی دی.
پاکستاني دیپلومات ریاض محمد خان ویلي، چې که په افغانستان کې امنیت وي، ټوله مرکزي آسیا به له امنیت برخمنه وي. باثبات افغانستان سیمې ته د پرمختګ او هوساینې زمینه برابروي. چین کولی شي د افغانستان د سولې په بهیر کې له سیاسي او اقتصادي اړخه ګټور رول ولوبوي.
چینایي ورځپاڼه لیکوونکی سي مینګ څرګنده کړې؛ جدي اړتیا ده، چې چین او پاکستان د افغانانو د سولې له بهی ملاتړ وکړي. دا دواړه هېوادونه کولی شي د افغانستان د سولې په بهیر کې رغنده رول ولوبوي.
د افغانستان لپاره د اسلامي هېوادونو د سازمان ځانګړی استازی هم هیله من دی، چې افغانستان به په نږدې راتلوونکې کې له طالبانو سره د سولې هوکړې ته ورسیږي.
د افغانستان لپاره د اسلامي هېوادونو د سازمان ځانګړی استازی حسین بوتسالي ویلي: له دې بې ساري فرصت څخه، چې د سولې لپاره را منځته شوی، باید ګټه واخیستل شي او له څلور لسیزو جګړو او بدمرغیو وروسته باید د سولې له دې فرصت کار واخیستل شي، چې هم ځان او هم نورو نسلونو ته یوه سوله ییزه او با ثباته فضا جوړه کړي.
د سولې عالي شورا د ویاند مرستیال اسدالله زایري ویلي؛ ټولې هغه هڅې، چې د سولې له روان بهیر سره مرسته وکړي مونږ ترې ملاتړ کوو او د افغانستان او خلکو په خیر یې بولو.
د افغانستان د سولې لپاره د امریکا ځانګړی استازی اوس قطر ته رسیدلی، چې له طالب استازیو سره اتم پړاو خبرې پیل کړي. په دې پړاو کې تمه ده، چې دواړه لوري پر یو هوکړه لیک لاسلیک وکړي او هغه وروستی کړي.
دا په داسې حال کې ده، چې طالب استازیو هم د اووم پړاو خبرو له تر سره کیدو او افغانستان ته د زلمي خلیلزاد له سفر پیلیدو سره سم اندونیزیا ته سفر کړی او د هغه هېواد له چارواکو او دیني عالمانو سره یې د افغانستان د سولې او راتلونکي په اړه بحث او خبرې تر سره کړې دي.
تازه خبرونه
ایران او پاکستان د افغانستان په اړه ګډه اعلامیه خپره کړه
ایران او پاکستان په یوه ګډه اعلامیه کې د یو سولهییز، متحد، خپلواک او له ترهګرۍ او نشهیي توکو قاچاق څخه د پاک افغانستان په اړه پخپلو ژمنو ټینګار څرګند کړی دی.
دواړو لوریو د ترهګریزو ډلو شتوالي ته په افغانستان کې نغوته کړې، چې سیمې او نړۍ ته امنیتي ګواښ دی؛ نو پر وړاندې یې پر مبارزه، همکارۍ او متحدې جبهې جوړولو ټینګار کړی دی.
دوی دغه راز د سیمې د امنیت او ثبات د ډاډمنولو لپاره د سیمهییزې او نړیوالې همغږۍ د اړتیاوو پر اهمیت خبرې کړې دي.
دواړه لوري د افغانستان حاکمیت او ځمکنۍ بشپړتیا ته د احترام کولو تر څنګ څرګندوي؛ د دې هېواد ټولې خواوې باید په بنسټیزو پرېکړو کې ونډه ولري، چې په هېواد کې د سولې او ثبات لامل شي.
تازه خبرونه
له ۱۰۰۰ ډېر افغان مهاجرین له پاکستان څخه جبري وایستل شول
د مهاجرینو چارو وزارت ویلي، چې د غویي پر څلورمه د سپین بولدک له فرضي کرښې څخه ۱۰۰۱ افغان مهاجرین پر جبري بڼه خپل هېواد ته راستانه شول.
