تازه خبرونه
جنرال مکینزی، د امریکايي ځواکونو په وژلو کې د روسیې پر لاس لرلو شکمن شوی
یوه لوړ پوړي امریکایي جنرال ویلي، چې په افغانستان کې د امریکایي عسکرو د وژلو لپاره طالبانو ته د روسیې ډالۍ ورکول د اندېښنې وړ دي؛ خو هغه شک لري، چې دا کار به په دې هېواد کې د امریکایي سرتېرو د وژنې لامل وي.
دا په داسې حال کې ده، چې واشنګتن پوست تېره میاشت څرګنده کړې وه، چې روسیې طالبانو ته د امریکایي او ائتلافي سرتېرو د وژلو په بدل کې پیسې ورکړي او له همدې کبله په تېرو څو میاشتو کې ډېر بهرني سرتېري وژل شوي هم دي.
د واشنګتن پوست د څرګندونو له مخې؛ دغه معلومات په وروستیو څو میاشتو کې له نیول شويو وسلوالو څخه د امریکایي ځواکونو له څېړنو وروسته په ډاګه شوي دي.
همدارنګه پنتاګون هم پرلپسې ویلي، چې د دغو ادعاوو د ملاتړ لپاره هیڅ اړین شواهد نلرو او مسکو هم دغه تورونه رد کړي دي.
د امریکایي ځواکونو د مرکزي قومندانۍ لوی درستیز جنرال فرانک مکینزي د سه شنبه پر ورځ خبریالانو ته وویل، چې سره له دغو معلوماتو امریکا په افغانستان کې د خپلو سرتېرو د ساتنې لپاره کوم اړین ګام ندی پورته کړی؛ خو خپلو استخباراتي کارمندانو ته یې سپارښتنه کړې، چې په دې اړه خپلې پلټنې بشپړې کړي.
هغه ویلي: ما استخباراتو کارمندان د پلټنو لپاره استولي دي. زه باور لرم، چې دمګړۍ یې پلټنې روانې دي.
نوموړي زیاته کړې: زه له دې موضوعاتو پوره خبر یم. زه د پېښې په ځای کې یو قومندان یم او ما دا له نږدې لیدلي او په دې اړه اندېښمن هم یم. ما یوازې دې ته پام ندی کړی، چې هلته دې د علت او معلول کومه اړیکه وي.
امریکا په تېرو وختونو کې روسیه طالبانو ته د وسلو پر برابرولو او ملاتړ تورنه کړې؛ خو روسیې تل له طالبانو ملاتړ رد کړی دی.
جنرال مکنزي څرګنده کړې که روسیه له دوی سره مرسته کوي یا نه؛ خو طالبانو پوره هڅه کړې، چې زمونږ په وړاندې عملیات ترسره کړي.
ویل کیږي، چې په ۲۰۱۸ کال کې ۱۰ ، تېر کال ۱۶ او سږکال ۲ امریکايي سرتېري وژل شوي دي.
تازه خبرونه
۱۴۰۲ لمریز لېږدیز کال د افغان ښځو او نجونو لپاره یو ستونزمن کال و
۱۴۰۲ لمریز لېږدیز کال په داسې حال کې پای ته رسیږي، چې د نجونو پر زدهکړو لګول شوي محدودیتونه لرې نشول او له شپږم ټولګي څخه پورته د نجونو او میرمنو پرمخ د ښوونځیو او پوهنتونونو دروازې خلاصې نشوې.
۱۴۰۲ لمریز لېږدیز کال د افغان ښځو او نجونو لپاره یو ستونزمن کال و، ځکه په دې کال کې دوی تمه درلوده، چې د ښوونځیو او پوهنتونونو دروازې به د دوی پرمخ پرانستل شي او دوی به خپلو ټولګیو ته ستنې شي؛ خو له یو کال تمې وروسته هم د دوی دا هیله پوره نشوه او اسلامي امارت د دوی لپاره د ښوونځيو او پوهنتونونه دروازې خلاصې نکړې.
