Connect with us

بی بی سی پښتو

پوهنې وزارت: په غونډو کې د نجونو پر ترانو ویلو بندیز د وزارت پالیسي نه ده

خپور شوی

 په

(Last Updated On: کب ۲۵, ۱۳۹۹)

د افغانستان د پوهنې وزارت د کابل ښار د پوهنې ریاست هغه پرېکړه چې له ۱۲ کلنو ډېر عمر لرونکې ښځينه زده کوونکې په عامه مراسمو کې ترانې نشي ویلای؛ خپلسرې پرېکړه بولي او وایي چې دا د وزارت رسمي دریځ نه دی.

د پوهنې وزارت په یوه تازه خپره کړې اعلامیه کې ویلي دي چې دوی د رسمی زدکړو سربېره په نورو هغو فعالیتونو کې چې د زده کوونکو وړتیا ورسره لوړېږي او د ناسمې ګټې اخیستنې سبب نه شي؛ د برخې اخیستنې ملاتړ یې کوي.

د ښوونې او روزنې یو شمېر فعالان بیا د پوهنې وزارت تازه دريځ د عامه غبرګون پایله بولي چې په خبره یې وزارت له خپلې کړې پرېکړې په شا شوی.

په دغه اعلامیه کې په روښانه توګه د کابل ښار د پوهنې ریاست هغه پرېکړه یوازې د کابل ښار د پوهنې ریاست نظر بلل شوی چې څو ورځې وړاندې یې په یوه سند کې ټولو ښوونځيو ته سپارښتنه کړې وه چې له ۱۲ کلنونو ډېر عمر لرونکې نجونې دې په عامه مراسمو کې ترانې او سرود نه وايي.

اوس د پوهنې وزارت ویلي دي یاد خپور شوی سند د دغه وزارت نظر، دریځ او یا هم رسمي پالیسي نه په ډاګه کوي.

د پوهنې وزارت سرپرستې رنګینې حمیدي په دغه اعلامیه کې زیاته کړې چې دوی د ټولو ښځینه زده کوونکو د زدکړې حق او په هنري او کلتوري فعالیتونو کې د برخې اخیستنې لپاره د دوی د انتخاب ملاتړ کوي.

د کابل ښار د پوهنې ریاست پرېکړه د خلکو سربېره د ځينو ادارو او د افغانستان د بشري حقونو خپلواک کمېسیون له پراخو غبرګونونو سره مخ شوه. په ټولنیزو رسنیو کې د ښځو د زدکړو ملاتړو د (زه زما سندره یم) په نوم د هشټګ له لارې له یادې پرېکړې سره سخت مخالفت ښودلی.

د رپوټونو له مخې اوس درې لکه افغان نجونې د بریتانیا په مرسته ښوونځیو ته ځي.

Getty Images
د رپوټونو له مخې اوس درې لکه افغان نجونې د بریتانیا په مرسته ښوونځیو ته ځي.

دوی د اعتراض په ډول دا پرېکړه د مسؤلو چارواکو د سخت دريځي فکر زېږنده بللې.

حمیرا قادري چې د نجونو د زدکړو ملاتړې او د پوهنې وزارت پخوانۍ سلاکاره ده وايي، د پوهنې وزارت په بېړه او له سلا مشورو پرته د نجونو پر ترانو ویلو محدودیت لګولی وو چې د خلکو پراخو غبرګونونو یې بېرته دريځ بدل کړ. هغې بي بي سي ته وویل:

دا لومړی ځل نه دی چې د پوهنې وزارت په خپلو پرېکړو کې په بېړه او نا مسلکي عمل کوي، د پوهنې وزیره باید د خپلو کړنو ځواب ووايي. زه چې په دغه وزارت کې د کار تجربه لرم، داسې پرېکړې د وخت له وزیر سره له همغږۍ پرته هیڅ امکان نه لري. خو دا چې اوس له دې پرېکړې په شا شوي، باید ووایم چې نور افغانې ټولنې بدلون کړی او هیڅ وخت د داسې موضوعاتو پر وړاندې چپ نه پاتې کېږي. او دا دی دغه غبرګونونو اغېز هم درلود

د پوهنې وزارت تر اوسه دا نه ده روښانه کړې چې ولې بېرته له خپلې پرېکړې اوړي، خو دا چې دا پرېکړه یې د کابل ښار د پوهنې ریاست خپلسرې پرېکړه بللې، زیاته کړې یې ده چې په دې اړه به څېړنې کوي چې وروسته به یې شریکې کړي.

