د اطلاعاتو او کلتور وزارت د مطبوعاتي دفتر په اعلامیه کې ویل شوي، چې د دې وزارت چارسمبالي خیرالله خیرخواه د اروپايي ټولنې د شارژدافیرې میرمن بوسکوویچ پوهار ویرانکا او د دوی له ملګري پلاوي سره په کابل کې وکتل.

په دې ناسته کې د کلتوري میراثونو د ساتنې لپاره د نړیوالې ټولنې ترمنځ د همکارۍ په اړه بحث وشو.

خیرالله خیرخواه ویلي، چې د کلتوري میراثونو ساتنه یوازې د افغانانو مسوولیت ندی، بلکې د نړۍ مسوولیت هم دی، چې په دې برخه کې له افغانستان سره بشپړه همکاري وکړي.

په دې ناسته کې د اروپايي ټولنې نوې شارژدافیرې د افغانستان د کلتوري میراثونو د ساتنې په برخه کې د خپلې بشپړې همکارۍ ډاډ ورکړ.

افغانستان ګڼ کلتوري میراثونه لري، چې ډېر یې د ملګرو ملتونو تعلیمي، علمي او کلتوري بنسټ (یونسکو) سره ثبت شوي دي.

د افغانستان لپاره د روسیې د ولسمشر ځانګړي استازي ضمیر کابلوف ویلي؛ مسکو په پام کې لري، چې له کابل سره د سوداګرۍ او اقتصادي اړیکو په اړه دوه اړخیزه کاري ډله جوړه کړي.

هغه ویلي، چې دا بڼه به په لنډمهاله توګه د بین الحکومتي کمیسیون د بدیل په توګه کار وکړي.

کابلوف د روسیې سولویوف لایف رسنۍ سره په خبرو کې ویلي: "راتلونکی پسرلی به د سوداګرۍ او اقتصادي اړیکو په اړه یوه دوه اړخیزه کاري ډله جوړه شي.

کابلوف وايي: " په اوسنیو شرایطو کې، چې دا نظام (اسلامي امارت) تر دې دمه پر رسمي ډول په سیاسي توګه نه دی پېژندل شوی؛ دا ډله به په اصل کې د اقتصادي، سوداګرۍ، امنیتي او نورو همکاریو په اړه د بین الحکومتي کمیسیون ځایناستې شي."

ولسمشر ولادمیر پوتین د تېرې میاشتې په وروستیو کې یو قانون لاسلیک کړ، چې د ترهګرو ډلو له نوملړه  د اسلامي امارت لرې کولوته اجازه ورکوي.

د یادونې ده، چې د روسیې ولسمشر ولادیمیر پوتین څه وخت مخکې اسلامي امارت د ترهګرۍ پر وړاندې په مبارزه کې د مسکو ستراتیژیک ملګری وباله.

له نسلونو راپدېخوا په بلخ ولایت ټټاران یا مسګران خپل کاروبار کوي؛ خو هغه څو کسان، چې اوس پاتې دي وايي، چې دوی د افغانستان په زیان لیدونکي اقتصاد کې د ژوندي پاتې کیدو لپاره دغه سوداګري کوي.

د بلخ ولایت د مسو صنعت اوږد تاریخ لري.

د دې صنعت یو شمېر کاروباریان وايي؛ د مارکیټ نشتوالي د دوی کارونه په ټپه درولي او مجبور دي، چې د مسي لوښو سوداګري وکړي.

دوی له خلکو غواړي، چې د بهرنیو توکو د پېرلو پر ځای له کورنیو تولیداتو کار واخلي.

يو وخت و، چې د مسي لوښي په افغانستان کې د کورنيو ښکلا او سينګار و. اوس خلک د پخوا پر څېر دا لوښي او د اوبو جګونه نه کاروي.

په مزارشريف ښار کې د مسو يو شمېر سوداګر وايي، چې هېواد ته د ارزانه او بهرنيو توکو له راتګ سره مسي لوښو خپل بازار له لاسه ورکړى دى.

که څه هم د بلخ د صنایعو خونې رییس میرویس احمدي د دغه صنعت د ژوندي ساتلو لپاره له هڅو خبره کوي؛ خو له خلکو غوښتنه کوي، چې له کورنیو تولیداتو کار واخلي.

د بلخ د کسبګرو خونې چارواکي مني، چې دا صنعت مخ پر کمیدو دی؛ خو وایي د دې سکټور د ودې لپاره هڅې روانې دي او له خلکو یې غوښتي، چې د کورنیو تولیداتو ملاتړ وکړي.