د اسلامي امارت چارواکو په وار وار ویلي، چې د نجونو لپاره به د ښوونځیو او پوهنتونونو د پرانستلو طرحه وروستۍ شي؛ خو تر اوسه وروستۍ شوې نده.
په بېلا بېلو ملي او نړیوالو ناستو کې غوښتل شوي: ښځو او نجونو ته دې اجازه ورکړ شي، چې کار او زدهکړو ته ستنې شي؛ خو د اسلامي امارت امر ثاني پخپل حال پاتې دی او په دې اړه بل حکم صادر نشو.
د ملګرو ملتونو او د نړۍ د هېوادونو استازو په ځلونو ټینګار کړی چې ښځو او نجونو ته دې د تعلیم حق ورکړ شي؛ خو اسلامي امارت یې غوښتنې منلې ندي.
د امریکا بهرنیو چارو وزیر انټوني بلینکن ویلي: د ښځو او نجونو له حقونو ملاتړ زمونږ د بهرنۍ تګلارې برخه ده؛ په تېرو درې کلونو کې مو د ټولې نړۍ د ښځو او نجونو د ملاتړ لپاره تګلارې او پروګرامونه وړاندې کړي دي.
د اسلامي امارت ویاند ذبیح الله مجاهد څو څو ځله له رسنیو سره په ګڼو مرکو کې د نجونو لپاره د ښوونځیو او پوهنتونونو د پرانیستلو په اړه خبرې کړي؛ خو دا یې ندي ویلي، چې د نجونو انتظار به کله پای ته رسیږي.
دغه راز پوهنتونونو او کار ته د نجونو او میرمنو پرتګ هم د بندیزونو یو کال کیږي؛ هیلې دادي، چې په نوي تعلیمي کال کې د نجونو او میرمنو د کار او زدهکړو په اړه د اسلامي امارت تګلاره بدلون وکړي او د افغان نجونو لپاره د تړلیو ښوونځیو د زدهګړو د پیل زنګ ووهل شي.
تازه خبرونه
امریکا په افغانستان کې له هوايي بریدونو وروسته له پاکستان څخه د زغم غوښتنه وګړه
امریکا د دوشنبې پر ورځ له پاکستان څخه وغوښتل، چې په افغانستان کې د ترهګرۍ پر ضد په خپلو عملیاتو کې له زغمه کار واخلي.
د د سپینې ماڼۍ ویاندې کارین ژان پیر د دوشنبې پر ورځ (د کب اتهویشته) ویلي، چې اسلامي امارت باید ډاډ ورکړي، چې له افغانستان څخه ترهګریز بریدونه پرې نکیږي.
د نوموړې غږ له هغې وروسته راپورته شو، چې د اسلامي امارت ویاند ذبیح الله مجاهد د پکتیکا او خوست ولایتونو پر دوه ولسوالیو د یکشنبې پر شپه د پاکستان هوايي بریدونه وغندل او دا یې د افغانستان پر خاوره تېری یاد کړ.
مجاهد په یوه خبرپاڼه کې ویلي، چې د پاکستان هوايي ځواکونو د پکتیکا ولایت د برمل ولسوالۍ په لمنه او د خوست ولایت د سپېرې ولسوالۍ په افغان دوبي سیمو کې د استوګنې پر کورونو بمبارد کړې دی.
د نوموړي د څرګندونوله مخې؛ په دغو هوايي بريدونو کې درې ښځې او درې ماشومان په پکتيکا او دوه ښځې په خوست ولایت کې وژل شوي دي.
ژانپیرد خبریالانو د یوې پوښتنې په ځواب کې ویلي: مونږ پر پاکستان د بریدونو او په افغانستان کې له بریدونو څخه د ملکي وګړو پر مرګ او ژوبله خواشیني یوو.
د سپینې ماڼۍ دې ویاندې له اسلامي امارت څخه غوښتي، چې تروریستي ډلو ته د بریدونو اجازه ورنکړي.
