Connect with us

بی بی سی پښتو

کورونا وېروس پاکستاني جنسي کاروباریانو ته څه ورپېښ کړي؟

Avatar

خپور شوی

 په

(Last Updated On: July 13, 2020)
جنسي کاروباریان

BBC
  • کریم الاسلام
  • بي بي سي اردو ډاټ کام، کراچۍ

خپلمنځي ټولنیز واټن وساته او چا ته مه ورنژدې کېږه. بهر چې وځې، مخ ماسک اچوله او شېبه په شېبه پر لاسونو مېکروب ضد مایع وهه…

د نورو خلکو غوندې د کورونا وېروس له خپرېدو سره د عاشي او شهزادۍ په څېر جنسي کاروباریانو هم دا مشورې په لسګونو ځلې اورېدلې دي. توپير یوازې دا دی چې نور خلک خو به تر خپله وسه پر دغو سپارښتنو د عمل کولو هڅه وکړي، خو دوی يې نشي کولی؛ ځکه چې کار روزګار یې دغسې دی.

په دې رپوټ کې د پاکستان د دوو لویو ښارونو لاهور او کراچۍ د دوو جنسي کاروباریانو کیسه لولئ چې نن سبا یې کار څنګه روان دی. د دوی پېژندګلوي پټه ساتل شوې او پر ځای يې عاشي او شهزادۍ نومونه کارول شوي دي.

موږ له دوی پوښتنه وکړه چې څنګه يې جنسي کاروبار یا د پېسو په بدل کې د جنسي اړیکې ټينګولو ته مخه کړه او کورونا وېروس د دوی ژوند څومره اغېزمن کړی دی؟

د لاهور اوسېدوونکې عاشي کیسه

زه په لاهور کې اوسم. د پيسو په بدل کې مې له خلکو سره د جنسي اړيکو ټيڼګولو کار ته څلور پنځه کاله پخوا رامخه کړه. په اصل کې ما یو چا پورې زړه تړلی و، له هغه وروسته مې دا کار پيل کړ. هغه مې انډيوال و، خو رايې وستلم او په دې کار کې يې بنده کړم.

ما واده کړی و. هره ورځ به مو په کور کې جنګ و، ځکه چې مېړه مې بې روزګاره و او ګټه وټه يې نه وه. بیا مې له یوه هلک سره پر ټیلیفون اړیکه جوړه شوه. یوه ورځ هغه له کوره بهر وروغوښتلم. يو ځای ته يې بوتلم چې له مخکې يې درې څلور نور هلکان هم هلته رابللي وو. راته ویې ویل چې که ټولو سره دغسې وکړې نو پنځه سوه روپۍ به درکړو.

هغه وخت زما وضعیت داسې و چې مجبوره شوم هغسې وکړم. خو وروسته ورو ورو عادت شوم او له ځانه سره مې وویل چې ځه، د پيسو ګټلو یوه لار خو ده.

جنسي کاروباریان

BBC

زما اوه بچیان دي. فکر مې وکړ چې که کور ته یو څه ګټه وټه راوړم نو د اولادونو لپاره به مې په کار شي. زه یوازې د هغوی لپاره دا کار کوم. په ټولو درس وایم. په کور کې مې مېړه هم راسره دی، خواښې مې هم ده، لېور هم خو ما هغوی ته ویلي چې یو چېرې نوکري کوم، دنده لرم.

کورونا وېروس زموږ کار ډېر اغېزمن او خراب کړی دی. زه چې خپلې ځينې نورې جنسي کاروباریانې ملګرې پېژنم، له کوره وتل ورته سخت شوي او کمې وځي. زه هم تر بندیزونو نږدې يوه نیمه میاشت وروسته له کوره ووتلم. ځکه چې کور کې زموږ وضعیت ډېر خراب شوی و او هغه کار مې کور کې نشو کولی، نو ځکه بهر وتلو ته اړه شوم.