وړاندې دغه وزارت ویلي وو چې دا پرېکړه یې د زده کوونکو د کورنیو او زده کوونکو له نیوکو وروسته او د درسونو د زیاتوالي له امله کړې ده.

خو د دغه وزارت په پخواني مکتوب کې په هغو مراسمو کې نجونو ته د ترانې ویلو اجازه ورکړل شوې وه چې ټولې ګډونوالې یې ښځینه وي. د پوهنې وزارت له لورې په تازه خپره شوې اعلامیه کې پرته له دې چې د زده کوونکو عمر او جنسیت مشخص شي راغلي، دوی په ټولنیزو ډلو لکه د ترانې، څارندوی او سپورټي کلبونو کې د زده کوونکو د ونډې اخیستو ملاتړ کوي.

Continue Reading
Advertisement

بی بی سی پښتو

ملګري ملتونه: طالبان د افغان ښځو پر ضد جنسیتي تبعیض ته سیستماتیکه بڼه ورکوي

خپور شوی

په

(Last Updated On: مرغومی ۲۷, ۱۴۰۰)
Burqa-clad women travel in a vehicle along a street in Kandahar on 18 December

Getty Images

د ملګرو ملتونو بشري حقونو کمېسیون وايي، افغانستان کې د طالبانو مشران د ښځو او نجونو پر ضد تاوتریخوالی او د جنسیت پر بنسټ ولاړ تبعیض تنظیموي.

په یوه اعلامیه کې ملګرو ملتونو ویلي، د طالبانو تګلاره ښځو او نجونو ته یو ډول ډله ییزه سزا رامنځته کوي.

د ملګرو ملتونو په وینا له کار او زدکړو د ښځو ایستلو ستراتیژي افغان ښځې د فقر او بیوزلۍ پر لور بیايي.

په اعلامیه کې راغلي، دغه تبعیضي پالیسۍ کار ته د ښځو ستنېدو مخنیوي، په عام محضر کې له ښځو سره د نارینه محرم شتون لازمي کولو، له یوازې سفر کولو او یا په عامه ټرانسپورټ کې د دوی د سفر مخنیوي او دغه راز د کالیو په برخه کې د ځانګړو بندیزونو له لارې پلي کېږي.

د اعلامیې په ټکو دغه پالیسي پر ښځو د فعالیت، بیان او سیاسي چارو کې د ګډون بندیزونو تر څنګ د ژوند لپاره د دوی پر کاري وړتیاوو هم اغېز کوي او دوی د بیوزلۍ پر لور بیايي.

اعلامیه کې راغلي: په هېواد کې له روان بشري بحران سره سره هغه ښځې له دې اقداماتو ډېرې اغېزمنې شوې، چې د کورنیو مشري ورپرغاړه ده.

طالبانو د ملګرو ملتونو تازه څرګندونو ته غبرګون کې تر اوسه څه نه دي ویلي، خو تېر کې یې دا ډول رپوټونه رد کړي دي. طالبان وايي ښځو ته حقونه ورکوي خو د اسلامي شریعت له اصولو سره سم.

بل لور پر یکشنبه افغان پلازمېنه کابل کې یو شمېر ښځو د خپلو حقونو لپاره مظاهره وکړه.

د دې مظاهرې یوې ګډونوالې ویلي، طالبانو د دوی هغې مظاهرې مخنیوي لپاره چې کابل کې یې طالبانو یوې امنیتي پوستې ته څېرمه د یوې پېغلې وژل کېدو پر ضد کړې وه، پر احتجاج کوونکو اوړه شوي مرچ وشیندل.

ښځې

Getty Images
افغان ښځو د دا وروستیو کې پرلپسې احتجاجونه کړي.

مظاهره کوونکو ښځو ادعا کړې، چې د طالبانو له واکمنېدو وروسته په مزار شریف او هرات کې یو شمېر ښځینه فعالانې تري تم شوې او دغه راز یې پر ښځو د اجباري حجاب تحمیلولو پر ضد شعارونه ورکول.