هغه وایي: مونږ له طالبانو [اسلامي امارت] څخه غوښتنه کوو، چې تروریستي بریدونه به د افغانستان له خاورې نه کیږي. مونږ له پاکستان څخه هم غوښتنه کوو، چې له زغم څخه کار واخلي او ډاډ ترلاسه کړي، چې په ترهګرۍ ضد هڅو کې ملکي وګړیو ته زیان ونهرسیږي.
ژان پیر د پاکستان او اسلامي امارت له چارواکو وغوښتل، چې خپل اختلافات د خبرو له لارې حل کړي.
هغې زیاته کړې: مونږ غواړو دا ډاډ ترلاسه کړو، چې افغانستان به بیا هیڅکله د تروریستانو پر خوندي ځای بدل نشي او غواړو امریکا یا زمونږ نورو شریکانو یا متحدینو ته هم زیان ونهرسیږي. مونږ دا موضوع پوره روښانه کړې او په دې اړه ټینګ یوو.
له دې مخکې د پاکستان حکومت یوه خبرپاڼه خپره کړې، چې په کې راغلي؛ دا عملیات د استخباراتي معلوماتو پر بنسټ ” د حافظ ګل بهادر پر ترهګرې ډلې ” ترسره شوي دي.
په اعلامیه کې ویل شوي، چې بهادر ډله له تحریک طالبان پاکستان سره یوځای په پاکستان کې دننه د ګڼو ترهګریزو بریدونو مسووله وه، چې د سلګونو ملکي وګړو او امنیتي ځواکونو د مرګ او ژوبلې لامل شوې.
په اعلاميه کې دا هم راغلي، چې پاکستان په تېرو دوه کلونو کې څو ځلې له اسلامي امارت سره په افغانستان کې د تحریک طالبان پاکستان په ګډون د ترهګرو ډلو د شتون په اړه خپلې اندېښنې شریکې کړې دي.
د افغانستان اسلامي امارت تل ويلي؛ هیڅ ډلې ته به اجازه ورنکړي، چې د افغانستان خاوره د کوم هېواد پر ضد وکاروي.
تازه خبرونه
افغانستان د پاکستان سفارت چارسمبالی احضار کړ
د افغانستان اسلامي امارت بهرنیو چارو وزارت د پاکستانيو پوځیانو لهخوا د افغانستان له حریمه د سرغړونې په غبرګون کې د پاکستان سفارت چارسمبالی احضار او احتجاجلیک یې ورته وسپاره.
د افغانستان اسلامي امارت د بهرنیو چارو وزارت د څرګندونو له مخې؛ افغانستان د نړۍ د زبرځواکونو پرخلاف د ازادۍ د اوږدې مبارزې تجربه لري، پخپله خاوره تېری نشي زغملی.
پاکستانی ولس او نوی ملکي حکومت باید پرېنږدي، چې ځینې کړۍ پر غیر مسوولانه کړنو خپل غلط سیاستونه روان وساتي او د “دوه مسلمانو ګاونډ هيوادونو” اړیکې خرابه کړي.
-
لوبی5 days ago
راشدخان د ایرلینډ پروړاندې د ۲۰ آوریزو نړیوالو سیالیو لوبډلمشر شو
-
تازه خبرونه2 days ago
د هند د یوه پوهنتون په لیلیه کې پر لمونځ کوونکیو برید شوی
-
تازه خبرونه1 day ago
په نوي تعلیمي کال کې دې د نجونو ښوونځي او پوهنتونونه پرانیستل شي – حامد کرزی
-
نړۍ2 days ago
د آیسلینډ اورشېندنې یو ځل بیا سرراپورته کړ
-
تازه خبرونه2 days ago
په بدخشان کې د سرو زرو کان د نړېدو له کبله دوه کارګر مړه شوي
-
نړۍ1 day ago
شمالي کوریا یو بالسټیک توغندی وتوغاوه
-
تازه خبرونه5 hours ago
امریکا په افغانستان کې له هوايي بریدونو وروسته له پاکستان څخه د زغم غوښتنه وګړه
-
تازه خبرونه2 days ago
خبریالان د ملت او نظام د وصل استازي دي-ذبیح الله مجاهد