تازه خبرونه
اسلامي هېوادونه دې د اسلامي امارت په رسمیت پېژندنه کې لومړنی ګام پورته کړي
اسلامي امارت له اسلامي هېوادونو غواړي، چې له امارت سره مثبت سیاسي او اقتصادي تعامل رامنځته او افغان حکومت پر رسمیت وپېژني.
په دې وروستیو کې د اسلامي همکاریو ټولنې عمومي منشي مسکو ته تللی او هلته یې د نورو مسایلو ترڅنګ د افغانستان پر روان وضعیت هم خبرې کړې دي.
د اسلامي همکاریو ټولنه، چې په ۲۰۲۱ ز. کال کې یې د افغانستان پ حالاتو دوه غونډې کړې وې؛ ژمنه کړې، چې یو بشري صندوق به جوړوي او افغانان به یوازې نه پریږدي.
اسلامي امارت د بشري مرستو پر صندق جوړولو سربېره له اسلامي همکاریو ټولنې څخه ځينې اړینې غوښتنې لري او غواړي، چې د امارت په رسميت پېژندلو کې لومړنی ګام واخلي.
په افغانستان کې بشري وضعیت، اقتصادي بحران، له ترهګرۍ سره مبارزه او د ټولګډونه حکومت رامنځته هغه غوښتنې دي، چې د اسلامي همکاریو ټولنې عمومي منشي روسیې ته د خپل سفر په لړ کې یو ځل بیا د افغانستان اسلامي امارت ته ترې یادونه وکړه.
قطر هم د افغانستان په اړه له نړیوالې ټولنې سره ګډې اندېښنې لري.
د دغه هېواد د بهرنیو چارو وزیر محمد بن عبدالرحمن آل ثاني ویلي، چې دوحه د افغانستان په اړه پخپل دریځ ولاړه ده او سیاست کې یې بدلون ندی راغلی.
دا په داسې حال کې ده، چې اسلامي امارت حاکم حکومت ټولګډونه ګڼي؛ خو د اصلاحاتو د عملي کولو ژمنه هم کوي او څرګندوي، چې هیڅ ډلې ته به اجازه ورنکړي، چې د ګاونډ او سیمې د هېوادونو امنیت له ګواښ سره مخ کړي.
