تازه خبرونه
ایرانیو چارواکو دوه افغان وګړي په عام محضر کې اعدام کړل
د ایران دولتي خبري اژانس خبر ورکړی، چې د شنبې پر ورځ (د سرطان ۱۷ نېټه) ایراني چارواکو پر یوه زیارت د تېر کال د برید پر تور دوه افغان وګړي په عام محضر کې اعدام کړل.
د ایرنا خبری اژانس د څرګندونو له مخې؛ دغه دوه تورن افغان وګړي نن سهار وختي د شېراز شاه چراغ زیارت ته نږدې د سلګونه خلکو په مخکې پر دار وځړول شول.
تېر کال د شاه چراغ په زیارت کې برید لږ تر لږه ۱۳ کسان ووژل او ۳۰ نور ټپیان شول.
داعش د دغه برید مسوولیت منلی دی.
د ایران بشري حقونو ټولنې له دې مخکې ویلي وه: محمد رامز رشیدي او سید نعیم هاشمي قتالي، چې د افغانستان وګړي دي؛ له ثبوت او اسنادو پرته پر اعدام محکوم شول.
دې ټولنې په یوه اعلامیه کې لیکلي، چې د رشیدي او قتالي پر وړاندې صادره شوې پرېکړه قانوني اعتبار نهلري.
د ایران بشري حقونو ټولنې مشر محمود امیري مقدم ویلي، چې دغه دوه افغان وګړي له یوې «سختې غیر عادلانه» محاکمې وروسته له جرمي ثبوت پرته پر اعدام محکوم شوي دي.