واک ته له رسېدو وروسته د تېر کال سپتمبر کې طالبانو له شپږمو ټولګیو پورته نجونو پرمخ ښوونځي وتړل.

له هغه راهیسې طالب مشران په تکرار سره وايي، چې په دې تړاو یوه تګلاره چمتو کوي او ژره به ټولو نجونو د ښونځي تګ اجازه ورکړي.

طالبانو وړمه ورځ دې لړ کې وویل، تمه ده د نوي لمریز کال په وري میاشت کې به د نجونو ټول ښوونځي پرانیزي. د طالبانو د حکومت ویاند ذبیح الله مجاهد له اسوشېټډ پرېس خبري اژانس سره په مرکه کې ویلي حکومت به په دې تړاو خپلې ټولې هڅې وکاروي.

Continue Reading

بی بی سی پښتو

طالبان: د نجونو ټول ښوونځي په نوي لمریز کال کې پرانیزو

خپور شوی

په

(Last Updated On: مرغومی ۲۸, ۱۴۰۰)
افغانستان، نجونو زده کړه

BBC

طالبان وايي تمه ده د نوي لمریز کال په وري میاشت کې به د نجونو ټول ښوونځي پرانیزي. د طالبانو د حکومت ویاند ذبیح الله مجاهد له اسوشېټډ پرېس خبري اژانس سره په مرکه کې ویلي حکومت به په دې تړاو خپلې ټولې هڅې وکاروي.

پر افغانستان د طالبانو له ولکې سره تېرې څو میاشتې له شپږمو ټولګیو پورته نجونو ته په دې پلمه ښوونځیو ته د تګ اجازه نه ورکول کېږي چې ګواکې نوې تګلارې جوړیږي.

د نړیوالې ټولنې یوې لوی او مهمې غوښتنې ته د طالبانو ځواب دا چې وايي د نوي لمریز کال په رادبره کېدو به د نجونو ټول ښونځي په هېواد کې پرانستل شي.

د طالبانو ویاند ذبیح الله مجاهد له اسوشېټډ پرېس خبري اژانس سره خبرو کې دا هیله ښودلې چې حکومت یې په دې هڅه کې دی چې په وري میاشت کې به ټولې افغانې نجونې خپلو ښوونځيو ته ستنې شي.

دې مرکه کې ښاغلي مجاهد ویلي، د نجونو د زده کړو لپاره اسانتیاوې خورا مهمې دي، د نجونو او هلکانو ټولګي باید جلا شي، د نجونو لپاره خوندي لیلیې جوړې، او د ښونیزو ودانیو ستونزې له منځه لاړې شي.

واک ته له رسېدو سره طالبانو له شپږمو ټولګیو پورته نجونو پرمخ ښوونځي وتړل.

د طالبانو د بهرنیو چارو وزیر امیر خان متقي په نږدې ډېرو بهرنیو سفرونو کې ویلي چې ښوونځي به ژر پرانستل شي.

ملګرو ملتونو کې د افغانستان څوکۍ ته د طالبانو له لوري ورپېژندل شوي سهیل شاهین هم په ډېرو مرکو کې ویلي دوی د ښوونځيو د ژر پرانستل کېدو لپاره کار کوي.

خو د پوهنې وزرات د دفتر ریس عبدالحکیم همت په یوه مرکه کې بي بي سي ته وویل چې د هېواد یوه کونج کې هم نجونې لوړو ټولګیو ته د تګ قانوني اجازه نه لري تر هغه چې د ریاست الوزار له لوري یې نوې تګلارې بشپړې شوې او اعلان شوې نه وي.

افغانستان، نجونو زده کړه

Getty Images
د طالبانو ویاند ښاغلي مجاهد ویلي د نجونو او هلکانو ټولګي باید جلا شي، د نجونو لپاره خوندي لیلیې جوړې، او د ښونیزو ودانیو ستونزې له منځه لاړې شي.

افغانې نجونو دې حالت یوه نهیلي راتلونکي ته کینولې ځکه په ۹۰مو کلونو کې طالبانو د خپلې واکمنۍ تر پایه دا ژمنه پوره نکړه چې ګواکې افغانې نجونې د ټولو زده کړو د بشپړولو حق لري.