خو اوس خلک له موږ ډارېږي. دوی وېرېږي چې له موږ دوی ته کورونا وېروس ورنشي. موږ بیا له دوی ډارېږو چې له دوی موږ ته رانشي. همدې وېرې زموږ کاروبار کم او خراب کړی دی.

که یو چا ته مو پام شي چې ټوخېږي، یا یې زکام دی نو نژدې نه ورځو چې هسې نه کورونا وي. وایو هسې نه د ګټې په ځای تاوان وکړو.

که څوک روغ و جوړ دی نو بیا زر یا پنځه سوه ترې اخلو او داسې خپله ورځانه باسو. کله خو ان مجبورېږو چې خلکو ته سوال زارۍ ورکړو او رضا یې کړو. خپلو پخوانیو ګاکانو ته زنګ کوو چې یو پنځه سوه روپۍ خو راولېږه. ځینې يې راکوي خو ځينې نور بیا هسې پلمې راته کوي.

زموږ کار دغسې دی چې ټولنیز واټن نشي پکې ساتل کېدای. هر څومره احتیاط چې وکړې، بیا هم نه کېږي. زموږ له ډلې يوې هم تر اوسه د کورونا معاینه نه ده کړې خو په چا کې د دې وېروس کومه نښه هم لا نشته.

اورېدلي مې دي چې وېروس هره ورځ په پراخېدو دی او که دا بندیزونه پای ته هم ورسېږي بیا به هم د وېروس له وېرې خلک په اسانه چېرې نه ځي.

د کراچۍ اوسېدونکې شهزادۍ کيسه

زه له تېرو پنځلسو، شلو کلونو راهیسې دا کار کوم. واده مې کړی او څلور اولادونه لرم.

مېړه مې ګټه وټه او خواري مزدوري نه کوله نو مالومه خبره ده چې د کور ګوزاره بې پېسو نه کېږي. بیا زما یوه ملګرې وه چې زه يې دې کار ته راوستلم. ما نه غوښتل چې داسې څه وکړم خو چې د کور حالات او ستونزې مې لیدې، مجبوره شوم چې ويې کړم.

سیکس ورکرز

BBC

ما خپلې کورنۍ ته ویلي چې په یوه غټ کور کې کار کوم او هلته د کور ځينې کارونه سمبالوم. مېړه مې نه دی خبر، خو که خبر هم شي نو چې دی کاروزګار نه کوي، ما به ولې منع کوي؟ د هغه خو له پېسو سره کار دی، وايي پېسې ګټه او راوړه یې.

اوس چې دا د کورونا وېروس ستونزه پېښه شوې، نو هېڅ کار نشته.

ټوله ورځ اوزګاره ناسته یم. یوه نیم ګاک یا مشتري باندې خو زموږ کور نشي چلېدلی. زه پخپله ډېره خپه یم چې څه شی وګټو او څه شی وخورو؟ که له چا مې مرسته غوښتې نو ځواب يې راکړی چې ته خو هسې هم داسې کار کوې، پخپله يې وګټه.

په لندن کې د جنسي کارګرو ژوند څنکه دی؟

یونان کې ولې نارینه کډوالو ‘فحاشۍ’ ته مخه کړې؟

که څه هم څو میاشتې وروسته اوس کار پېل شوی خو د مخکې غوندې نه دی. مخکې به د ورځې دېرش څلوېښت مشتریان راتلل، اوس دېرش څلوېښت خو پرېده، ان دوه درې هم که راشي غټه خبره ده. ګاک هم په راتلو ډارېږي. موږ له هغوی ډارېږو او هغوی له موږ. خو څه وکړو، موږ خو باید پېسې پېدا کړو او خپل مشتري د دې لپاره نشو ځوابولی. که څوک کومه ستونزه یا ناروغي هم لري، موږ مجبوره يو چې ویې زغمو.

