د افغانستان او بنګله‌دېش کرکټ ملي لوبډلې نن ( دوشنبه د لړم یوویشتمه / د نومبر یوولسمه ) د درې یو ورځنیو سیالیو د لوبلړ وروستۍ لوبه کوي.

د افغانستان کرکټ بورډ ويلي، چې، دغه سیالي به د کابل پر وخت ماسپښین ۲:۳۰ د عربي متحده اماراتو د شارجې په لوبغالي کې پیل شي.

دواړو لوبډلو یوه - یوه سیالي ګټلې او مساوي روان دي.

د درې یو ورځني لوبلړ په لومړۍ لوبه کې افغانستان د ۹۲ منډو پر توپیر او بنګله‌دېش په دوه‌یمه لوبه کې د ۶۸ منډو پر توپیر لوبې ګټلې دي او نن به د لوبلړ ګټونکې لوبډله معلومه شي.

ټاکل شوې، چې له دې لوبلړ وروسته به افغانستان د نورو لوبلړیو د لوبېدا لپاره زمبابوې ته سفر وکړي.

د افغانستان کرکټ ملي لوبډلې په دوه‌یمه یوه ورځنۍ لوبه کې د بنګله دېش پر وړاندې د ۶۸ منډو پر ټوپیر ماتې وخوړه.

دا لوبه د شنبې پر ورځ ( د لړم  نولسمه) د متحده عربي اماراتو په شارجه ښار کې د افغانستان پر کوربتوب ترسره شوې ده.

د دغه لوبلړ لومړۍ لوبه افغانستان ګټلې او اوس دواړه لوبډلې ۱-۱ مساوي دي.

د دواړو لوبډلو ترمنځ درېیمه لوبه به دوه ورځې وروسته د متحده عربي اماراتو په شارجه لوبغالي کې ترسره شي.

په پرونۍ لوبه کې (شنبه د لړم نولسمه) بنګله دېش پچه وګټله او لومړی یې د توپ‌وهنې پرېکړه وکړه. دغې لوبډلې په ټاکلو پنځوس اورونو کې د اووه لوبغاړو پر سوځېدو ۲۵۲ منډې جوړې کړې.

د بنګله دېش لپاره د دې لوبډلې لوبډلمشر نجم‌الحسین شانټو وکړې تر ټولو زیاتې ۷۶ منډې وکړې.

د افغانستان په توپ‌اچوونکیو کې ننګیالی خروټی د خپلو ملګرو پر پرتله ښه وځلید او درې ویکټې یې واخیستې.

په دوه‌یمه پاڼۍ کې د افغانستان لوبډلې توپ‌وهنه وکړه او هیڅ یو لوبغاړی ونه توانید، چې پر ویکټو اخیستو راوڅرخیږي.

د افغانستان له لوري رحمان الله ګربز یوازې دوه منډې وکړې او ژر له لوبې ویستل شو.

یوازې رحمت شاه زرمتي د ۵۲ منډو پر جوړولو تر نورو ښه و او نور لوبغاړي په دې لوبه کې ښه نه‌ول.

افغانستان په ۴۳.۳ اورونو کې خپل ټول لوبغاړي له لاسه ورکړل او یوازې ۱۸۴ منډې یې جوړې کړې.

ټاکل شوې دواړه لوبډلې د دوشنبې پر ورځ (د لړم یوویشتمه) د درې، پنځوس اوریزو لوبو په وروستۍ لوبه کې له یو بل سره مخ شي. د دې لوبې ګټونکې لوبډله به د لوبلړ ګټونکې وي.

افغانستان د چارشنبې پر ورځ ( د لړم شپاړلسمه ) په شارجه کې د محمد نبي پر ۷۹ توپونو د ۸۴ منډو او د الله محمد غضنفر د ۶ ویکټو پر ملتیا د درې یو ورځنیو لوبو د لړۍ په لومړۍ لوبه کې بنګله دېش ته د ۹۲ منډو پر توپیر ماتې ورکړه.

افغان لوبډلې لومړی توپ وهنه وکړه او په وروستي اوور کې یې خپل ټول لوبغاړي له لاسه ورکړل؛ خو ۲۳۵ منډې یې جوړې کړې.

بنګله دېش د ۲۳۶ منډو هدف د څارلو په بهیر کې پر ۱۴۳ منډو وسوځېد او خپل وروستي اته لوبغاړي یې پر ۲۳ منډو له لاسه ورکړل.

افغانستان د ۵ لوبغاړو پر سوځېدو ۷۱ منډې کړې وې، چې لوبډلمشر حشمت الله شهیدي ۵۲ منډې وکړې او نبي په ۴۹.۴ اورونو کې ۲۳۵ منډې جوړې کړې.

بنګله دېش د هدف د ترلاسه کولو لپاره ښه وځلېد او د دوه لوبغاړو پر سوځېدو يې ۱۲۰ منډې جوړې کړې؛ خو د محمد نبي له ښې ملګرتيا وروسته يې توپ‌وهنه له ستونزو سره مخ شوه.

له دې لوبې سره شارجه په نړۍ کې لومړنی ځای شو، چې د ۳۰۰ یو ورځنیو لوبو کوربتوب کوي.

د دغو دواړو لوبډلو ترمنځ به بله لوبه د راتلونکې شنبې پر ورځ ترسره شي.

(Reuters)