تازه خبرونه
اسلامي امارت د نړۍ له ټولو دولتونو سره د دوه اړخیزو اړیکو پراختیا غواړي
د ریاست الوزرا اداري مرستیال عبدالسلام حنفي د ترکیې له سفیر جهاد ارګینای سره په کتنه کې څرګنده کړې، چې اسلامي امارت د نړۍ له ټولو دولتونو سره د دوه اړخیزو اړیکو او همکاریو پراختیا غواړي.
د حنفي له دفتره په خپره شوې خبرپاڼه کې ویل شوي، چې د ترکیې حکومت د اسلامي امارت او نړیوالې ټولنې ترمنځ د اړیکو د پراختیا لپاره جدي هڅې کوي.
هغه زیاته کړې، د هغه هېواد سوداګر او پانګوال جدي هیله لري، چې په افغانستان کې د صنعت او سوداګرۍ په برخو په ځانګړې توګه د کانونو په برخه کې پانګونه وکړي.
د ترکیې سفیر جهاد ارګینای ویلي، چې د ترکیې حکومت او خلک به د فبرورۍ د میاشتې د زلزلې له کبله له رامنځته شویو ستونزو سره سره د افغانستان خلکو ته مرستې روانې وساتي.
هغه ویلي؛ د هېواد سوداګر او پانګوال یې د افغانستان د صنعت، سوداګرۍ او کانونو په برخو کې پانګونې ته لیواله دي.
عبدالسلام حنفي زیاته کړې، چې د افغانستان اسلامي امارت له ټولو دولتونو سره د اړیکو پراختیا غواړي او د اړیکو له پراختیا هرکلي کوي.
د نوموړي د څرګندونو له مخې؛ په هېواد کې د هر ډول پانګونې لپاره زمینه برابره شوې او اسلامي امارت په افغانستان کې د بهرنیو پانګو په ځانګړي ډول له ترکي سوداګرو او پانګوالو ملاتړ کوي.
