د ا.ا مرستیال مولوي عبدالسلام حنفي د یکشنبې پر ورځ په کابل کې د افغانستان لپاره د ملګرو ملتونو د سرمنشي له ځانګړې استازې دیبرا لاینز سره پر روان وضعیت، کرنې، بانکدارۍ او نړیوال ملاتړ بحث او خبرې وکړې.

د یکشنبې پر ورځ د یوناما مشرې د یوه پلاوي پر مشرۍ د بهرنیو چارو وزارت له چارسمبالي سره په کتنه کې د افغانستان د اقتصادي وضعیت، بانکدارۍ او خصوصي سکتور د پراختیا او مرستو په ګډون پر یو شمېر اړینو مسایلو بحث او خبرې وکړې.

د بهرنیو چارو وزارت په ډاګه کړې؛ دیبرا لاینز الماتا ته د خپل سفر په اړه مولوي متقي خپل راپور ورکړ.

دیبرا لاینز ویلي؛ یوناما او امریکا نه غواړي، چې د افغانستان د بانکدارۍ سکټور نور هم کمزوری شي.

هغې ډاډ څرګند کړ، چې مهم مسایل به د خبرو اترو له لارې حل شي.

د یوناما د بورد غړي اتول ګوفتا هم ویلي، چې له بېلابېلو مرستندویه بنسټونو سره په افغانستان کې د اقتصاد او خصوصي سکټور پر وده خبرې روانې دي.

د بهرنیو چارو وزارت چارسمبالي میرمن لینز او ورسره مل پلاوي ته په ډاګه کړه؛ نوی حکومت له ټولو هغو بنسټونو سره کار کولو ته ژمن دی،  چې د افغانستان د پرمختګ لپاره هڅې کوي.

دا په داسې حال کې ده، چې ملګرو ملتونو له افغانستان سره د درې میلیارد ډالرو مرستې غوښتنه کړې او څرګندوي؛ دغه پیسې میلیونونه افغانانو ته، چې سختو مرستو ته اړتیا لري اړینې دي او باید تر راتلونکي ژمي پورې دغه سازمان ته ورکړ شي.

د پاکستان لومړی وزیر له CNN سره په ځانګړې مرکه کې ټینګار کړی، چې پر اسلامي امارت د نړۍ او امریکا د بندیزونو او نړیوال فشارونه زیاتول به مثبت اغېز ونلري؛ باید همکاري وشي.

په کابل کې د بیا واکمنېدو شپږ میاشتې وروسته هم اسلامي امارت د مشروعیت له بحران سره مخ دی او هیڅ هېواد د افغانستان نوی حکومت پر رسمیت ندی پېژندلی.

د پاکستان لومړي وزیر په دې وروستیو کې له CNN سره په ځانګړې مرکه کې ویلي، چې نړۍ باید ژر یا وروسته د افغانستان نوی حکومت پر رسمیت وپېژني.

د پاکستان لومړی وزیر عمران خان وایي: آیا که امریکا پر طالبانو فشار راوړي؛ په افغانستان کې به وضعیت ښه شي؟ نه! هیڅکله هم نه! یوازنی بدیل، چې مونږ لرو له دوی سره کار کول دي او دوی ته دې وویل شي، چې نړۍ له دوی څخه څه غواړي. لکه بشري حقونه په ځانګړې توګه د ښځو حقونه. زما په اند دا یوازنۍ لار ده، چې مونږ یې کارولی شو.

عمران خان په دې خبرو کې ټینګار کړی، چې پر اسلامي امارت د فشارونو او بندیزونو زیاتوالی به مثبته پایله ونلري او امریکا باید د دغو فشارونو د دوام پر ځای له اسلامي امارت سره په اړیکه کې شي او همکاري وکړي.

د پاکستان صدراعظم همداراز په افغانستان کې د پاکستان د مخالفو ډلو د شتوالي په اړه اندېښنه څرګنده کړې او څرګندوي، چې ښايي ځینې دغه ډلې د کډوالو په جامه کې پاکستان ته ننوځي.

