د روسیې ولسمشر ولادیمیر پوتین هغه قانون لاسلیک کړ، چې له مخې به یې د روسیې قضايي ارګانونه اجازه ولري د افغانستان اسلامي امارت نوم له تور نوملړ څخه لرې کړي.

د انټرفاکس خبري سرچینې د راپور له مخې؛ د پارلمان د نړیوالو چارو کمیټې او د روسیې د لیبرال ډیموکراټ ګوند مشر لیونید سلوتسکي له دې مخکې ویلي وه: دا قوانین د نورو اړیکو تر څنګ د دې لپاره ، چې د افغانستان له اسلامي امارت سره د روسیې قانوني تعامل رامنځته شي؛ جوړ شوی دی.

روسيې په تدريجي بڼه له اسلامي امارت سره خپلې اړيکې هغه مهال ټينګې کړې، چې ولاديمير پوتين د جولای په مياشت کې له ترهګرۍ سره په جګړه کې د مسکو متحد یاد کړ.

د روسيې د پارلمان د نړیوالو اړيکو کمېټې د اوکټوبر پر شلمه د دغه قانون مسوده تصويب کړه او د دې هېواد پارلمان د اکتوبر پر اووه‌ویشتمه دغه قانون تصويب کړ.

د دغه قانون مسوده د اوکټوبر پر پېنځمه کابل ته د روسیې د ملي امنیت شورا د سکرتر سرګي شویګو له سفر یوه ورځ وروسته د روسیې د پارلمان اړوند استازو لخوا پارلمان ته وړاندې شوه، چې له مخې به یې د اسلامي امارت نوم له تور نوملړ څخه وایستل شي.

د روسيې بهرنيو چارو وزارت وياندې ویلي؛ دا هېواد د افغانستان او پاکستان پر پوله د شخړو د زياتوالي په اړه اندېښمن دى او له دواړو خواوو يې غوښتي، چې زغم وښيي او په رغنده خبرو کې برخه واخلي.

د ماریا زخارووا په خبربانه کې راغلي، چې مسکو د پاکستان او افغانستان تر منځ په پوله کې د کړکیچ د زیاتېدو په اړه اندېښمن دی؛ ځکه، چې په دغو شخړو کې نه یوازې پوځیان، بلکې ملکي وګړي هم وژل شوي دي.

هغې زیاته کړې: "مونږ د جګړې له ښکېلو خواوو غواړو، چې خپل زغم وښيي او په سوله‌ییزه توګه د ټولو شخړو د حل لپاره په رغنده خبرو کې برخه واخلي."

د افغانستان ملي دفاع وزارت ويلي، د ډیورنډ فرضي کرښې له هغې غاړې یې د «شریرو عناصرو او د هغوی د ملاتړو پر مرکزونو او پټنځایونو» بریدونه کړي دي.

د دغه وزارت په خبرپاڼه کې راغلي: "د هېواد په سویل ختیځ کې د دوامدارې جګړې د غچ اخیستو لپاره مو د شریرو عناصرو او د هغوی د ملاتړو مرکزونه او پټنځایونه، چې له هغه ځایه په افغانستان کې بریدونه پلانېدل او تنظیم شوي وه؛ بریدونه کړي دي."

د راپورونو له مخې، د ډيورنډ کرښې له هغې غاړې د خوست ولايت له عليشېرو ولسوالۍ او د پکتيا ولايت له ډنډ پټان ولسوالۍ څخه تېره شپه انتقامي بريدونه پيل شوي او تر سهاره يې دوام درلود.

د سرچينې د معلوماتو له مخې، په دغو جګړو کې سپکې او درندې وسلې کارول شوې دي.

تېره ورځ د پکتيکا په برمل ولسوالۍ کې پاکستانيو ځواکونو هوايي بريدونه وکړل، چې په پايله کې يې لسګونه کسان مړه او ټپيان شول.

ملي دفاع وزارت خبرداری ورکړی، چې دا بریدونه به بې ځوابه پاتې نشي.

په پکتیکا کې د پاکستان په هوايي بریدونو کې یو شمېر ټپیان له نړیوالې ټولنې غواړي، چې د پاکستان د "بې عدالتۍ"  او ظلم مخه ونیسي.

د پکتيکا ولايت په برمل ولسوالۍ کې د پاکستان د هوايي بريدونو له کبله د ماشومانو، لويانو او میرمنو  په ګډون يو شمېر ټپيان کابل ته لېږدول شوي دي.

هر ټپي د برید دردوونکې کیسې لري او وايي پاکستانيو الوتکو هغه سیمې پر نښه کړې، چې کډوال په کې شپې سبا کوي.

دوی وايي؛ د پاکستان پوځ له کډوالو سره غیر انساني چلند کوي؛ ماشومان او ښځې پر نښه کوي.

له آریانا نیوز سره داسې ټپیانو هم خبرې کړي، چې د پاکستان په هوايي بریدونو کې یې د خپلو کورنیو ډېر غړي له لاسه ورکړي دي.

په هغو ټپیانو کې، چې کابل ته راوړل شوي دي؛ داسې ټپیان هم په کې ديؤ چې د خپلې کورنۍ ټول غړي یې له لاسه ورکړي دي.

په پکتیکا کې د پاکستان د هوايي برید له کبله ټپي شوی یحیی نومی ماشوم د خپلې کورنۍ د ټولو غړیو د له لاسه ورکولو په غم کې ژاړي.

له دې بریدونو څخه ان دوه میاشتنی ماشوم هم ندی خلاص شوی، دغه ماشوم اوس د خپلې مور د ګرمې غېږې پر ځای د کابل په یوه روغتون کې بستر دی.

د هوایي برید ټپیان وايي، چې د پاکستاني پوځ د بريدونو له وېرې له وزيرستانه افغانستان ته را کډه شول؛ خو دلته پرې هم بريدونه کیږي.

په پکتیکا کې د پاکستان د هوايي برید یو بل ټپي سهیل نومي ویلي؛ له همدې کبله له نړیوالې ټولنې غواړي، چې د پاکستان د «بې عدالتۍ»  او ظلم مخه ونیسي.

د کارپوهانو د څرګندونو له مخې؛ د پاکستان پوځ، چې د نړیوالو قوانینو خلاف په ګاونډ هېوادونو کې خپل وګړي پر نښه کوي؛ غواړي، چې کابل له اسلام‌آباد سره د کړکېچ نوي پړاو ته وردننه شي. هغه تاوتریخوالی، چې کیدی شي د سرحدي نښتو او د پاکستان پر خاوره د بریدونو د زیاتوالي لامل شي.

ویل کیږي، چې پاکستان پخپله غواړي د خپل پوځ او ټي ټي پي تر منځ جګړې ته زور ورکړي.