د امریکا ټاکل شوي ولسمشر ډونالډ ټرمپ د تحقیقاتو فدرالي ادارې (FBI) د نوي مدیریت لپاره خپل غوراوی اعلان کړ.

ډونلډ ټرمپ په ډاګه کړې، چې د FBI د راتلونکي رییس په توګه یې د کاش پټل د نومولو پرېکړه کړې ده.

ټرمپ په خپله ټولنیزه شبکه کې لیکلي؛ ویاړم، چې ۴۴ کلن کش پټل به د تحقیقاتو فدرالي ادارې د راتلونکي رییس په توګه دنده ترسره کړي.

دغه راز د FBI اوسنی رییس کریسټوفر ری باید له دندې ګوښه شي او یا ووځي.

کریسټوفر په ۲۰۱۷ کال کې د ټرمپ لخوا دغه مقام ته ټاکل شوی و او د خپلې لس کلنې دورې درې کاله یې پاتې دي.

پټل، چې هندي نژاد دی؛ د ټرمپ په لومړي پېر کې یې غوښتي وه، چې د FBI د استخباراتو راټولولو هڅې ودروي او له هر هغه کارمند څخه یې پاکه کړي، چې د ټرمپ د اجنډا ملاتړ نه‌کوي.

هغه د اف‌بي‌آى د ریاست د ترلاسه کولو لپاره د امریکا د مشرانو جرګې تصویب ته اړتیا لري.

دا په داسې حال کې ده، چې ډونلډ ټرمپ د ری د ماموریت پر مهال په پنسلوانیا کې د ټاکنيزو کمپاینونو پر مهال د وژونکي برید هدف وګرځېد او پر غوږ ټپي شو.

د ریاست الوزراء اقتصادي مرستیالۍ په بېلابېلو برخو کې د ۳۰ سټنډرډونو د منظورۍ اعلان کړی دی.

دغه بنسټ په یوه خبرپاڼه کې لیکلي: د شنبې پر ورځ( د لیندۍ لسمه ) د سټنډرډ د عالي شورا په غونډه کې، چې د ریاست الوزراء د اقتصادي مرستیال ملا عبدالغني برادر پر مشرۍ جوړه شوه؛ د ودانیزو، خوراکي، څښاک، طبي، کانونو، پټرولیم، نساجۍ، چاپېریال او برښنايي وسایلو په برخو کې یاد سټنډرډونه ومنل شول.

ملا برادر ويلي، هېوادوالو ته د باکيفيته محصولاتو او وارداتو د رسولو لپاره د سټنډرډونو رامنځته کول او پلي کول اړين دي.

هغه زياته کړې؛ له دې کار سره د بې کيفيته توکو د توليد او وارداتو مخه نيول کېږي او خلکو ته معياري توکي برابرېږي.

د ریاست الوزراء اقتصادي مرستیال له ټولو ادارو وغوښتل، چې د شورا تصویب شوي سټنډرډونه په جدي توګه پلي او وڅاري.

د ځمکو د غصب مخنیوي کمیسیون د کابل ښار د لسمې ناحیې اړوند د شېرپور په سیمه کې څه باندې ۱۵۵ جریبه ځمکه دولتي ملکیت اعلان کړه او په دې سیمه کې یې د جوړو شویو کورونو د وروستیو پړاوونو د ترسره کولو په اړه لازمې لارښوونې وکړې.

د عدلیې وزارت د خبرپاڼې له مخې؛ د دې ځمکې ختیځ لوري ته د وزیر اکبرخان شپږم، پېنځلسم او شپاړلسم نمبر سړکونه، لویدیځ ته د نوي ښار د قصابي کوڅه، سهیل ته د وزیر اکبر خان غونډۍ او د شهید څلورلاری او سویل ته شېرعلي خان سړک پروت دی. د کابل ښاروالۍ او د ځمکو د غصب د مخنيوي کمیسيون له پوره څېړنو وروسته دا ځمکه دولتي ملکیت تثبیت کړه.

د عدليې وزارت وايي، د دې څېړنې پر مهال د غاصبينو لخوا تخنيکي بورډ او کمیسيون ته داسې اسناد ندي وړاندې شوي، چې رې شخصي ثابته شي.