د رویټرز خبري سرچینې د راپورونو له مخې؛ په نیپال کې د سختو بارانونو، سېلابونو او ځمکې ښویېدو له کبله لږ تر لږه ۱۰۲ کسان مړه شوي دي.

د نیپال ختیځې او مرکزي سیمې د جمعې له ورځې راپدېخوا بارانونو او سیلابونو اغېزمنې کړې دي.

د نیپال د امنیتي ځواکونو په څرګندونو کې راغلي؛ په دې پېښه کې ۶۴ کسان ورک دي او ۴۵ نور ټپیان شوي دي.

د کټمانډو دره له ۴۸ قربانیانو سره د ځاني زیان ترټولو لوړه کچه لري. دغه راز لږ تر لږه ۱۹۵ کورونه او ۸ پلونه هم ویجاړ شوي دي. د مرستې او ژغورنې ډلو شاوخوا ۳۱۰۰ کسان ژغورلي دي.

عيني شاهدانو ويلي، چې له تېرو ۴۰ څخه تر ٤٥ کلونو راپدېخوا د کټمانډو دره په سیندونو کې د دومره ويجاړونکيو سيلابونو او اوبو پورته کېدو لیدونکې نه‌وه.

د نیپال د هوا پېژندنې ادارې ویلي، چې د شنبې تر سهاره په ۲۴ ساعتونو کې لږ تر لږه ۲۴۰ ملي مټره باران شوی، چې د کټمانډو پوسټ ورځپاڼې پر وینا له ۱۹۷۰ راپدېخوا په دې ښار کې دومره باران نه‌دی لیدل شوی.

له ۳ زره ډېر امنیتي ځواکونه له چورلکو او کښتیو سره د قربانیانو د ژغورنې لپاره ګمارل شوي، چې ژوندي پاتې شوي خوندي ځای ته ولېږدوي.

د جمعې پر ورځ د کټمانډو شاوخوا ۱۵۰ الوتنې د خرابې هوا او شرایطو له کبله لغو شوې؛ خو د راپورونو له مخې، د یکشنبې پر ورځ له کټمانډو څخه بهر او دننه الوتنې بیا پیل شوې دي.

 د ملګرو ملتو عمومي منشي د حزب الله د مشر د وژل کیدو په غبرګون کې د سیمې د هر اړخیزې جګړې له دوام خبرداری ورکړ او وایي، چې په لبنان کې د پېښو زیاتېدو په اړه سخت اندېښمن دی.

په هغه برید کې، چې د حزب الله مشر حسن نصرالله ووژل شو؛ د نړوۍ د مشرانو او استازیو بېلابېل غبرګونونه راوپارول.

له دې برید وروسته د ملګرو ملتونو عمومي منشي په ایکس پاڼه کي له هر اړخیزې جګړې خبرداری ورکړ او وایي، چې په بیروت کې د پېښو پر زیاتېدو اندېښمن دی.

انټونیو ګوټرش وایي:  زه په تېرو ۲۴ ساعتونو کې د بیروت د پېښو د زیاتوالي په اړه ژوره اندېښنه لرم. د تاوتریخوالي دا پېر باید اوس ودریږي. ټولې خواوې باید د خندق له څنډې ووځي او د لبنان او سیمې خلک نشي کولی دا "ټوله جګړه" و زغمي."

د ایران مذهبي مشر له ټولو مسلمانانو وغوښتل، چې له خپلو ټولو امکاناتو سره د حزب الله مرستې ته ځانونه چمتو کړي.

هغه د حزب الله مشر حسن نصرالله په سیمه کې د مقاومت بیرغ اوچتوونکی او یو هوښیار سیاسي مشر وباله او خبرداری یې ورکړ، چې وینه به یې پر ځمکه پرې نه‌ږدي.

د یادولو وړ ده چې د ایران د انقلابي ګارډ د قول اردو عملیاتي مرستیال عباس نیلفروشان هم د بیروت په جنوب کې د اسرائیلو د برید یو له قربانیانو څخه دی.

له بلې خوا د ایران د بهرنیو چارو وزیر عباس عراقچی هم په سیمه کې د پراخې جګړې د خطر په اړه خبرداری ورکړ او ټینګار یې کړی، چې ایران هر ډول سناریو ته چمتو دی.

د ترکیې بهرنیو چارو وزیر وايي، حسن نصرالله د لبنان او سیمې لپاره مهم شخصیت و او د هغه ځای نیول به ستونزمن وي.

هاکان فیډان د دغه هېواد له دولتي ټلویزیون سره په مرکه کې ټینګار کړی، چې اسرائیل به د نصرالله له وژل کیدو وروسته پر لبنان د برید مخه ونه نیسي.

هاکان فیدان وایي:  اوس مونږ ګورو، چې اسرائیلو په غزه کې خپلو موخو ته له رسیدو وروسته خپل تمرکز لبنان ته اړولی دی. راتلونکی هدف به یې څه وي؟ موږ د دې په اړه ځینې وړاندویېنې لرو؛ خو راځئ، چې د اوس لپاره یې ځان ته وساتو. له بده مرغه د لومړي وزیر نتنیاهو په ګډون د اسرائیلو په دننه کې د جګړې د پراخولو لیوالتیا شتون لري.

د روسیې بهرنیو چارو وزیر د حسن نصرالله وژنه سیاسي وژنه ګڼلې؛ خو د امریکا ولسمشر ټینګار کړی، چې اوس د اسرائیل او حزب الله ترمنځ د اوربند لپاره زمینه برابره شوې ده.

