د افغانستان په چارو کې د پاکستان ځانګړي استازي محمد صادق کابل ته خپل درې ورځنی سفر پای ته رسولی او د اسلامي امارت له یو شمېر چارواکو سره یې د سوداګرۍ، دوه اړخیزو اړیکو، سیمه‌ییز اتصال او د امنیت په ګډون پر بېلابېلو موضوعاتو خبرې کړې دي.

د پاکستان بهرنیو چارو وزارت د څرګندونو له مخې؛ د دې سفر په پایله کې د اداري اړیکو مهالوېش هم بشپړ شو او هوکړه وشوه، چې د ګډې همغږۍ کمیټې (JCC) غونډه به د اپریل له پېنځلسمې  مخکې ترسره شي.

د بهرنیو چارو وزارت د ویاند د څرګندونو له مخې؛ په دې سفر کې صادق د افغانستان د بهرنیو چارو وزارت له چارسمبالي(سرپرست) امیر خان متقي سره ولیدل او د دواړو خواوو ترمنځ د متقابلو ګټو، سولې او امنیت، سوداګرۍ او اقتصادي همکاریو په اړه یې نظرونه وړاندې کړل.

صادق خان له افغانستان سره د دوامداره اړیکو لپاره د پاکستان ژمنه بیا تکرار کړه او د دوه اړخیزو اړیکو د پیاوړتیا لپاره یې د پاتې مسلو د حل کولو پر اهمیت ټینګار وکړ.

دواړو خواوو هوکړه وکړه، چې د دواړو هېوادونو ترمنځ د همکارۍ د ودې لپاره د لوړې کچې تعاملات او بحثونه زیات کړي.

د پاکستان بهرنیو چارو وزارت اعلان وکړ، چې د افغانستان او پاکستان د سوداګرۍ وزیران به له کوچني اختر څخه مخکې د خبرو اترو لپاره سره وګوري.

ټاکل شوې، چې د صنعت او سوداګرۍ وزارت چارسمبالی نورالدین عزیزي به له کوچني اختر وروسته د سوداګرۍ اړوند مسلو د حل لپاره پاکستان ته سفر وکړي.

پاکستاني رسنیو راپور ورکړی، چې صادق به په کابل کې له ملکي او پوځي چارواکو سره یوځای د JCC په غونډه کې ګډون وکړي.

صادق د افغانستان د صنعت او سوداګرۍ وزرارت له چارسمبالي نورالدین عزیزي سره هم لیدلي دي.چیرې دواړو خواوو د دوه اړخیزې سوداګرۍ، اقتصادي اړیکو او د سوداګریزو دهلیزونو او سیمه‌ییز اتصال په برخه کې د همکارۍ په اړه خبرې کړې دي.

د پاکستان استازي د دواړو هېوادونو د ګټې لپاره د سیمه‌ییزې سوداګرۍ او ټرانزیټ لارو له ظرفیت څخه په بشپړه توګه د ګټې اخیستنې پر اړتیا ټینګار وکړ.

ځايي پاکستاني رسنیو راپور ورکړی، چې پاکستان ته له راستنېدو سره سم صدیق د لومړي وزیر مرستیال اسحاق ډار ته له افغان چارواکو سره د خپلو غونډو په اړه معلومات ورکړل او د دوه اړخیزو اړیکو او سیمه‌ییزې همکارۍ پر پایلو او پرمختګ یې ټینګار وکړ.

د بیات بنیاد د روژې د مناسبتي مرستو په لړ کې دا ځل د ننګرهار ولایت لسګونه بېوزلو کورنیو دا مرستې ترلاسه کړې.

د دې بنیاد چارواکي وايي، چې په دې مرسته کې اوړه، وريجې او غوړي شته، چې له یوې رڼې سروې وروسته اړمنو ته ووېشل شول.

په ننګرهار کې د بیات بنیاد استازي عطاءالله ساحل ویلي: “بیات بنیاد هر کال په ټول افغانستان کې له زرګونو کورنیو سره مرسته کوي. له نېکه مرغه نن د روژې دا مناسبتي مرستې په جلال‌آباد کې سلګونو کورنیو ته هم وویشل شوه. په دې مرسته کې اوړه، وريجې او غوړي شته دي.”

د ننګرهار ولایت د اقتصاد ریاست چارواکي د بیات بنیاد د ستایلو تر څنګ له نورو خیریه بنسټونو هم غواړي، چې د روژې په مبارکه میاشت کې له اړمنو خلکو سره مرسته وکړي.

د ننګرهار د اقتصاد ریاست استازي محمد آصف رحماني ویلي: “دا کورنۍ ډېرې مستحقې کورنۍ دي، چې د اقتصاد ریاست او بیات بنیاد د استازو په شتون کې د یوې سروې له ترسره کولو وروسته غوره شوې دي. دا کورنۍ مستحقې دي، چې کونډې، معیوبین او غریب خلک دي.”