د طالبانو د اطلاعاتو او کلتور د مرستیال وزیر او د حکومت د ویاند ذبیح الله مجاهد دا تازه ژمنه پر کاله ناستو نجونو ته تر پسرلي د هیلو یو څرک دی او که طالبان پر ژمنه ودرېږي نو پر افغانو نجونو به د نوي کال او پسرلي غږ د خوښۍ زیری وي.

Continue Reading

بی بی سی پښتو

د بشري حقونو څار سازمان: د طالبانو واکمنۍ افغانستان کې بشري ناورین لا چټک کړی

خپور شوی

په

(Last Updated On: مرغومی ۲۳, ۱۴۰۰)
Burqa-clad women travel in a vehicle along a street in Kandahar on 18 December

Getty Images
د بشري حقونو څار سازمان وایي، تېرو څو میاشتو کې افغانستان کې د ښځو حقونو برخه کې شاتګ شوی

د بشري حقونو د څار سازمان خپل تازه رپوټ کې ویلي، پر افغانستان د طالبانو واکمنېدو په دې هېواد کې د بشري حقونو ناورین او همدا راز هلته روان بشري بحران لا چټک کړي دي.

یاد سازمان د ۲۰۲۲ کال لپاره خپل ‘نړیوال رپوټ’ کې د افغانستان په اړه ویلي، د تېر اګست پر پنځلسمه نېټه د طالبانو له واک ته رسېدو وروسته هلته د ښځو د حقونو او د رسنیو ازادۍ برخه کې پرمختګونه په شاتګ بدل شوي.‌

په رپوټ کې همدا راز راغلي، د نجونو ډېری ثانوي ښوونځي تړل شوي او ښځې د عامې روغتیا برخې پرته نورو برخو کې له کار کولو منع کړل شوې دي.

د بشري حقونو د څار سازمان د اسیا د برخې مشره پټریسیا ګاسمن وایي،‌ افغانان دا مهال د طالبانو د جبر او د لوږې ترمنځ راګېر دي.

نوموړې وایي، هغه هېوادونه چې تېرو شلو کالو کې په افغانستان کې ښکېل وو، باید له دې هېواد سره د روغتیا او معارف په ګډون ګڼو برخو کې بشري مرستې وکړي.

خو نوموړې ټینګار کوي چې هېوادونه باید دا مرستې د وسیلې په توګه وکاروي‌ او له طالبانو وغواړي چې افغانستان کې له بشري حقونو سرغړونې بندې کړي.‌

د طالبانو غبرګون: د خلکو ټول حقوق خوندي دي

Taliban guard standing as women carry placards during a rally demanding the international community unfreeze the country's assets

EPA
طالبانو ویلي، دا رپوټ د ناسمو مالوماتو پر بنسټ چمتو شوی دی

د افغان طالبانو ویاند ذبیح الله مجاهد د تېر په څېر د بشر د حقونو څار سازمان دا وروستی رپوټ هم رد کړی دی.

نوموړي پر خپله ټوېټر پاڼه لیکلي، له هغه راهیسې چې طالبان واکمن شوي په افغانستان کې د خلکو ټول حقوق خوندي دي.

ښاغلی مجاهد وایي، یاد رپوټ د هغو ناسمو مالوماتو پر بنسټ چمتو شوی چې ځینې کړۍ یې د پروپاګند لپاره خپروي.‌

خو د بشر د حقونو څار سازمان خپل رپوټ کې وایي، طالبانو واک ته له رسېدو وروسته د افغان امنیتي ځواکونو ګڼ پخواني افسران وژلي.

رپوټ همدا راز وایي، طالبانو ګڼ داسې اصول او شرایط لاګو کړي چې ورسره د ښځو حقونه تر پښو لاندې شوي دي.

یاد سازمان همدا راز پر طالبانو تور لګوي چې پر رسنیو یې پراخ محدودیتونه لګولي، چې له کبله یې افغانستان کې اویا سلنه رسنیو فعالیتونه بند کړي.‌

Continue Reading

Trending

Copyright © 2022 Ariana News. All rights reserved!