سوداگري
افغانستان ته د ایران غیرنفتي صادرات ۳۱ سلنه ډېر شول
د ایران سفارت د سوداګرۍ اتشې د څرګندونو له مخې؛ د تېر کال د همدې مودې پر پرتله د صادراتو دغه کچه ۳۱ سلنه زیاته شوې ده.
په افغانستان کې د ایران سفارت د سوداګرۍ اتشې ويلي، د لمریز لېږدیز کال په لومړیو ۶ میاشتو کې دې هېواد ته د ایران غیرنفتي صادرات د ۲۵۴ میلیون ډالرو پر زیاتېدو ۱ میلیارډ او ۷۰ میلیون ډالرو ته رسېدلي دي.
د ایران سفارت د سوداګرۍ اتشې د څرګندونو له مخې؛ د تېر کال د همدې مودې پر پرتله د صادراتو دغه کچه ۳۱ سلنه زیاته شوې ده.
ایلنا خبري سرچینې راپور ورکړی، چې په دې موده کې د اوسپنې، فولادو، سمنټو، هګیو او کچالو په ګډون شاوخوا ۵۶۰ زره ټنه ایراني توکي افغانستان ته صادر شوي دي.
د ایران د سوداګرۍ د پراختیا ادارې مشر حسین روستایي په یوه مرکه کې ویلي، چې افغانستان ته د ایران د غیر نفتي صادراتو ارزښت ۲۵۴ میلیون ډالره او او وزن ۵۵۹ زره ټنه ډېر شوی دی. د ټولو صادراتو وزن ۲ میلیون او ۵۲۳ زره ټنو ته رسېدلی، چې د تېر کال پر پرتله یې ۲۸ سلنه وده کړې ده.
د نوموړي د څرګندونو له مخې؛ له افغانستان څخه د ايران د وارداتو ارزښت هم څه باندې ٣٣ ميليون ډالرو ته رسېدلى، چې ١٩٢ سلنه زياتوالى يې موندلى او پر ټولیزه توګه په وارداتي توکو کې وربشي، جوار، ممپلي او مرچ راغلي دي.
