Connect with us

تازه خبرونه

افغان او امریکایي امنیتي چارواکو هلمند ته سفر کړی

خپور شوی

د

(Last Updated On: لړم ۳, ۱۴۰۱)

په افغانستان کې د امریکایي او پرېکنده ملاتړ ماموریت ځواکونو عمومي قومندان جنرال سکات میلر او افغان امنیتي لوړپوړیو چارواکو د هلمند ولایت د امنیتي حالاتو د څېړلو په موخه دغه ولایت ته سفر کړی دی.

افغان امنیتي چارواکو او د ناتو او امریکایي ځواکونو عمومي قومندان جنرال سکات میلر د سې شنبې پر ورځ( د غبرګولي ۲۸) له هلمند ولایت څخه په لیدنه کې له سیمه ییزو چارواکو سره هم امنیتي ناسته ترسره کړې ده.

د هلمند والی محمد یاسین خان د هلمند ولایت د امنیتي وصعیت په اړه ډاډ څرګند کړ او وایي، چې افغان ځواکونو په خپلو یرغلیزو بریدونو کې له لاسه وتلې یو شمېر سیمې له وسلوالو طالبانو بېرته نیولې دي.

د ۲۱۵ قول اردو قومندان جنرال عبدالهادي ترین څرګنده کړې، چې په هلمند ولایت کې پوځي چارواکي د پیاوړتیا او وړتیا له مخې ټاکل شوي دي.

سربېره پر دې، د دفاع وزارت مرستیال یاسین ضیا ژمنه وکړه، چې له سیمه ییزو چارواکو سره به مرسته وکړي؛ خو وایي، چې مونږ له تاسې څخه خلکو ته د خدمت کولو د پایلو د لیدلو تمه لرو.

دغه راز د امریکا لوړپوړي قومندان میلر د هلمند له مسوولینو څخه مننه وکړه او څرګنده کړې یې ده، چې طالبان اوس ستاسې بریاوې درک کوي او پوهیږي، چې تاسې څه لاسته راوړنې لرئ.

په دې وروستیو کې، امنیتي مسوولینو د  میلر په ملتیا د افغانستان یو شمېر ولایتونو ته سفرونه کړي او له سیمه ییزو مسولینو سره یې د اړوند ولایتونو پر امنیتي وضعیت بحث او خبرې کړې دي.

هلمند د افغانستان یو بې ثباته ولايت دی، چې وسلوال طالبان ان د لښکرګاه ښار په ګډون په ځينو ولسواليو کې پراخ شتون لري.

تازه خبرونه

د داعش خراسانی مشر د پاکستان په بلوچستان کې دی – رویټرز

Published

on

(Last Updated On: وری ۹, ۱۴۰۳)

رویټرز خبري اژانس راپور ورکړی، چې د داعش د خراسان څانګې مشر د پاکستان په بلوچستان ایالت کې ژوند کوي.

د دغه خبري آژانس د راپور له مخې: ۲۹ کلن ثناالله غفاري، چې شهاب المهاجر هم یاد شوی؛ دا ډله یې د داعش پر تر ټولو وېرونکې څانګې بدله کړې ده.

رویټرز دا هم څرګنده کړې، چې ثناالله غفاري په ۲۰۲۰ ز. کال کې د داعش خراسان څانګې مشري پر غاړه واخیسته او د ده د مشرۍ پر مهال دغې ډلې سخت بریدونه وکړل او یو شمېر کسان یې ځان ته جلب هم کړل.

رویټرز زیاته کړې، چې د غفاري په اړه د ۲۰۲۱ کال د کابل پر هوايي ډګر د داعش له وژونکي برید مخکې، چې ۱۷۰ افغان ملکي وګړي او ۱۳ امریکايي پوځیان ووژل شول؛ ډېر لږ معلومات خپاره شوي وه.

د داعش د خراسان څانګې بحث وروسته له هغې ګرم شو، چې د تېرې جمعې ورځ مسکو ته نږدې د کنسرت په یوه تالار کې خونړۍ ډزې وشوې او لږ تر لږه ۱۳۹ کسان په کې ووژل شول.

له دې مخکې پاکستانيو چارواکو اعلان کړی و، چې غفاري د تېر کال په جون میاشت کې د افغانستان په کونړ ولایت کې وژل شوی؛ خو اوس رویټرز خبر ورکوي، چې نوموړی پاکستان ته تښتېدلی او د بلوچستان په ایالت کې اوسېږي.

د افغانستان کورنیو چارو وزارت ویاند عبدالمتین قانع وايي، داعش له څه باندې دوه کلونو راپدیخوا په افغانستان کې ځپل شوی او خپلې عملیاتي وړتیاوې یې له لاسه ورکړي او ګواښ پېښولی نشي.

ویل کیږي، چې داعش په افغانستان کې وروستی برید د کندهار ولایت د کابل بانک پر دفتر وکړ، چې ۳ کسان یې ووژل او ۱۲ نور ټپیان دي.

Continue Reading

تازه خبرونه

د رښتر پر کچه ۵ اعشاریه ۲ درجې زلزلې افغانستان ولړزاوه

Published

on

(Last Updated On: وری ۹, ۱۴۰۳)

د هند د زلزلې ملي مرکز څرګنده کړې، چې نن (پنجشنبه د وري نهمه) له غرمې وروسته د رښتر پر کچه ۵.۲ درجې زلزلې افغانستان ولړزاوه.

دا زلزله د ځمکې په ۷۰ کیلومټره ژوروالي کې رامنځته شوې او مرکز یې د بدخشان ولایت د اشکاشم ولسوالۍ شمال ختیځه غرنۍ سیمه ده.

دغه زلزله پر افغانستان سربېره په تاجکستان، ازبکستان او قرغزستان کې هم احساس شوې ده.

تر اوسه د دې پېښې د ځاني او مالي زیان په اړه څه ندي ویل شوي.

تېر اکټوبر په هرات ولايت کې د رښتر پر کچه شپږ اعشاريه څلور درجې زلزلې له دوه زره زيات کسان مړه او ډېر کلي ویجاړ کړل.

Continue Reading

تازه خبرونه

د بیات بنیاد د روژې مرسته د بلخ ولایت اړمنو ته ورسېده

Published

on

(Last Updated On: وری ۹, ۱۴۰۳)

بیات بنیاد د روژې د مرستو په لړ کې د بلخ ولایت لسګونه اړمنو کورنیو ته خوراکي توکي ووېشل.

د بیات بنیاد د روژې د مرستو په لړ کې دا ځل د بلخ ولایت لسګونه اړمنې کورنۍ تر پوښښ لاندې راغلې. په بلخ ولایت کې د بیات بنیاد استازی یافث ثاقب وایي؛ په دې مرسته کې اوړه، غوړي او وريجې شته، چې پر اړمنو کسانو وېشل شوې دي.

نوموړي زیاته کړې؛ د هېواد په بېلابېلو سیمو کې د بیات بنیاد د روژې د مرستو لړۍ روانه ده.

هغو کورنیو، چې دغه مرستې ترلاسه کړې د دې بنسټ له مرستو خوښ دي او له نورو مرستندویه بنسټونو هم غواړي، چې له اړو کسانو سره مرستې وکړي.

بیات بنیاد یو له هغو خیریه بنسټونو څخه دی، چې په تېرو ۲۰ کلونو کې یې پر اړمنو کورنیو د مرستو د وېش ترڅنګ یې د هېواد په بېلابېلو برخو کې رغنیزې پروژې هم پلې کړې دي.

Continue Reading

Trending

Copyright © 2022 Ariana News. All rights reserved!