په افغانستان کې د ماشومانو د خوارځواکۍ بنسټ بې‌وسي او بې‌وزلي ده – بې پولې ډاکټران

د بې پولې ډاکټرانو ټولنه (ام‌اس‌اف) ويلي؛ په افغانستان کې د خوارځواکۍ بنسټ بې‌وزلي ده او ډېري کورنۍ دې ته اړ کوي، چې روغتیايي خدمتونو ته د لاسرسي لپاره لرې واټنونه ووهي.

دې ټولنې د سې‌شنبې د ورځې ( د چنګاښ شپږویشتمه) په یوه راپور کې څرګنده کړې، چې افغانان لومړنیو او بېړنیو روغتیايي خدمتونو ته د لاسرسي په برخه کې له ستونزو سره مخ دي.

د بې سرحده ډاکټرانو ټولنې په راپور کې راغلي: د دې ټولنې روغتونونو او کلینیکونو او همدارنګه د عامې روغتیا وزارت هغو روغتونونو ته، چې دا ټولنه ترې ملاتړ کوي؛ ډېر ناروغان اوږده واټنونه وهي؛ ځکه، چې یا په خپلو سیمو کې باکیفیته روغتیایي کلینیکونو ته لاس رسی نلري او یا دا، چې خوارځواکي ماشومان یې ډېر کوچني دي.

په دې راپور کې له یو شمېر هغو کورنیو سره خبرې شوي، چې خپل ماشومان یې د درملنې لپاره دغو مرکزونو ته راوړي دي.

دوی وايي، د دې ستونزې بنسټیز علت د خوراکي توکو کمښت نه، بلکې د پيسو کمښت دی. د دغو ميندو تر څنګ، چې له ناکافي تغذيې سره مخ دي؛ بدن يې په کافي اندازه شيدې نه توليدوي، چې دا بیا پر ماشومانو ناوړه اغېز کوي.

د دغه راپور له مخې: د افغانستان خراب اقتصادي وضعیت د دې لامل شو، چې ډېري کسان په شخصي  کلینیکونو کې د درملنې پر ځای د نړیوالو موسسو پر ملاتړ روغتیايي مرکزونو ته مخه کړي.

دغه راز یو شمېر کورنۍ، چې ماشومان یې خوارځواکي دي وايي؛ د دوی د ماشومانو د ناروغۍ لامل خراب اقتصادي وضعیت او د مناسبو خوړو نشتوالی دی.

د بغلان ولايت اوسېدونکى خداداد ويلي؛ يو نيم کلن ماشوم يې خوارځواکى دى او د اقتصادي ستونزو له کبله نشي کولى، چې شخصي کلينيک ته يې بوځي.

هغه زياته کړې؛ اوس یې ماشوم د نړيوالو موسسو پر مرسته په روغتيايي مرکزونو کې تر درملنې لاندې دى.

د خوړو نړیوالې ټولنې د جولای پر نهمه په خپل نوي راپور کې ویلي وه: ۴ میلیون افغانان، چې ۳ اعشاریه ۲ میلیون یې له پېنځه کلونو کم عمره ماشومان دي؛ له سختې خوارځواکۍ سره مخ دي.

دا په داسې حال کې ده، چې د دې ادارې د څرګندونو له مخې؛ سږ کال ۲۳ اعشاریه ۷ میلیون افغانان بشري مرستو ته اړتیا لري او تر اوکتوبر پورې به ۱۲ اعشاریه ۴ میلیون خلک د خوراکي توکو له نه‌خوندیتوب سره مخ شي.