د امریکا دفاع وزیر پیټ هګسټ ویلي پرېکړه اوس د ایران پورې اړه لري، چې آیا په منځني ختیځ  کې د بي -۲ بم غورځونکو الوتکو ځای پرځای کول به تهران ته یو پیغام وي که نه.

هغه هیله وښوده، چې د تهران د اټومي پروګرام لپاره به د امریکا او ایران خبرې اترې سوله‌ییزې حل شي.

امریکایي چارواکو رویټرز ته ویلي؛ پر یمن د امریکا د بمبارډ او له ایران سره د تاوتریخوالی له زیاتېدا سره همماله دې هېواد په مارچ میاشت کې شپږ بي-۲ بم غورځوونکې الوتکې د هند اوقیانوس د ډیګو ګارسیا د ټاپو امریکایي- بریټانوي پوځي اډې ته لېږدولې دي.  

د امریکا هوايي ځواک یوازې ۲۰ بي-۲ بم غورځوونکې الوتکې لري؛ ځکه، نو لږ کارول کېږي.

کارپوهانو ويلي، چې بي-۲ الوتکې پټه ټکنالوژي لري او د امریکا د درندو بمونو او اټومي وسلو د لېږدولو لپاره سمبال شوې دي.

کله، چې له هګسټ څخه وپوښتل شول؛ آیا بي – ۲ ایران ته پیغام لیږدوي، هغه وویل: “مونږ به دوی ته اجازه ورکړو، چې پرېکړه وکړي.”

هغه د پاناما په سفر کې خبریالانو ته ویلي: “دا یوه لویه شتمني ده … ټولو ته پیغام لېږدوي.”

هغه څرګنده کړې: “ولسمشر ټرمپ دا ښکاره کړې ده … ایران باید اټومي بم ونلري. مونږ ډېر هیله من یوو – ولسمشر پر سوله‌ییزه حل راڅرخي.”

ټرمپ د دوشنبې پر ورځ اعلان وکړ، چې امریکا او ایران د شنبې پر ورځ د تهران د اټومي پروګرام په اړه مستقیمې خبرې پیلوي او دا خبرداری یې هم ورکړ، چې که خبرې اترې ناکامې شي؛ نو ایران به له لوی خطر سره مخ شي.

ایران، چې په دې وروستیو اوونیو کې یې د ټرمپ غوښتنې رد کړې وې؛ وویل، چې غیر مستقیمې خبرې به په عمان کې ترسره شي او د دواړو هېوادونو پر اختلافاتو یې ټینګار وکړ.

د چاارشنبې پر ورځ ټرمپ یو ځل بیا ګواښ وکړ، چې که ایران د خپل اټومي پروګرام پای ته رسولو سره هوکړه ونکړي؛ نو له پوځي ځواک څخه به کار واخلي.

ټرمپ خبریالانو ته ویلي: “زه ډېر څه نه غواړم… خو دوی باید اټومي وسلې ونلري. که اردو ته اړتیا وي، مونږ اردو لرو. اړینه ده، چې اسرائیل به یې مشري کوي. هیڅوک مو نه‌رهبري کوي. مونږ هر هغه څه، چې غواړو ترسره کوو یې.”

هغه له د پوځي عملیات د پیل له وخت ښودلو ډډه وکړه.

لویدیځ قدرتونه ایران تورنوي، چې د یورانیمو غني کولو له لارې د اټومي وسلو د جوړولو لپاره پټ پروګرام لري.

دا په داسې حال کې ده، چې تهران وايي؛ اټومي پروګرام یې په بشپړه توګه د ملکي انرژۍ لپاره دی.

په ملګرو ملتونو کې د پاکستان دایمي ماموریت له نړۍ وغوښتل، چې له افغانستان څخه پاکستان ته دې د غیرقانوني وسلو د قاچاق مخنیوي لپاره کار وکړي.

