د اسلامي امارت د رهبر د ۵ سوه نولسمې ګڼې حکم له مخې؛ د چارسمبالي حکومت ټول مسوولان، مجاهدین، منسوبین او عام هېوادوال اړ دي، چې د کورنیو چارو وزارت له اجازې پرته د سپکو او درندو وسلو او مهماتو له ساتنې او لېږد - رالېږد څخه ډډه وکړي.

کورنیو چارو وزارت په یوه خپره شوې خبرپاڼه کې لیکلي؛ د ټولو سپکو او درندو وسلو د ګرځولو لپاره پخواني جوازونه، استعلامونه، مکتوبونه او خطونه لغو اعلان شوي او د باور وړ ندي.

کورنیو چارو وزارت وایي؛ نوي جوازونه د جرمونو د کشف او پر وړاندې یې د مبارزې ریاست د ډایاک مدیریت لخوا وېشل کیږي.

یاد وزارت ویلي؛ د اسلامي امارت د رهبر د ۱۲۵۹ ګڼې حکم له مخې: د موټرو د تورو ښېښو او پردو لپاره هم جوازونه د همدې مدیریت لخوا ویشل کیږي او له جواز پرته حکومتي او ملکي وګړي د تورو ښېښو او پردو لرونکیو موټرو د ګرځولو اجازه نلري.

ویل کیږي، چې ټولو ملکي ادارو، ملي سوداګرو، صرافانو او عامو هېوادوالو د وسایطو پر ښېښو د تورو پردو د لګولو لپاره دې قانوني جوازونه د کورنیو چارو وزارت له ډایاک مدیریت څخه ترلاسه کړي.

د یادونې ده، چې د ملي دفاع وزارت او د استخباراتو لوی ریاست برحاله منسوبین، چې د اسلامي امارت د پورته یاد شویو ګڼو حکمونو له مخې پر شرایطو برابر وي؛ د خپلو ادارو له لورې ورته جوازونه چاپ او وېشل کيږي.

د افغانستان د کانونو او پټروليم وزارت پلاوي چین ته په خپل سفر کې د کانونو د همکاریو د پياوړتيا په کنفرانس کې ګډون کړی او د کرنې اوبو لګولو او مالدارۍ وزارت پلاوي له چینايي چارواکو سره د بې‌ وزلۍ د کمولو او د کرنې د ودې او پراختیا په اړه خبرې کوي.

د راپورونو له مخې؛ په دې کنفرانس کې به د دواړو هېوادونو ترمنځ د تخنیکي همکاریو پر پراختیا خبرې وشي.

د انرژۍ او اوبو وزارت چارسمبالي عبداللطیف منصور، چې د انرژۍ په کنفرانس کې د ګډون لپاره بیجینګ ته تللی و وايي؛ په دې سفر کې یې اړینې لاسته راوړنې لرلي او چینايي لوري ژمنه کړې، چې په افغانستان کې به د انرژۍ پر تولید پانګونه وکړي.

د کرنې، اوبولګولو او مالدارۍ وزارت مرستیال هم د بې‌وزلۍ د کمولو او د کرنې د پراختیا په غونډه کې د افغانستان د لیدلوري د څرګندولو لپاره چین ته سفر کړی دي.

همدا راز به د دې وزارت چارسمبالی صدراعطم عثماني له چینايي چارواکو سره د افغانستان د کرنې په برخه کې د پانګونې پر فرصتونو خبرې وکړي.

چین تر بل هر هېواد ډېر د اسلامي امارت پر لوري د دوه اړخیزو همکاریو لاسونه غځولي او په بېلا بېلو ناستو کې د اسلامي امارت د چارواکو ګډون د دې ښودنه کوي، چې دې همکارۍ عملي اړخ موندلی دی.

اوسمهال چینایي کمپنۍ په افغانستان کې د لویو کانونو د استخراج قراردادونه لري. لکه د قشغري له څاګانو څخه د تېلو استخراج او د لوګر ولایت د مس عینک کان اسخراج.

که څه هم د کارپوهانو پر اند د مس عینک د استخراج لپاره یو لړ خندونو وخت ضایع کړی؛ خو په دې اړه لومړني کارونه پیل شوي دي.

د ملګرو ملتونو د ماشومانو وجهي صندوق (یونیسف) ویلي، افغانستان د اوبو له سخت کمښت سره مخ دی او که دې ستونزې ته پاملرنه ونشي؛ تر ۲۰۳۰ ز. کال پورې به د کابل ښار تر ځمکې لاندې اوبه له منځه ولاړې شي.

د ملګرو ملتونو دې ادارې د سې‌شنبې پر ورځ ( د لړم اتمه) د ایکس په یوه څرګندونه کې لیکلي، چې د ملګرو ملتونو د مرستندویه پلاوي (یوناما) د دفتر مشرې روزا اوتنبایوا او د یونیسف مشرې تاج الدین اویواله د کابل ښار په یوه سیمه کې د اوبو رسولو شبکې څخه لیدنه وکړه او په دغه ښار کې یې د اوبو د کمښت له رامنځته کیدو خبرداری ورکړ.

یونیسف ویلي: اوبه ژوند دی. د چټکې ښاري کېدا او د اقلیمي بدلون له کبله به تر ۲۰۳۰ کال پورې کابل د ځمکې لاندې اوبه له منځه ولاړې شي. که مونږ اوس عمل ونکړو، بیا نشو کولی دا بهیر ودروو.

په کابل ښار کې د نفوسو چټکه وده، د غیر پلان شویو او غیر معیاري لوړ پوړو ودانیو جوړول، د ښاري ډیزاین چوکاټ ته له پام پرته د ښار پراختیا او د کابل ښار په ځینو برخو کې د ښاریانو لخوا د ځمکې لاندې اوبو له سرچینو څخه زیاته ګټه اخیستل په دې ښار کې د کابل د ځمکې لاندې اوبو د کمیت او کیفیت د له منځه وړلو لاملونه دي.

په کابل کې د اوبو د کمښت ستونزه له ډېرې مودې راپدېخوا شته؛ خو په وروستیو کلونو کې دا ستونزه پراخه شوې ده.

دا په داسې حال کې ده، چې له دې مخکې د انرژۍ او اوبو وزارت ویلي وه، چې په کابل کې د اوبو د کمښت د ستونزې د اواري لپاره د پنجشېر له سیند څخه پلازمېنې کابل ته د اوبو د لېږدولو پر پروژې کار روان دی.