عمران خان په ډاګه کړې؛ مونږ اوس هم په خپله خاوره کې درې میلیون افغانان لرو. په افغانستان کې هم درې ترهګرې ډلې له افغانستان څخه په پاکستان کې هڅې کوي. ډېري هغه افغانان، چې اوس پاکستان ته راځي په هغو کې افغان طالبان، بلوڅ طالبان او داعشیان هم د رادننه کېدو په هڅه کې دي.

د اسلامي امارت د ویاند مرستیال بلال کریمي نه یوازې له افغان خاورې څخه د تروریستي ګواښونو په اړه د پاکستان اندېښنې ردوي، بلکې په افغان خاوره کې ترهګرو ډلو ته د فعالیتونو اجازه هم نه ورکوي.

نوموړی ډاډ ورکوي، چې د افغانستان خاوره د هېڅ هېواد په ځانګړي توګه ګاونډ هېوادونو ته ګواښ نه ده.

اسلامي امارت پاکستاني لوري ته ډاډ ورکړی، چې د افغانستان له خاورې به یې هېواد ته ګواښ نه پېښیږي او له اسلام آباد یې هم غوښتي، چې ورته پالیسي غوره کړي.

د یادونې ده، چې څو ورځې وړاندې د پاکستان د ملي امنیت سلاکار کابل ته په سفر کې له افغانستان څخه پاکستان ته د ورپېښو امنیتي ګواښونو په اړه د خپل هېواد اندېښنې د اسلامي امارت له چارواکو سره شریکې کړې وې.

خلیلزاد د تېره ورځ ناوخته څرګنده کړې، چې د افغانانو خپلمنځي خبرې باید ژر تر ژره باید پیل شي او د دغو خبرو د پېل د نوې نېتې د ټاکلو په اړه بحثونه روان دي.

د افغانستان سولې لپاره د امریکا ځانګړي استازي، زلمي خلیلزاد د جمعې پر ورځ په یو خبري کنفرانس کې، چې د ویډیو له لارې خپریدلو، په ډاګه کړه، چې  د افغانانو خپلمنځي خبرې د افغانستان د ستونزو د اواریدا یوازنۍ لار ده او زیاتوي، چې په نوې نېټې ټاکلو خبرې اترې کیږي.

هغه ویلي: که څه هم وروستي تاوتریخوالي د سولې بهیر په لاره کې خڼډ رامنځته کړی؛ خو سولې ته رسیدل آسانه کار ندی او ننګونې هم شته دي، چې له دې پرته دغې موخې ته د رسیدو لپاره بله لار هم نشته.

خلیلزاد زیاته کړې، چې په افغانستان کې د روانې جګړې د پای ته رسولو لپاره هیڅ پوځي حل لاره نشته او ټولې خواوې له جګړې ستړي شوي او غواړي جګړه پای ته ورسیږي. ان د امریکا او طالبانو ترمنځ تړون د دې لپاره ښه فرصت برابر کړی دی.

د هغه په وینا؛ ښکاره خبره ده، چې په افغانستان کې یو شمېر دلې سوله د ځان په ګټه نه بولي او د تاوتریخوالي د زیاتولو هڅې کوي او د سولې پروسه تخریبوي؛ نو، ځکه دواړه خواوې باید راویښې شي او د متخاصمو کړیو لومې ته ونه غورزیږي.

د یادونې وړ ده، چې امریکا د فبرورۍ پر ۲۹ له طالبانو سره افغانستان ته د سولې راوستلو هوکړه لاسلیک کړه.

د یادې هوکړې له مخې؛ ټاکل شوې وه، چې د مارچ پر ۱۰ به د سولې لپاره د افغانانو خپلمنځي خبرې پیل کېږي.

له بده مرغه داسې ونشول؛ ځینې ننګونې، لکه د بندیانو نه خلاصون او د تاوتریخوالي نه راکمول د دې لامل شو، چې د افغانانو د خپلمنځي خبرو اترو پیل وځندول شي.