د روسیې بهرنیو چارو وزیر سرګی لاوروف ویلي: هغه څه، چې په بیروت کې پېیښ شوي یوه بله سیاسي  وژنه ده او ما اورید لي؛ ولسمشر بایډن فکر کاوه، چې دا سمه پرېکړه وه، نو مونږ د شخړې د اداره کولو څرنګوالي په اړه مختلف نظرونه لرو.

د امریکا ولسمشر جوبایډن د لبنان د حزب الله پر مشر د اسرائیلو برید سمه پرېکړه یاده کړې ده.

له بلې خوا د امریکا دفاع وزیر ويلي، چې په سیمه کې باید د بشپړې جګړې مخه ونیول شي او د ډیپلوماسۍ لار دې ونیول شي.

د امریکا دفاع وزیر لوین آستین وایي:  هغه څه، چې زه غواړم ووایم؛ لکه څنګه، چې تاسې زما څخه څو ځله اورېدلي دي له هر اړخیزې جګړې څخه باید ډډه وشي. ډیپلوماسۍ اوس هم د پرمختللیو ټولنو غوره لار ده او دا د پولې دواړو غاړو ته د بې ځایه شوي اسرائیلي او لبناني وګړو لپاره ترټولو ګړندۍ لار ده.

حسن نصرالله د منځني ختیځ په سیمه کې یو له مشهورو او با نفوذه سیاسي- پوځي شخصیتونو څخه و؛ د لبنان حکومت د هغه له وژل کېدو وروسته درې ورځنی ملي ماتم اعلان کړی دی.

د اسرائیلو لخوا د حزب الله د مشر سید حسن نصرالله له وژل کېدو وروسته په ملګرو ملتونو کې د ایران سفیر امیر سعید ایرواني ۱۵ کسیز پلاوي ته په یوه لیک کې لیکلي؛ ایران د شنبې پر ورځ د ملګرو ملتونو د امنیت شورا د جوړېدو غوښتنه کړې، چې په لبنان او ټوله سیمه د اسرائیلو د هڅو په اړه دې د ملګرو ملتونو امنیت شورا جوړه شي.

هغه زیاته کړې: د ایران اسلامی جمهوریت په خپلو ډیپلوماټیکو ودانیو او استازولیو د هرډول برید پر وړاندې کلک خبرداری ورکوی او څرګندوي، چې ډیپلوماټیکې او قونسلي ودانۍ د مصونیت لرونکې دي او یو ځل بیا ټینګار کوي، چې د دغه ډول حملو تکرار به ونه زغمل شي.

ايرواني ويلي: ايران به د نړيوالو قوانينو له مخې له خپلو حقوقو، ملي او امنيتي ګټو دفاع کوي او په دې اړه له کړنو وېره نلري.

د اسرائیلو پوځ د شنبې پر ورځ ویلي؛ د بیروت په جنوب کې یې د حزب الله پر مشر حسن نصرالله هغه مهال برید وکړ، چې له خپلو لوړپوړیو قومندانانو سره یې لیدلي وه.

دا برید له هغې وروسته وشو، چې لومړي وزیر بنیامین نتنیاهو په نیویارک کې د ملګرو ملتونو سرمشریزې ته ویلي، چې اسرائیل به په خپلو پولو کې د حزب الله ځواکونه ونه مني.

د اسرائیلو د پوځ ویاند ډګروال ناداو شوشاني ویلي، دغه عملیات، چې پوځ یې « د نوی نظم» هغه بولي؛ د جمعې پر ورځ په داسې حال کې ترسره شول، چې نصرالله او د حزب الله جګپوړي قومندانانو د اسرائیلو پر ضد د نورو بریدونو د پلانولو لپاره راټول شوي وه.

هغه خبریالانو ته ویلي: مونږ رښتیني معلومات درلودل، یو ښه عملیاتي فرصت و، چې مونږ ته یې د دې برید اجازه راکړه.

د اسرائیلو پوځي راډیو د هوايي ځواک د قطعې د مشر له قوله، چې برید یې ترسره کړی ویلي، چې پیلوټانو د هدف په اړه معلومات له الوتنې لږ مخکې ترلاسه کړل.

دغه افسر، چې یوازې ډګروال ایم. نومیده ویلي، په هغو ورځو کې، چې برید پلانېده؛ پیلوټان ​​نه پوهېدل، چې هدف څه دی.

مونږ له برید یوازې څو ساعته مخکې خبر کړل او هغوی وپوهیدل، چې دوی د څه لپاره ځي.

شوشاني د دې انګېرنې په اړه له څه ويلو ډډه وکړه، چې ښايي په بريد کې امريکايي دوند مارک ٨٤ بمونه کارول شوي وي؛ خو د هاټزريم د هوايي اډې قومندان بريد جنرال اميچای لوين خبريالانو ته وويل، چې په څو دقيقو کې لسګونه بمونه پر هدف ولګېدل.

شوشاني ویلي، د حزب الله د جنوبي جبهې مشر علي کرکي، چې اسرائیلو یې تېره اوونۍ د وژلو هڅه وکړه؛ هم په دې برید کې ووژل شو.

حزب الله، چې د تېر کال د اوکټوبر پر اوومه د حماس لخوا پر اسرائیلو له برید یوه ورځ وروسته یې بمبتارډ پیل کړ؛ د نصرالله مړینه تائید کړې او څرګندوي، چې د غزې او فلسطین پر ملاتړ او د لبنان په دفاع کې به د اسرائیلو پر وړاندې خپله مبارزه روانه ساتي.

له هغه وخت راپدېخوا دواړو خواوو هره ورځ د توغندیو او راکټونو تبادله کړې، چې د پولې دواړو غاړو ته یې په لسګونه زره خلک کډې ته اړ کړي او پراخه سیمې یې تشې کړې دي.