د کندهار سپین بولدک سرحدي آمریت د راپور له مخې؛ ۱۹۱ کورنۍ، چې ۹۹۸ کسان دي او درې کسان نور، چې له بنده ازاد شوي؛ په جبري توګه له پاکستان څخه هېواد ته راستانه شول.
د مهاجرینو چارو وزارت د څرګندونو له مخې؛ د مهاجرینو چارو له ریاست سره له نوم لیکنې وروسته د نورو مرستو لپاره د ملګرو ملتونو عالي کمېشنرۍ، د مهاجرت او د خوړو نړیوالې ټولنې دفترونو ته ور وپېژندل شول.
دغه راز له ۱۸ کلونو کم عمره دوه کسان، چې بندیان ول د مرستې لپاره OMPO موسسې ته ور پېژندل شوي.
ویل کیږي، چې له هرې کورنۍ سره د حکومت له لوري لس – لس زره افغانۍ نغدي مرسته هم شوې ده.
تازه خبرونه
د ټرانسپورټ او هوايي چلند وزارت چارسمبالي د ازبکستان په شپږ اړخیزه غونډه کې ګډون وکړ
د ټرانسپورټ او هوايي چلند وزارت چارسمبالي حميدالله اخوندزاده پرون (سې شنبه د غویی څلورمه) د يوه پلاوي پر مشرۍ ازبکستان ته سفر کړی او د دې هېواد پر کوبتوب یې د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ په شپږ اړخيزه غونډه کې ګډون وکړ.
د افغانستان پلاوي په دې کتنه کې د نورو هېوادونو له استازیو سره د افغانستان، روسيې، بېلاروس، پاکستان، قزاقستان او ازبکستان هېوادونو ترمنځ د شپږ اړخيز دهليز له لارې د راکړې ورکړې د پراختيا په اړه خبرې وکړې.
د ټرانسپورټ او هوايي چلند وزارت ويلي، چې د دې غونډې په څنډه کې د دغه وزارت چارسمبالي د روسیې او بلاروس د ټرانسپورټ له مرستیالانو سره هم وکتل.
دغه راز د ټرانسپورت او هوايي چلند وزارت چارسمبالي د روسيې او بېلاروس د ټرانسپورټ وزارتونو له مرستيالانو سره د افغانستان او روسيې، افغانستان او بېلاروس ترمنځ د ټرانزيټي لارو د پراختيا او د ټرانسپورټي اسانتياوو د برابرولو په اړه خبرې وکړې.
ویل کیږي، چې د ټرانسپورټ او هوايي چلند وزارت چارسمبالي د افغانستان په چارو کې د ازبکستان د ولسمشر ځانګړي استازي او د ټرانسپورټ له وزیر سره دوه اړخیزې ناستې کړي او د دواړو هېوادونو ترمنځ یې د ټرانزیټ پر پراختیا بحث او خبرې کړې دي.
-
تازه خبرونه2 days ago
وروستیو سیلابونو په افغانستان کې ۱۵۰۰ کورنیو ته زیانونه رسولي
-
نړۍ4 days ago
د جاپان دوه پوځي چورلکې بحر ته وغورځېدې
-
نړۍ2 days ago
د مالیزیا بحري ځواکونو د چورلکو په ټکر کې ۱۰ کسان مړه شول
-
تازه خبرونه4 days ago
د پاکستان سرحدونو وزیر د افغان کډوالو پر باعزته ستنېدا ټینګار وکړ
-
لوبی3 days ago
عینو مېنې، استقلال کابل او اټکانرژي فوټبال لوبډلې، خدیم افسي مات کړل
-
لوبی2 days ago
د موج ساحل لوبغاړي د جوانان واحدي لوبډلې پر وړاندې زړهراکښونکی ګول ترسره کړ
-
تازه خبرونه2 days ago
راشد خان د افغان بیسیم سوداګریز سفیر شو
-
سیمه ییز خبرونه3 days ago
د ایران ولسمشر پر درې ورځني سفر پاکستان ته ولاړ