تر نن ورځې مې هېڅ داسې کس نه دی لیدلی چې ماسک يې په خوله وي او سینيټایزر وهلو نه وروسته دا کار وکړي. که د چا ماسک په خوله هم وي خو چې موږ ته راشي نو لرې يې کړي. موږ که څه ورته وایو نو راته وايي، بیا دا کار ولې کوې خو کراره په کور کېنه کنه. مالومه خبره ده چې څوک دلته راځي، هغه پخپله هم چندان په دې کیسه کې نه وي چې وېروس به ورشي.

Continue Reading
Advertisement

بی بی سی پښتو

د امریکا فدرالي محکمې په حکم په مرګ یوازینۍ محکومه اعدام شوه

Avatar

خپور شوی

په

(Last Updated On: January 13, 2021)

یوازینۍ ښځه لیزا مونتګامېري چې د امریکا د فدرالي محکمې د حکم پر بنسټ د قتل په تور په اعدام محکومه شوې وه، حکم پرې پلی شو.

وروسته له هغه چې د امریکا سترې محکمې د دې د ژوندي پرېښودو وروستۍ حقوقي هڅې هم رد کړې، لیزا مونتګامېري د اېنډیانا ایالت تېري هاوت یوه زندان کې د مرګونې ستنې په ورلګولو اعدام شوه.

دې قضیې وروسته له هغه د ډېرو پام ځان ته ور واړاوه چې مدافع وکیل یې ویل دا ښځه له رواني پلوه ناروغه ده او په ماشومتوب کې ورسره ناوړه چلند شوی.

لیزا مونتګامېري په ۲۰۰۴ کال کې یوه ۵۲ کلنه مېندواره مېرمن زندۍ کړه.

د عیني شاهدانو په وینا، یوه ښځه چې د اعدام پرمهال د مونتګامېري څنګ ته ولاړه وه، د دې له خولې ماسک لېرې کړی او پوښتنه یې ترې کړې چې که د ویلو له پاره وروستۍ خبرې لري نو ودې یې وایي، هغې ویلي چې “نه” او نور یې هېڅ نه دي ویلي.

مونتګامېري په سیمه ییز وخت ۰۱:۳۱ مړه اعلان شوه. د هغې وکیلې کېلي هېنري وویل هر هغه چا چې یې په اعدام کې ګډون کړی و باید د شرم احساس وکړي.

په یوې اعلامیې کې یې مونتګامېري یوه “زیانمنه شوې” ښځه بللې چې دولت یې په وژلو کې له ټولو لارو کار واخیست او اعدام یې له عدالته لېرې و.

Protesters outside the prison in Terre Haute, Indiana, U.S. January 12, 2021

Reuters
ځینو مظاهره چیانو اېنډیانان کې له زندانه بهر د اعدام حکم له مینځه وړلو غوښتنه کوله.

تر دې وړاندې د امریکا د متحدو ایالتونو عدلیې وزارت ویلي ول د دغه هېواد فدرالي حکومت په نژدې ۷۰ کلونو کې په لومړي ځل یوه ښځینه بندۍ اعداموي.

لیزا مونتګامېري په ۲۰۰۴ کال په میزوري ایالت کې یوه مېندواره مېرمن زندۍ کړې او د هغې د نس تر څیرلو وروسته یې ماشوم ترې تښتولی و.

امریکا کې د اعدام سزا د معلوماتي مرکز په وینا دغه هېواد کې په وروستي ځل په ۱۹۵۳ کال کې د بوني هیډي په نوم مېرمن په میزوري ایالت کې ګازو خونه کې ایسارولو سره اعدام شوې وه.

د ډونلډ ترمپ ادارې تېر کال وویل، چې په فدرالي کچه د اعدام سزا له سره پیلوي.

لیزا مونتګامېري څوک وه؟

د امریکا د عدلیې وزارت د اعلامیې له مخې، مونتګامېري د ۲۰۰۴ کال دسمبر کې له کېنساس څخه ظاهرآ د یوه سپي د پېرلو لپاره میزوري کې د «بوبي جو سټینېټ» کور ته ورغله.

