افغانستان له سیمې او نړۍ سره پر مثبت سیاسي تعامل ټینګار څرګند کړ

 نن سې شنبه د زمري ۴ له یو ورځني ځنډ وروسته د ازبکستان په پلازمېنه تاشکند کې د افغانستان د سیاسي، امنیتي، اقتصادي او بشري وضعیت د ارزونې نړیواله غونډه پیل شوه.

د تاشکند پر کوربتوب د افغانستان په اړه په دې سیاسي، امنیتي او اقتصادي غونډه کې د افغان حکومت د بهرنیو چارو وزارت د چارسمبالي امیرخان متقي پر مشرۍ د پلاوي او پر روسیې، چین، ایران، پاکستان او هند سربېره د څه باندې ۲۰ هېوادونو او نړیوالو ټولنو استازیو ګډون کړی دی.

د افغانستان لپاره د امریکا د بهرنیو چارو وزارت ځانګړی استازی توماس ویست، د ښځو او بشری حقونو لپاره د امریکا ځانګړې استازې رینا امیري، د امریکا د خزانې وزارت مرستیال، د افغانستان لپاره د ملګرو ملتونو د دفتر سرپرست هم دې غونډې ته ورغلي دي.

د افغان حکومت د بهرنیو چارو وزارت چارسمبالي امیر خان متقي د افغانستان د ۱۱ میاشتني حکومت کړنې مهمې وبللې او د سیمې او نړۍ له هېوادونو سره یې پر مثبت سیاسي تعامل ټینګار وکړ.

نوموړي دغې نړیوالې ناستې ته د وینا پر مهال ویلي؛ اسلامي امارت په سیاسي اصلاحاتو باور لري او په ټولو برخو کې اصلاحاتو ته ژمن دی.

امیرخان متقي زیاته کړې؛ اسلامي امارت د اقتصادي او سوداګریزو همکاریو او د پانګونې پر جلبولو او له سیمې او نړۍ سره په دې برخه کې د متوازن چلند په لټه کې دی.

د متقي په وینا حکومت یې د ټولو افغانانو په ځانګړې توګه د ښځو حقونو ته درناوي کوي او د پخواني حکومت لسګونه لوړ پوړي چارواکي هم هېواد ته راستانه کړي دي.

د بهرنیو چارو وزارت چارسمبالي څرګنده کړې؛ اسلامي امارت به اجازه ورنکړي، چې د افغانستان له خاورې څخه د ګاونډ هېوادونو امنیت له ګواښ سره مخ شي.

امیر خان متقي له بهرني مالي ملاتړ پرته د ۱۰۰ زره اردو او ۱۴۰ زره پولیسو جوړول، په دولتي ادارو کې د فساد صفر کول، د اقتصادي او بانکي بحرانونو مدیریت او همدارنګه د کجکي د برښنا بند په ګډون د یو شمېر لویو پروژو پیل د نوي حکومت د یوولس میاشتو د کار کړنو اړینې چارې یادې کړې.

ویل کیږي، چې د افغانستان په اړه دغه امنیتي او اقتصادي کنفرانس د هر اړخیزو ژمنو پلي کولو ته هیله من شوي دي.