د افغانستان فوټسال ملي لوبډله په ازبکستان کې د ۲۰۲۴ فوټسال نړیوال جام د ګروپي پړاو له پای ته رسېدو وروسته د غوره څلور درېیم مقام لرونکیو لوبډلو په توګه د غوره ۱۶ پړاو ته ورسېده.

د افغانستان فوټسال ملي لوبډله د نړیوال جام راتلونکي پړاو ته د تاجکستان پر وړاندې د پانامې له بري وروسته  ورسېده.

پانامې نن (یکشنبه) تاجکستان ته ۸-۳ ماتې ورکړه.

فیفا د یکشنبې پر ورځ له هغې وروسته، چې ګروپي پړاو پای ته ورسېد د لوبډلې پرمختګ تائید کړ.

افغان لوبډلې په ګروپي پړاو کې یوه بریا او دوه ماتې ثبت کړې.

په حذفي پړاو کې به د افغانستان لومړۍ لوبه د چارشنبې پر ورځ د سپټمبر پر پېنځه‌ویشتمه له پاراګوای سره وي. دا لوبه به د تاشکند په همو آرینا کې ترسره شي.

د ۲۰۲۴ فیفا فوټسال نړیوال جام د فیفا فوټسال نړیوال جام لسم پړاو دی او په ټولیزه توګه ۲۴ لوبډلې د ټورنمنټ لپاره وړتیا لري.

یکشنبه د ګروپي پړاو سیالیو وروستۍ ورځ وه.

د پرتګال، مراکش، برازیل، تایلنډ، پاراګوای، هالنډ، ارجنټاین، اوکراین، اسپانیا، قزاقیستان، ایران، فرانسه، کوستاریکا، کروشیا، افغانستان او احتمالا لیبیا به د ۱۶ لوبډلو حذفي مرحلې ته لاره وکړه.

له ایران او کوربه ازبکستان سره د افغانستان او تاجکستان وړتیا په دې معنا ده، چې د لومړي ځل لپاره د منځنۍ آسیا څلور هېوادونو نړیوال جام ته لار پیدا کړه.

حذفي پړاو د سې شنبې پر ورځ د سپټمبر پر څلیریشتمه پیل کیږي. کله، چې برازیل د بخارا په یونیورسال لوبغالي کې د مازیګر پر ۵:۲۰ له کوسټاریکا سره مخامخ کیږي.

دا لوبه به په همدې ورځ د شپې اته بجې د نډرلینډ او اوکراین پر سیالۍ پیلیږي. دا لوبه به د تاشکند په هومو آیرینا لوبغالي کې ترسره شي.

په ټول افغانستان کې د فوټسال مینه‌وال کولی شي د سیالیو د دې پړاو د لیدو لپاره آریانا ټلویزیون وګوري، چې د ۲۰۲۴ فیفا فوټسال نړیوال جام لوبې پر رسمي او قانوني بڼه خپروي.

د افغانستان فوټسال ملي لوبډلې د ۲۰۲۴فوټسال نړیوال جام درېیمه لوبه د اوکراین لوبډلې ته ۴ـ ۱ پر توپیر بایلوله.

دا لوبه د شنبې پر شپه د وږي پر یودېرشمه د ازبکستان په اندیجان لوبغالي کې ترسره شوه.

په دې لوبه کې مهران غلامي د افغانستان یوازنی ګول وواهه او د اوکراین دروازه یې پرانیسته.

په ټول هېواد کې مینه‌وال کولی شي، چې د فوټسال نړیوال جام سیالۍ پر ژوندۍ بڼه له آریانا ټلویزیون څخه وګوري.

د افغانستان کرکټ ملي لوبډلې د جمعې پر ورځ د جنوبي افریقا پر وړاندې یوه بله پیاوړې بریا خپله کړه. افغانستان په دوه‌یمه یوه ورځنۍ لوبه کې سویلي افریقا ته د ۱۷۷ منډو پر توپیر ماتې ورکړه او د دې لوبلړ ګټونکی شو.

رحمان الله ګربز ۱۰۵ منډې وکړې او افغانستان د ۴ لوبغاړو پر له لاسه ورکولو ۳۱۱ منډې جوړې کړې. راشد خان د خپلې کلیزې پر ورځ پېنځه ویکټې واخیستې او سویلي افریقا پر ۱۳۴ منډو وسوځېده.

له دې بریا سره افغانستان د دوه اړخیزو سیالیو لړۍ وګټله.

د چارشنبې پر ورځ په لومړۍ لوبه کې افغانستان سویلي افریقا ته د  ۶ ویکټو پر توپیر ماتې ورکړې وه.

د جمعې د ورځې په لوبه کې د پچې له ګټلو وروسته افغانستان په بشپړ ډول لوبه په خپل واک کې لرله او یوه زړه‌راکښونکې توپ‌وهنه یې نندارې ته وړاندې کړه.

ګربز پر ۱۱۰ توپونو ۱۰۵ منډې جوړې کړې او هغه لوبغاړی شو، چې د افغانستان لپاره یې په یو ورځنیو لوبو کې تر ټولو زیاتې منډې جوړې کړې.

عظمت الله عمرزي له ۵۰ توپونو د ۸۶  منډو په ګډون  څلور ۶ شپږې جوړې کړې.

رحمت شاه هم ۵۰ منډې وکړې.

سویلي افریقا د ټاکلي هدف لپاره ښه پیل درلود؛ ځکه، چې د ټمبا باووما او لوبډلمشر ټوني دوورزي په ګډه د ۷۳ منډو پر جوړولو ښه وځلېدل.

له هغې وروسته، چې باووما د عمرزي لخوا وسوځول شو؛ سویلي افریقا پر‌له‌پسې ویکټې له لاسه ورکړې.

راشد خان، چې د توپ‌وهنې پر مهال یې پښه ټپي شوې وه په ۹ اورونو کې یې پېنځه ویکټې واخیستې او یوازې ۱۹ منډې یې ترسره کړې. ننګیال خروټي ۴ ویکټې واخیستې او ۲۶ منډې یې ورکړې.

راشد خان د لوبې غوره لوبغاړی ونومول شو.

د دې لړۍ وروستۍ لوبه به د یکشنبې په ورځ په شارجه کې ترسره شي.

(رویټرز)