خو کور ته تر ننوتلو وروسته هغې پر سټینېټ برید وکړ او نوموړې یې- چې د اتو میاشتو میندواره وه- تر هغې زندۍ کړه، چې بې سده شوه.

«مونتګامېري تر دې وروسته د پخلنځي چړې سره د سټينېټ خېټه وڅیرله او دا کار لامل شو، چې نوموړې بیرته په سد راشي. سټینېت د ژوند لپاره هلې ځلې وکړې، خو مونتګامېري دا ځل تر مړه کېدو زندۍ کړه. مونټګمېري تر دې وروسته ماشوم د هغې له تنه جلا او له ځان سره یووړ او هڅه یې وکړه، چې خپل ماشوم یې وښيي.»

په ۲۰۰۷ کال یوه قضايي پلاوي نوموړې په فدرالي کچه په انسان تښتونه، چې په مرګ تمامه شوې وه، ګرمه وپیژندله او هغې ته یې په یوه خوله د اعدام سزا وغوښته.

په فدرالي او ایالتي کچه د اعدام سزا توپیر څه دی؟

اعدام

Getty Images

د امریکا د متحدو ایالتونو د قضايي سیستم له مخې جرمونو ته هم په ملي کچه د فدرالي محکمو او هم په سیمه ییزه کچه د ایالتي محاکمو په وسیله رسېدنه شونې ده.

د جعلي پیسو او د ډاکخانې غلا «پوستي غلا» په څېر مشخصو جرایمو ته نیغ په نیغه فدرالي محکمه کې رسېدګي کېږي. په همدې توګه له اساسي قانون سرغړونې او داسې قضیې هم، چې متحد ایالتونه پکې یو اړخ ګڼل کېږي، دغو محکمو ته راجع کېدای شي.

په ۱۹۷۲ کال د سترې محکمې د پرېکړې له مخې په دواړو فدرالي او ایالتي کچه د اعدام سزا ناقانوني وبلل شوې او هغه مهال د دې سزا ټول اړوند قوانین هم لغوه شول.

سترې محکمې په ۱۹۷۶ کال کې ایالتونو ته بېرته د اعدام سزا د پلي کېدو اجازه ورکړه او په ۱۹۸۸ کال حکومت داسې قانون جوړ کړ، چې په فدرالي کچه یې هم دغه کار شونی کړ.

د اعدام سزا د معلوماتي مرکز د راټولو شویو معلوماتو پر بنسټ له ۱۹۸۸ تر ۲۰۱۸ کال پورې په فدرالي کچه ۷۸ کسانو ته د اعدام سزا اورول شوې، خو یوازې درې یې عملي شوې دي.

د مونتګامېري او بېرنارډ د اعدام سزاګانې به په خپل وار سره د اعدام اتمه او نهمه قضیه وي، چې سږکال یې فدرالي حکومت پلې کوي.

د اعدام سزا په اصولو کې بدلون د څه لپاره؟

د ډونلډ ټرمپ ادارې تېر کال وویل، له اوږد ځنډ وروسته په فدرالي کچه د اعدام سزا له سره پیلوي.

هغه مهال لوی څارنوال په یوه اعلامیه کې ویلي ول: «عدلیې وزارت د دواړو ګوندونو د واک او ادارې پر مهال بدترینو مجرمانو ته د اعدام سزا غوښتې ده.»

« د قانون حاکمیت د عدلیې وزارت مسئولیت دی – موږ د خپل قضايي سیستم د اورول شویو حکمونو د پلي کېدو له اړخه د قربانیانو او د هغوی د کورنیو پوروړي یو.»