د مرستو ترلاسه کوونکي هم د بیات بنیاد لخوا د روژې له مناسبتي مرستو هرکلی کوي او وايي، چې اړمن کسان نورو مرستو ته اړتیا لري.

حیدر، چې د مرستو له ترلاسه کوونکو څخه یو دی وایي: “مونږ ډېر غریب خلک یوو. د کار فرصتونه نشته. له بیات بنیاد څخه ډېره مننه، چې مرسته یې وکړه.”

د مرستې یو بل ترلاسه کوونکی محمد زمان هم ویلي، “زه په دې روژه کې له ستونزو سره مخ وم. نه مې شو کولی نفقه پیدا کړم. بیات بنیاد راسره مرسته وکړه. خدای دې ورسره مرسته وکړي.”

بیات بنیاد نه یوازې د روژې په مبارکه میاشت کې، بلکې د طبیعي پېښو پر مهال هم له اړمنو خلکو سره مرسته کړې او همدارنګه یې په بېلابېلو سکټورونو په ځانګړي توګه د روغتیا او تعلیم په برخه کې یې له دولتي ادارو سره همکاري کړې ده.

د ایران بهرنیو چارو وزیر ويلي، چې په افغانستان کې اوسمهال “امنیت او حاکمیت” ټینګ او شرایط د پخوا پر پرتله بدل شوي دي.

د ایران بهرنیو چارو وزیر عباس عراقچي زیاته کړې، چې د پخوا په څیر، چې د افغانستان هره برخه د یوې ډلې تر کنټرول لاندې وه؛ اوس داسې نده.

هغه له “خبر آنلاین” سره په یوه مرکه کې ویلي: “حقیقت دا دی، چې اوس په افغانستان کې یو داسې ځواک شته، چې په تېرو درې نیمو کلونو کې یې خپل حاکمیت ټینګ کړی دی. د تېرو وختونو پر پرتله، چې د افغانستان هر کونج د یو کس تر کنټرول لاندې و؛ اوس هغسې نده. امنیت او حاکمیت ټینګ دی او مونږ باید له خپلو ملي ګټو لپاره موضوعات حل کړو.”

د ایران بهرنیو چارو وزیر د څرګندونو په ځواب کې اسلامي امارت وايي، چې دا څرګندونې د افغانستان د واقعیتونو بشپړ درک ښیي.

د اسلامي امارت مرستیال ویاند حمدالله فطرت وايي: “دا په حقیقت کې د افغانستان د واقعیتونو سم درک دی. دا یو حقیقت دی، چې په افغانستان کې یو واحد سیاسي واکمني پر افغانستان بشپړ حاکمیت لري.”

عباس عراقچي په خپله مرکه کې زیاته کړې: په افغانستان کې داسې مسایل شته، چې د ایران له ملي ګټو سره تړلي دي؛ نو هغه کابل ته سفر وکړ، چې د اسلامي امارت له چارواکو سره په دې اړه خبرې وکړي.

د ایران بهرنیو چارو وزیر حق‌آبه، په ایران کې د افغان کډوالو او همدارنګه د داعش فعالیت هغه مسلې یادې کړې، چې د دواړو هېوادونو د چارواکو ترمنځ باید پرې بحث وشي.

ایراني ډیپلومات زیاته کړې، چې تهران لکه نورو هېوادونو ته ورته اسلامي امارت پر رسمیت ندی پېژندلی؛ خو د بندیزونو لاندې، له افغانستان سره د دوی سوداګري پر رسمي او غیر رسمي توګه د میلیارډونو ډالرو ارزښت لري.

دغه راز د ریاست الوزراء اداري مرستیال په تهران کې د افغانستان سفارت له شارژدافیر سره په لیدنه کې ویلي، چې افغانستان او ایران اوږدمهاله مذهبي، تاریخي، کلتوري او اقتصادي اړیکې لري او د سفارت چارواکي باید د دې اړیکو د پیاوړتیا لپاره نور ډېر کار وکړي.

په تهران کې د افغانستان سفارت چارسمبالي(سرپرست) فضل محمد حقاني هم ویلي؛ د سفارت چارواکي د دواړو هېوادونو ترمنځ په بېلابېلو برخو کې د اړیکو د پراخولو لپاره کار کوي، چې ښې پایلې یې ترلاسه کړې دي.

فضل محمد حقاني ویلي، چې په ایران کې د ګڼشمېر افغانانو شتون ته پر پاملرنه په دې سفارت کې قونسلي خدمات فعال دي او په هغه هېواد کې میشتو افغانانو ته ښه خدمات وړاندې کیږي او د دوی ستونزې حل کیږي.