رویټرز د ملګرو ملتونو د دوه چارواکو د څرګندونو له مخې راپور ورکړی؛ دا ټولنه هڅه کوي، چې افغانستان د اقلیم د بدلون له اغېزو سره د مبارزې لپاره مالي مرستو ته لاسرسی پیدا کړي.

افغانستان یو له هغو هېوادونو څخه دی، چې د اقلیم د بدلون له کبله زیانمن شوی؛ په ۲۰۲۱ کال کې د اسلامي امارت د بیا واکمنۍ له پیل راپدېخوا په دې برخه کې هیڅ راز مرسته ترلاسه کړې نده.

په افغانستان کې د ملګرو ملتونو د خوړو او کرنې ادارې مشر ډیک ټرینچارډ ویلي: په افغانستان کې د اقلیم په اړه هیڅوک منفي نظر نلري. د افغانستان په هر ځای کې د اقلیم د بدلون او د چاپېریال اغېزې لیدل کیږي.

د ملګرو ملتونو دوه ادارې اوسمهال د هغو وړاندیزونو پر چمتو کولو بوختې دي، چې تمه ده په راتلونکي کال کې به له افغانستان سره د شاوخوا ۱۹ میلیون ډالر مرستې ترلاسه کړي.

له دغو څانګو څخه یوه هم د ملګرو ملتونو د خوړو او کرنې اداره ده، چې د ۱۰ میلیون ډالرو پر ارزښت به له یوې پروژې ملاتړ وکړي. دا پروژه به د افغانستان په څلورو ولایتونو کې د څړځایونو، ځنګلونو او اوبو لګولو سیمو مدیریت ته وده ورکړي.

دغه راز د ملګرو ملتونو پراختیایي پروګرام هیله لري، چې له کلیوالو خلکو سره د مرستې لپاره ۸ اعشاریه ۹ میلیون ډالر ترلاسه کړي.

د ملګرو ملتونو د پراختیایي ادارې استازي سټیفن روډریکوز ویلي: مونږ د شنه اقلیم صندوق په ګډون د اقلیم په برخه کې له ټولو لویو تمویلوونکیو بنسټونو سره خبرې کوو، چې خنډونه لري او داسې لارې پرانیزي، چې په افغانستان کې واکمن د غو مرستو لګولو ته لاسرسی ونلري.

د اسلامي امارت چارواکو سږ کال د لومړي ځل لپاره په باکو کې د اقلیم د بدلون په اړه په نړیواله غونډه کې ګډون کړی دی.

د چاپېریال ساتنې او پراختیا د زده کړو موسسې مسوول عبدالهادي اڅکزي ویلي، چې په دې غونډه کې د اسلامي امارت حضور به د افغانستان او نړیوالو مرستندویانو ترمنځ د باور فضا رامنځته کړي.

د پاکستان په شمال لویدیځ کې پر یوې پوستې د موټر بم چاودنې له کبله ۱۱ پوځیان وژل شوي دي.

د سې‌شنبې پر ورځ ( د لړم نهه‌ویشتمه) پاکستانيو چارواکو تائید کړه، چې یوه مشکوک ځانمرګي بریدګر د افغانستان پولې ته څېرمه د خیبر پښتونخوا ایالت په جاني‌خېل سیمه کې له چاودېدونکيو توکو ډک موټر ته چاودنه ورکړه، چې له کبله یې ۱۱ پوځیان ووژل شول او څلور نور ټپیان دي.

د دغو چارواکو د څرګندونو له مخې؛ دا پېښه پرون ماښام  ناوخته پر ځایي وخت اووه بجې رامنځته شوې ده.

تر اوسه چا یا کومې ډلې د دې پېښې مسوولیت په غاړه ندی اخیستی.

د سیمه‌ییزو رسنیو د راپور له مخې؛ د پاکستان د پوځ د اعلی سرقومندان، د کابینې وزیرانو او د دغه هېواد د استخباراتی ادارو د مشرانو پر ګډون د پاکستان د لومړی وزیر شهباز شریف پر مشرۍ د پاکستان د سیاسی- امنیتی کمیټې غونډه جوړه شوه.

دا په داسې حال کې ده، چې د پاکستان سیاسي او پوځي مشرانو د دغه هېواد په بلوچستان ایالت کې د وسلوالو او بېلتون غوښتونکیو ډلو پر ضد د نویو پوځي عملیاتو پر ترسره کولو هوکړه کړې ده.

په دې ناسته کې د دغه هېواد د وروستيو امنيتي حالاتو په تېره بيا په بلوچستان ايالت کې د بېلتون غوښتونکیو او ترهګرو د فعاليتونو شدت وڅېړل شو.

د خبری سرچینو د خبر له مخې: د پاکستان سیاسی، پوځی او امنیتی چارواکو په دې غونډه کې، چې له وسلوالو سره د مبارزې د پیاوړتیا لپاره جوړه شوې وه؛ د دې هېواد په بلوچستان صوبه کې د نویو پوځی عملیاتو د پیلولو منظوري ورکړه.

د افغانستان لپاره د ازبکستان نوي ټاکل شوي سفیر خپل باور لیک د افغانستان د بهرنیو چارو وزارت چارسمبالي امیر خان متقي ته وړاندې کړ.

امیر خان متقي د ازبکستان نوي سفیر ایبک عثمانوف ته ډاډ ورکړ، چې وزارت به یې د ازبکستان له سفارت سره پوره همکاري کوي.

متقي د دواړو هېوادونو د سفارتونو فعاله کېدل یو ښه پرمختګ وباله او وایي، چې دواړه هېوادونه به د اقتصادي پروژو لپاره ستر ګامونه پورته کړي.

ایبک عثمانوف هم ویلي، چې د دواړو هېوادونو اړیکې دوستانه دي او هغه به د خپل ماموریت پر مهال د دواړو هېوادونو ترمنځ د اړیکو د پراختیا لپاره هڅې وکړي.

له دې مخکې په افغانستان کې د اسلامي امارت نومول شوي سفیر عبدالغفار بحر خپل باورلیک د ازبکستان بهرنیو چارو وزیر ته سپارلی و.

اوسمهال کابل له ازبکستان سره د بل هر هېواد پر پرتله ښې سیاسي او سوداګریزې اړیکې لري او د دواړو هېوادونو لوړ پوړي پلاوي څو ځله سره لیدلي او خبرې اترې کړي دي.