Continue Reading

بی بی سی پښتو

د ټیک ټاک نجونو د بندیانولو حکم لغوه شو

Avatar

خپور شوی

په

(Last Updated On: January 13, 2021)
مَوَدّه الادهم

AFP
محکمې پر مَوَدّه الادهم لګول شوې نغدي جرمانه تایید کړه

د مصر یوې محکمې د دوو هغو نجونو د بند حکم لغوه کړی، چې تېر کال پر ټیک ټاک یوې وېډیو خپرولو سره د “شرم او حیا په تر پښو لاندې” کولو تورنې شوې دي.

مَوَدّه الادهم او حنین حسام له هغو پنځو کسانو دي، چې دوه کاله د بند سزا پرې ختلې وه او نژدې ۲۰ زره ډالر جرمانه شوې دي.

د سیمه ییزو رسنیو د رپوټونو له مخې، محکمې حنین بې ګناه اعلان کړه، خو پر مَوَده او نورو تورنو یې جرمانه تایید کړه.

دې مسلې په مصر کې پراخ غبرګونونه وپارول او دا نجونې د “ټیک ټاک نجونو” په نامه مشهورې شوې.

د فرانس پرېس د خبر له مخې، حنین د ۲۰۲۰ کال اپرېل میاشت کې وروسته تر هغه ونیول شوه، چې یو درې دقیقې وېډیو کلیپ یې خپور کړ، هغې په دې کلیپ کې خپلو ۱٫۳ میلیون مینه والو ته وویل نجونې له دې سره کار کولو کې پیسې پیدا کولی شي.

رویټرز خبري اژانس ویلي، که څه هم محکمې د سې شنبې په ورځ له حنین ستر تورونه لیرې کړل، خو لاهم د انسانانو په پېر او پلور تورنه ده.

د تېر کال مې میاشت کې، چارواکو مَوَده وروسته تر هغه ونیوه چې په ټیک ټاک او انسټاګرام یې د ملنډو یو کلیپ خپور کړ.

تر اوسه د دریو نورو تورنو کسانو – چې سړي دي – هویت نه دی مالوم شوی خو د بند حکم یې لغوه شوی دی.

پر دواړو ښځو د “فسق” تور لګول شوی دی.

د مصر د قانون له مخې، بې حیایۍ ته د کسانو هڅول له قانون سرغړونه ګڼل کېږي.

رپوټونه وايي، په وروستیو میاشتو کې مصر کې د ټیک ټاک مینه وال ډېر شوي، په تېره کله چې حکومت د کوویډ-۱۹ ناروغۍ د خپرېدو له کبله په هېواد کې محدودیتونه ولګول.

Continue Reading

بی بی سی پښتو

کورونا وېروس: کله چې د ناروغې په مخ کې د هغې مور مړه شوه

Avatar

خپور شوی

په

(Last Updated On: January 8, 2021)
ماریا ریکو او لور یې انابیل شرما دواړې روغتون ته په یوه ورځ یووړل شوې

Anabel Sharma
ماریا ریکو او لور یې انابیل شرما دواړې روغتون ته په یوه ورځ یووړل شوې

په کوویډ-۱۹ اخته یوې ښځې له هغې وروسته چې خپلې مور یې د همدې ناروغۍ له امله د هغې د سترګو پر وړاندې په روغتون کې ساه ورکړه، له خلکو غوښتنه وکړه چې په دې اړه روغتیايي لارښوونې تعقیب کړي.

۷۶ کلنه ماریا ریکو د لستر شیر اوسېدونکې ده، د دې لپاره چې د وروستي ځل لپاره له خپلو دوو لوڼو سره خبرې وکړي، د اکیسجن ماسک یې له خولې لرې کړ، که څه هم پوهېده چې په دغه کار سره یې ژوند نور هم په چټکۍ پای ته رسېږي.

انابیل شرما دغه شېبې “زړه ماتوونکې” وبللې، خو ویې ویل چې خوشاله په دې وه چې مور یې په یواځېتوب کې مړه نه شوه.

