تازه خبرونه
ایران هند ته د افغانستان لپاره د مرستو په لېږدولو کې د همکارۍ وړاندیز وکړ
هندي رسنیو خبر ورکړی، چې ایران هند ته د افغانستان لپاره د اړوند بشري مرستو په لېږدولو کې د همکارۍ وړاندیز وکړ.
د هندي رسنیو د راپورونو له مخې، په دې مرستو کې غنم، درمل او د کرونا واکسین شامل دي.
راپورونو په ډاګه کړې، چې د ایران د بهرنیو چارو وزیر امیر عبداللهیان دغه وړاندیز د هند د بهرنیو چارو له وزیر جې شنکر سره په ټیلیفوني خبرو کې کړی دی.
دغه ایراني چارواکي ویلي، چې دغه مرستې به د چابهار بندر له لارې افغانستان ته لېږدول کیږي.
د هند حکومت له دې مخکې د ایران له لارې افغانستان ته د کرونا واکسین ۵۰۰ زره خوراکه استولي وه.
دغه واکسین په کابل کې د روغتیا نړیوال سازمان ته وسپارل شول، چې اندراګاندي روغتون به یې وکاروي.
دغه راز د جنورۍ پر اوومه، دغه هېواد افغانستان ته د بشري مرستو درېیمه ټولګه د طبي توکو په ګډون لېږلې ده.
د یادونې ده، چې چابهار بندر د ایران او هند لخوا د سوداګریزو اړیکو د ټینګښت په موخه جوړ شوی دی.
