Connect with us

تازه خبرونه

حکومت باید د ټاکنو له پیچلې ازموینې بریالی را ووځي

خپور شوی

د

(Last Updated On: لړم ۲, ۱۴۰۱)

د مشرانو جرګې یو شمېر غړي وايي، چې حکومت باید د ټاکنو له پیچلې ازموینې بریالی را ووځي او د رایه ورکوونکیو امنیت خوندي کړي.

د ټاکنو خپلواک کمیسیون د نوي مهالوېش له مخې په پام کې ده، چې د ولسي جرګې او ولسوالیو شوراګانو ټاکنې د روان کال د تلې پر اته ویشتمه تر سره شي.

د مشرانو جرګې غړي وايي، که په ټولو ولایتونو کې د ټاکنو لپاره سمه زمینه برابره نه شي؛ د ټاکنو رڼښت به له پوښتونو سره مخ شي.

د مشرانو جرګې لومړی مرستیال محمد علم ایزد یار وایي: ټاکنې باید تر سره شي؛ خو باید دا ټاکنې رڼې وي او بشپړ چمتووالي دې ورته ونیول شي. پرته له دې به ننګوونکې وي.

د مشرانو جرګې غړی رحمت الله اڅکزی وایي: د ټاکنو د تر سره کولو کومه نېټه، چې اعلام شوې سمه نده؛ ځکه ناامنۍ شته او خلک به څنګه په ټاکنو کې ګډون وکړي. باید پر حکومت فشار راوړو، چې ټاکنو ته سمه زمینه برابره کړي.  

د مشرانو جرګې غړې انار کلي هنریار وایي: مونږ د ټاکنو د ترسره کولو پلوي کوو؛ امنیتي ځواکونه باید امنیت خوندي کړي او هڅه وکړي، چې خلک په ټاکنو کې پراخه برخه واخلي.

د مشرانو جرګې رييس وايي، که ټاکنې سراسري او رڼې تر سره شي؛ ټول جریانونه او خلک به یې ملاتړ وکړي.

د مشرانو جرګې ريیس فضل الهادي مسلمیار زیاتوي: ټاکنې یوه اړتیا ده او مشرانو جرګه ترې ملاتړ کوي.

د مشرانو جرګې غړي د ټاکنو له خپلواک کمیسیون غواړي، چې خپله خپلواکي وساتي او د هیچا فشار ته سر ټیټ نه کړي.

خبریال: رفیع صدیقي

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!