د اسلامي امارت ویاند ويلي، چې د علم مخالفت باید هیڅکله ونشي؛ ځکه، چې شرعي او عصري علوم دواړه د اسلامي ټولنې لپاره اړین دي.

د اسلامي امارت ویاند ذبیح الله مجاهد په یوه دیني مدرسه کې د وینا پر مهال د اسرائیلو او غزې جګړې ته په نغوته( اشاره ) کې وویل: د غزې خلکو ته؛ ځکه دومره زیانونه واوښتل، چې بې پروايي یې وکړه او له ټکنالوژۍ یې کار وانه‌خیست.

ذبیح الله مجاهد زیاته کړې؛ راتلونکې جګړې به سایبري او انټرنیټي جګړې وي او د افغانستان خلک دې هم پر ټکنالوژۍ او ساینس له ځانه دفاع وکړي.

د نوموړي د څرګندونو له مخې؛ ډېر غير اسلامي هېوادونه د اسلامي نظام د جوړېدو او د اسلامي شریعت د پلي کېدا مخالف دي.

د اسلامي امارت ویاند زیاته کړې: دین باید داسې پلي شي، چې د دین غوښتنه ده؛ داسې، چې خلک له دین سره مینه وکړي.

د افغانستان لپاره د ملګرو ملتونو ځانګړې استازې ویلي، چې زده‌کړې ته د افغان نجونو او ښځو د لاسرسي ننګونه یوه څو اړخیزه مسله ده او پدې اړه په بېلابېلو کچو کې بحث ته اړتیا لري.

د افغانستان لپاره د ملګرو ملتونو ځانګړې استازې په اسلام‌آباد کې د اسلامي ټولنو د ښځو د زده کړې په اړه په یوه کنفرانس کې د وینا پر مهال د نړۍ له هېوادونو وغوښتل، چې د افغان نجونو لپاره متنوع تعلیمي فرصتونه برابر کړي.

د افغانستان لپاره د ملګرو ملتونو د عمومي منشي ځانګړې استازې روزا اوتنبایوا د اسلامي هېوادونو له مشرانو وغوښتل، چې د افغان نجونو له زده‌کړې ملاتړ وکړي.

د یوناما مشرې په اسلامي ټولنو کې د ښځو د زده‌کړې په اړه د اسلام‌آباد په کنفرانس کې د وینا پر مهال وویل، چې د افغان ښځو ننګونو ته رسیدنه څو اړخیزو هڅو او خبرو اترو ته اړتیا لري.

روزا اوتونبایوا وایي: "زه په رښتیا له ټولو هغو وزیرانو او استازو څخه غواړم، چې له ټولې نړۍ څخه راغلي دي او د افغان نجونو لپاره بورسونه ورکړي، آنلاین زده‌کړې او د هغوی لپاره بېلابېل ډوله زده کړې چمتو کړي. دا د نن ورځې دنده ده. تاسې پوهیږئ، چې د افغان نجونو زده‌کړې ته د لاسرسي ډاډ ترلاسه کول یوه یو اړخیزه مسله نده؛ هڅې او بحثونه باید په ټولو کچو کې ترسره شي. "

دا دوه ورځنۍ غونډه، چې سرلیک یې په اسلامي ټولنو کې د ښځو تعلیم دی؛ په اسلام‌آباد ګې د یوې اعلامیې پر خپرولو پای ته ورسیده.

 په اعلامیه کې ټینګار شوی، چې نجونې له زده‌کړې څخه منع کول د ښځو پر وړاندې یو ټولنیز تعصب دی او د نړۍ له مسلمانانو یې وغوښتل، چې نجونو ته د زده‌کړې لپاره مساوي فرصتونه برابر کړي.

د اسلام آباد د ناستې په اعلامیه کې راغلي: " نجونې د زده‌کړې له حق څخه محرومول د مذهبي اصولو څخه ناوړه ګټه اخیستنه ده. د نجونو زده‌کړه نه یوازې یوه مذهبي دنده ده، بلکې یوه بېړنۍ ټولنیزه اړتیا هم ده. مونږ باید د نجونو د زده‌کړې د حق د ساتنې لپاره خپلې هڅې پیاوړې کړو؛ ځکه، چې لوستې ښځې مرکزي رول لوبوي.

د سپینې ماڼۍ د ملي امنیت سلاکار له سي این این سره په مرکه کې ویلي، چې د بایډن ادارې له افغانستان څخه د امریکايي ځواکونو د وتلو پرېکړه "سټراټیژیکه او سمه" وه او که اوس هم امریکایي سرتېري په افغانستان کې وای؛ نو روسیې به پر امریکا ډېر نفوذ درلود.

د امریکا د ملي امنیت سلاکار جیک سالیوان وایي: " امریکا نن په ښه حالت کې ده او امریکایي سرتېري به په ۲۰۲۵ کال کې افغانستان ته ونه‌لیږل شي او نه به هلته ووژل شي. هغه سټراټیژیکه پرېکړه، چې ولسمشر جو بایډن درې کاله مخکې وکړه؛ په تاریخ کې به په ښه توګه یاده شي. که مونږ په افغانستان کې پاتې شوي وای؛ زمونږ سرتېري به اوس هلته وژل کیدل او روسیې به پر امریکا ډېر نفوذ درلود."

نوموړي د هغې پوښتنې، چې آیا هغه هم له افغانستان څخه د ګډوډۍ او ویجاړونکي وتلو مسوول دی؛ په ځواب کې وویل: چې د ده په ګډون د امریکا امنیتي او استخباراتي کاري ډلې ټولې مسوولې دي.

اسلامي امارت ويلي، چې امریکا او ناټو په افغانستان کې ماتې خوړلې او تښتېدلي دي.

دغه راز یو شمېر پوځي شنونکو هم ويلي، چې امریکا په افغانستان کې تقریباً ماتې خوړلې وه او په داسې موقف کې نه‌وه، چې د دوامداره شتون یا په خاموشۍ سره د وتلو په اړه فکر وکړي.

د بایډن ادارې پر مشرۍ له افغانستان څخه د امریکایي ځواکونو وتلو په ټوله نړۍ او د بشري حقونو فعالینو کې پراخ غبرګونونه او نیوکې راپارولي دي. په ۲۰۲۱ کال کې له افغانستان څخه د امریکا پر مشرۍ د ځواکونو وتل د شاوخوا ۷۰ افغان ملکي وګړو او لږ تر لږه ۱۳ امریکایي سرتېرو د مرګ او ژوبلې سره مل شول.