هغې خپل وروستی انځور خپور کړی، چې د دغه وېروس په اړه پوهاوی زیات کړي.

“ارامتیا”

ماریا ریکو له خپلې لور، اوښي او دریو لمسیانو سره اوسېده

Anabel Sharma
ماریا ریکو له خپلې لور، اوښي او دریو لمسیانو سره اوسېده

آغلې شرما چې د لستر شیر د وایتویک اوسېدونکې ده، ویلي مور یې یو نیم ساعت وروسته له هغې ساه ورکړه چې ماسک یې له خولې لرې کړ.

“زما مور له دوی وغوښتل چې ماسک ترې لرې کړي او دوی وویل، کله چې موږ دا لرې کړ، نو هر څه پای ته رسېږي. ته به ډېر دوام ونه کړې”.

۴۹ کلنه شرما وايي، “هغې وویل، هو، زه پوهېږم خو ما په کافي اندازه اچولی و”.

“کله چې هغې خبرې کولای شوې، موږ د پنځو دقیقو لپاره ورسره وو، له هغې وروسته هغه بې‌هوښه شوه. هغې موږ ته وویل چې له مړینې وېره نه لري او هغه ورته چمتو ده. هغې راته وویل، ته باید سخته مبارزه وکړې ځکه چې ما په کور کې ماشومان درلودل”.

کورونا وېروس په دې کورنۍ کې خپور شو او د هر غړي ازموینه یې مثبته وووتله

Anabel Sharma
کورونا وېروس په دې کورنۍ کې خپور شو او د هر غړي ازموینه یې مثبته وووتله

د اغلې شرما خور سوسانا ته هم اجازه ورکړل شوې وه چې هلته وي په داسې حال کې چې د شخصي خوندیتوب وسایل یې اغوستي وو.

هغې زیاته کړه “موږ تر وروستۍ سلګۍ د هغې لاس نیولی و”.

“په دې سره ارامه کېدلم چې فکر به مې وکړ موږ کولای شو له هغې سره و اوسو او زه پوهېږم چې په دې سره به مې مور هم ارامېدله”.

اغلې ریکو هم په هغه کور کې اوسېدله چې شرما او د هغې مېړه او درې زامن یې پکې اوسېدل، ۱۰ کلن نوح، ۱۲ کلن اسحاق او ۲۲ کلن یعقوب.

اغلې شرما وویل په دې باور وه چې یو زوی یې په ښوونځي کې کورونا وېروس نیولی و او په همدې سره یې دا وېروس په ډېره چټکۍ ټولې کورنۍ ته ورسېد.

هغې زیاته کړه “زه له خلکو غواړم چې ټول احتیاطي تدابیر تعقیب کړي او د نورو په اړه فکر وکړي”.

ماریا ریکو یوه "په زړه پورې" نیا ګڼل شوې ده

Anabel Sharma
ماریا ریکو یوه “په زړه پورې” نیا ګڼل شوې ده

اغلې شرما او مور یې دواړه په یوه ورځ په اکتوبر کې د لستر شیر شاهي روغتون ته یوړل شوې او اغلې ریکو د نومبر پر لومړۍ مړه شوه.

د هغې د جنازې مراسم په ژوندۍ بڼه اغلې شرما ته ښکاره کېدل، چې نوموړې هغه مهال هم په روغتون کې وه.

آغلې شرما وویل “هغه په دې ښه خبره وه چې څه به پېښېږي او پوهېدله چې له دې به روغه پاتې نه شي او په کافي اندازه د هغې درملنه وشوه”.

شرما ان په کور کې هم له اکسیجن ګټه اخیستله ځکه چې سږي یې د وېروس له امله زیانمن شوي وو.

هغې خپله مور یوه “په زړه پورې نیا” وبلله چې “ډېره پیاوړې اراده یې درلوده”.

Continue Reading

Trending

آریانا نیوز. کلیه حقوق محفوظ است