پاکستان د ملګرو ملتونو له امنیت شورا څخه غوښتي، چې په افغانستان کې دې وسلو ته د ترهګرو ډلو د لاسرسي مخه ونیسي.

سید عاطف رضا ویلي، چې وسلې د تحریک طالبان پاکستان او ازادۍ غوښتونکو بلوڅو غورځنګ په ګډون مخالفو ډلو لاس ته ورځي.

په ملګرو ملتونو کې د پاکستان د ماموریت سلاکار سید عاطف رضا د پرمختللو او عصري وسلو د قاچاق د مخنیوي لپاره د همغږۍ غوښتنه وکړه، چې تحریک طالبان پاکستان او د بلوچستان د آزادۍ غورځنګ په څېر وسلوالې ډلې یې تر لاسه کوي.

په ملګرو ملتونو ټولنه کې د پاکستان دایمي استازولۍ سلاکار سیدعاطف رضا ویلي: “وسلوالې ترهګرې ډلې په افغانستان کې د میلیارډونو ډالرو پر ارزښت غیرقانوني وسلې لري، چې د ملکي وګړو او پاکستاني وسلوالو ځواکونو پر وړاندې په تاوتریخوالي کې کارول کیږي. مونږ له خپلو نړیوالو شریکانو غواړو، چې د پرېښودل شویو وسلو پراخه زیرمې بېرته ترلاسه کړي، د وسلوالو ترهګرو ډلو لاسرسی پرې کړي، او د غیرقانوني وسلو د دې غوړېدونکي تور بازار د تړلو لپاره ګامونه پورته کړي.”

د پاکستان ډيپلومات د اسلام‌آباد دریځ بیا تکرار کړ، چې ټي ټي پي او نور وسلوال په افغانستان کې خوندي ځایونه په پاکستان کې دننه د وژونکو بریدونو لپاره کاروي.

ځینې ​​افغان کارپوهان په افغانستان کې د پاتې شویو وسلو د ساتنې پر اړتیا ټینګار کوي او وايي، چې پاکستان په امنیتي همکارۍ کې مخلص ندی او دوه ګونی معیار لري.

دلته بیا  اسلامي امارت تل له افغانستان څخه پاکستان او سیمې ته د امریکایي وسلو لېږد او قاچاق رد کړی دی.

د اسلامي امارت ویاند تل ټینګار کړی، چې په افغانستان کې پاتې شوي تجهیزات او وسلې د هېواد شتمني ده؛ ساتل کیږي او د افغانستان د خاورې د دفاع لپاره به وکارول شي.

د فرانسې بهرنیو چارو وزیر ژان نویل باروټ ویلي، چې د ایران د اټومي پروګرام د محدودولو پر نوي تړون هوکړه ونشي؛ نو پوځي برید شونی ښکاري.

دا خبرې د فرانسې بهرنیو چارو وزیر ژان نول باروټ د چارشنبې پر ورځ کړې دي.

هغه د پارلماني غونډې پر مهال ویلي: “د دې تړون (۲۰۱۵) پای ته رسیدو ته یوازې څو میاشتې پاتې دي.”

نوموړي زیاته کړې: “که خبرې اترې ناکامې شي؛ نو پوځي برید به شونی وي.”

باروټ دا هم اعلان کړه؛ د ایران پر وړاندې د اروپايي ټولنې نوي بندیزونه، چې په اسلامي جمهوریت کې د بهرنیو وګړو د توقیف سره تړاو لري په راتلونکو اوونیو کې به تصویب شي.

د رویټرز د څرګندونو له مخې؛ د فرانسې په حکومت کې د یوې موضوع په اړه د داسې یوې غونډې ترسره کول بې ساري دي او د کړکیچونو د چټکېدو په اړه د اروپا د اندېښنې ژوروالی ښیي.

دا په داسې حال کې دهو چې پنټاګون په منځني ختیځ کې خپل شتون پیاوړی کړی دی.